Radioatividá

Dendi Güiquipeya
Crassis de radiacion i holmas de detené-la.

La radioatividá es la emision de nirgía pola desintegracion de núcleus d'átomos inestablis. La nirgía emitia sonin partículas con carga elétrica u ondas electromanéticas, que ionizan el meyu que atraviesan. Una escecion lo constitui el neutron, que no posei carga, pero ioniza la materia en holma indireta. Enas desintegracionis radiativas se tienin várius tipus de radiacion: alfa, beta, gamma i neutronis. Tamien lo poemus definil como un fenómenu físicu natural, por el cual angunos cuelpus o elementus químicus llamaus radiativus, emitin radiacionis que tienin la propieá d'enpresional placas fotográficas, ionizal gasis, proucil fluorescencia, atravesal cuelpus opacus a la lus ordinaria, etc. Debiu a essa capaciá se les sueli denominal radiacionis ionizantis (en contrasti conas no ionizantis). Las radiacionis emitias puein sel electromanéticas, en holma de rayus X o rayus gamma, o bien corpuscularis, como puein sel núcleus de Heliu, eletronis o positronis, protonis u otras. En resumin, es un fenómenu que ocurri enos núcleus de ciertus elementus, que sonin capacis de transholmal-se en núcleus d'elementus d'otrus átomus. La radiativiá es una propieá de los isótopus que sonin "inestablis". Es izil, que se mantienin en un estau escitau enas sus capas eletrónicas o nuclearis, con lo que pa arcançal el su estau hundamental ebin perdel nirgía. Lo hazin en emisionis electromanéticas o en emisionis de partículas con una determiná nirgía cinética. Esto se prouci variandu la nirgía de los sus eletronis (emitiendu rayus X), los sus nucleonis (rayu gamma) o variandu el isótopu (al emitil dende el núcleu electronis, positronis, neutronis, protonis o partículas mas pesás), i en várius pasus sucesivus, cono que un isótopu pesau puei terminal conviltiéndu-se en unu muchu mas ligeru, como el Uraniu que con el transcurril de los sigrus acaba conviltiéndu-se en plomu. Es aprovechá pala otencion de nirgía, gastá en medecina (radioterapia i radiodiagnósticu) i en aplicacionis endustrialis (medias d'espesoris i densiais entre otras).

La radiativiá puei sel:

  • Natural: manifestá polos isótopus que s'alcuentran ena naturaleza.
  • Artificial o enducia: manifestá polos radioisótopus proucius en transformacionis artificialis.