Silgueru

Dendi Güiquipeya
Sartal a: Güiquipeandu, landeal
Silgueru
 (Carduelis carduelis)
Silgueru
Otrus nombris: xilgueru, colorín, colorinu, coloritu
Destribución
Destribución de Silgueru
Crassificación científica
Reinu
Animalia
Filu
Cordata
Crassi
Avis
Ordin
Passeriformis
Familia
Fringillidae
Géneru
Carduelis
Especii
Carduelis carduelis
Autol
Linaeus, 1758
Estau de conservación
Conservación deSilgueru

El silgueru [silˈɣeɾʊ] (nom. cient. Carduelis carduelis) es un'avi biembru dela familia delos fringílidus mu corrienti polos campus i puebrus estremeñus.

Sinonimia[eital | eital coigu]

El silgueru tamién se mienta corrientimenti xilgueru i colorín. Los puebrus del centru i salienti estremeñu prefierin colorín o comparanti, mentris que pa ponienti se dizi más silgueru o xilgueru.

Morfología[eital | eital coigu]

El silgueru es un'avi delgá, de pescueçu cortu i patas finas, midiendu apenas 12-13 cm. Tienin un remuecu de 21-25 cm i pesan de 14 a 19 gramus. Se destaca polos coloris dela cara, que es colorau al reol del picu i una bandina negra junta'l picu i por detrás delos ojus brancu. La cotorina es negra, el lombu pardu i el rabu negru con pintas brancas ala terminación. Las alas son negras con una faxa amarillina.

La deferencia entre el machu i la hembra s'aprecia eno colorau dela cara. En el silgueru ai más colorau i es dun ton más escuru que ena hembra, puyendu-si destender más patrás del oju, mentris que ena hembra no llega tan patrás. El picu es una mijina más largu enos machus que enas hembras i la cabeça d'ellas es más reondina que en el machu.

Los silguerus puein vivil ata 12 añus, no más de 14.

Esparramamientu[eital | eital coigu]

Los silguerus acupan grandi parti del ponienti uropeu i dela Seberia central, norti d'África i salienti i centru d'Asia. No se destiendin palas islas más frías del norti uropeu. En América lo entró el ombri.

Comportamientu[eital | eital coigu]

Vivin en sitius d'arvolea, lo mesmu sotus que de frutalis en sitius de regueríu. Las parejas son monógamas i hazin dos puestas por añu, siendu la primera pa mayu. Comin simientis comu alpisti, cardu o pican frutas. Son de cantíu agradabli i almónicu sobre tó ena primavera.

El machu, ena ruea, prencipia a cantal pa hebreru o marçu. Dispués delas silgueras atendel estus recramus, son ellas las que s'acercan cosconeandu el cuerpu, incultandu la lista amarilla delas alas i alçandu el rabu. La pisa dura ata sel la puesta compreta.

Los níus los hazin ena pingollina delos árvolis, siendu la hembra la que lo costrúi con pastu secu, follarasca, raízis, etc. La puesta la hazin pola amanecía, mesmu enantis d'estal el níu hechu del tó. Los uevinus son brancucius con pintinas o brancus del tó. Duranti los 12-14 primerus días que está la hembra a engoral, es el machu el que l'alimenta.

Los pollinus nacin ciegus i ena primel semana los alimenta la hembra con el ceviqui que trai el machu. Pa no tupil el níu i tené-lu curiosu, la propia hembra se comi los cagalis quandu ván siendu boqueronis. Al cabu delas dos semanas puein salil-si del níu i peíl la comía dendi ahuera, enque no prencipian a comel solus ata tenel 21-25 días.