Tortilla de patatas

Dendi Güiquipeya
Tortilla de patatas, ca unu la pue jadel más o menus fofa, según el su propiu gustu.
El pinchu tortilla
Bocadillu de tortilla de patatas


La tortilla de patata, o tortilla de patatas es una tortilla (amu, güevu batíu y aluegu fritu[1]) con patatas, anque tamién puei tenel cebolla o cachinus de chorizu. Esti es unu de los platus más tradicionalis de la cocina española, y puei encontralsi en cualisquier casinu, taberna, fonda o restauranti de España.

Estoria[Edital | Editá'l códigu]

La papa o patata es una planta traía de las Américas por los conquistaoris comu el tomati, el pimientu y tantas otrus.

Andenantis s'idía que la tortilla de patatas l'habían inventau en las tierras navarras en tiempus de los carlistas, sin sabel si era ciertu o no, peru ara en el libru La patata en España: historia y agroecología del tubérculo andino, escribíu por el sabiu centíficu del CSIC Javier López Linaje,[2] del Centro de Ciencias Humanas y Sociales del CSIC, ha descubiertu el origin de la tortilla española en el lugal estremeñu de Villanueva de la Serena (Badajoz), duranti el siglo XVIII. El libru mentau contieni datus concretus ondi se parla de la tortilla de patatas en esti lugal unos veinti añus andenatis de las primeras mencionis de la leyenda navarra. En concretu, López linaje señala que el firmanti del escritu que asina lo prueba, Joseph de Tena Godoy y Malfeyto, la fechó en la comarca de La Serena, el 27 de hebreru de 1798. La publicación se jidu en el Semanario de Agricoltura y Artes (en el número 85, volumen IV, páginas 111-112).[3] En la obra se mientan documentus que parlan de la tortilla de patatas, y atribuyi la su invención a Joseph de Tena Godoy y al marqués de Robledo, dos hacendaus ilustraus de Villanueva de la Serena, que trataban de dal con un alimentu baratu basau en la patata para paliar las jambrunas. Lo primeru que se le vinu a las mientis jue conseguil pan de patatas, peru en vez de meterlu en jornu pasalu por la sartén. Con la ayúas de varias mugeris del lugal, con albiliá en la cocina jue evolucionandu a fritalu, con l'aceiti d'oliva de p'allí, las patatas juerun cortás sin la necesiá de jadelas jarinas y aluegu l'echarun güevu batíu, queandu tous asombraítus de esi manjal.[4]

En Villanueva de la Serena endi jadi cuantuá la tortilla de patatas está presenti en las sus tradicionis de cocina. El Día de la Jira, el Lunis de Pascua, la tortilla de patatas es protagonista para disfrutal de esti día de campu. Amás endi el año 2013, pa celebral el descubrimientu del origin villanovensi de la tortilla de patatas, tienin lo que han dau en llamal la Feria de la Tortilla en Villanueva de la Serena.[5]

Animación 3D de una tortilla de patatas

Referencias[Edital | Editá'l códigu]

  1. Diccionario de la Real Academia Española
  2. López Linage, Javier. La Patata en España. Historia y agroecología del tubérculo andino. Editorial: Mº Medio Ambiente y Medio Rural y Marino. 2008 (1ª Ed.)
  3. Diario Hoy 09.11.2008
  4. ¿Quien inventó la tortilla de patatas? Muy Historia. Revista de Divulgación
  5. «Feria de la Tortilla de Patatas. Ayuntamiento de Villanueva de la Serena». Archivado desde el original el 11 de abril de 2016. Consultado el 28 de abril de 2016.