Sucontinenti Indiu

El sucontinenti indiu, en comparança col restu d'Asia.

El sucontinenti indiu​ es la región geográfica qu'abraça quasi que tola India estórica, ogañu devidía enos estaus d'India, Paquistán, Bangladés, Nepal i Bután. Por razonis colturalis, mesmu geográficas (enque menus), se puei consideral comu parti'l sucontinenti las islas de Sri Lanka i las Maldivas. Tous estus paísis son biembrus del'Associación Sur-asiática pa la Coperación Regional (la SAARC, sigún l'abreviaúra ingresa). El sucontinenti indiu hue conocíu duranti muchus siegrus comu'l "Industán" i acupa'l territoriu qu'ata 1947 se llamava la "India Británica" o liquiamenti "Las Indias" por mé dela colonización. Ogañu ain muchus paquistanís i bangladesís que critican la desparramancia del términu "Sucontinenti indiu" pa hazel mentación alo qu'ellus consideran qu'es el "Industán", en no sentil-si encruyíus nel primel nombri.

Geografía

La superfici del sucontinenti indiu es dunus 4.480.000 km², huendu más-menus la metá dela superfici delos Estaus Uníus i pocu más dela superfici dela Unión Uropea. La región linda pol norti i pol esti cona sierra'l Imalaya, i pol sul col mari Arabi i la baía de Bengala. La sierra'l Indu Kush entri Paquistán y Afganistán sueli sel vista comu'l arrayu nor-ocidental del sucontinenti. La parti ocidental de Paquistán, llamá Baluchistán, está desapartá del sucontinenti polos montis de Suleimán, assinque geográficamente no es parti d'esti, en estuviendu ya ena mesa del Irán.

Paísis del sucontinenti indiu.

Dendi'l puntu de vista dela geología, es considerau un sucontinenti porque s'assienta porcima duna placa tectónica endependienti, la "placa india" (qu'es, ala par, parti dela placa induaustraliana), huendu ai muchu tiempu un continenti aparti que s'estrelló contra la placa Uroasiática, dandu nacencia ala sierra'l Imalaya i ala mesa'l Tíbet. Ogañu, la placa india acontina a movel-si hazia'l norti, hiziendu que las montañas del Imalaya creçan una mijina ca añu.

Puebración

El sucontinenti indiu es una delas regionis más puebrás del Praneta Tierra. Más de 1.600.000.000 de pressonas vivin nél, un quartu dela puebración del mundu. La densidá puebracional, de 350 hab./km², es sieti vezis más grandi que la regulal.

Familia típica de Paquistán.

Las causas dela puebración desmedía del sucontinenti (que no dexa de crecel i crecel i llegará daquí a unus pocus d'añus alos 2.000.000.000 d'abitantis) son muchas, peru toas tien que vél cona mentalidá dela puebración, un aspeutu liquiamenti coltural. Enos paísis que conhorman el sucontinenti indiu la genti se casa quandu son entovía mu nuevus, tienin ijus mu tempranu i tienin muchus ijus pola descarecencia de condonis i pa poel alquiril nel hoturu más dineru pala familia.