Prometeu

Ena mitología griega, Prometeu [pɾomeˈtew] (en griegu Προμεθεύς [promeˈt^hews] «"previsión") hue unu los sieti Titanis, criaol i amanti dela umanidá.

Parentescu

Prometeu hue iju de Japetu (sigún algotras versionis del giganti Uromidonti) i la nimfa Climena. Los sus ermanus huerun Epimeteu, Alanti i Menéciu. Hue pairi de Ducalion junta Celenu.

Mitus

Engañiju a Zeus

En estuviendu nuna quimera por qué cachus del toru sacrificau pretenecían alos diosis i qué a los ombris, Prometeu hue llamau comu álbitru. Assinque solló i ataraçó un toru, cuya piel cosió hiziendu dos bolsas. Nuna dellas entró la carni, incultá embaxu'l estómagu, i n'otra'l rebotallu conos güesus i la grassa. Quandu Zeus hue a eligil entre dambas las dos bolsas, reparandu nel pelitasqui, se queó cona bolsa que tenía las escarpícias. Endinau con Prometeu, qu'endispués de entruchilá-li s’estava riyendu, lo castigó, privandu alos ombris del huegu.

Robu del huegu del Olimpu

Endispués de castigal Zeus alos ombris a que comieran la carni crúa, Prometeu ruegó a Atenea que le dexara entral-si nel Olimpu a escondichas. Endrentu prendió un fachu alampandu un cachu de carbón que pusu nel güecu'l tallu dun cañiherru grandi, que por ardel despacinu era mu acorríu alos ombris pa calental-si i alumbral-si.

Encaenamientu de Prometeu

Comu castigu, Zeu smandó a Efestu crial una mujel de barru, Pandora. Esti sel hue entriegau a Epimeteu comu dáiva. No estanti, Prometeu anteriol le dio'l avisiju. L'ermanu despreció ala mujel i Zeus, mu enhuscau, mandó que encaenaran a Prometeu enas montañas del Cáucasu. Pallí, el bienhechol dela umaniá hue condenau a qu’un butri l’esgarrara el su hígau de día, golviendu-li a crecel de nochi. Es soná ena literatura griega l’obra d’Esquilu, Prometeu encaenau.

Liberaeru

Angunas versionis hazin comu liberaol a Eracli, quien, en viajandu pal Jardín delas Espéridis, hondeó una frecha pal butri. Zeus no quixu castigal otra vezi a Prometeu por sel su iju Eracli quien lo salvó.

Relación con otras colturas

Prometeu atija con el dios babiloniu Ea, criaol dun superombri cona sangri de Kingu, a la escontra d'Aruru, que bichó un ombri barru. Prometeu tien relación cona palabra sáscrita pramantha «esvástica», símbolu del sol quandu está canteau pa la derecha en muchas colturas.

Bibliografia

Esquilo, Tragedias, trad. B. Perea, Mairil, Gredos, 1982.
Graves, R., Los mitos griegos, Barcelona, RBA, 2005.
Hesíodo, Obras y fragmentos, trad. A. Pérez Jiménez y A. Martínez Díez, Mairil, Gredos, 1982.