Valcorcheru i Sierra el Gordu

Dendi Güiquipeya
Ir a la navegación Ir a la búsqueda
Paisahi ena zona baha e Valcorcheru (endi l´ermita el Puertu)

El Paisahi protehiu Monti Valcorcheru i Sierra el Gordu s´alcuentra ena província e Caçris, nel términu municipal de Prasencia, enas estribacionis de los Montis de Traslasierra (concretamenti ena conocia cumu Sierra el Gordu.)

Superfici[eital | eital coigu]

Comprendi la totaliá el "Monti d´Utiliá Púbrica CC-111" i tolos sus encravaus. Tiini una superfici e 1.184 etáreas, 56 áreas i 36 centiáreas.

Frora[eital | eital coigu]

Prencipalmenti la zona está puebrá pol alcornoquis, que son los que le dan nombri (Valli el Corchu), peru tamién cuenta con numerosus fresnus, robris, piruétanus i encinas.

Singulariá[eital | eital coigu]

El artu valol estéticu el “Monti Valcorcheru” tiini la su razón de sel en un caraterísticu relievi abrutu i quebrau, con afroracionis graníticas (son abundantis los canchalis en esta zona).

Traicionalmenti, el monti se á eicau tantu a la saca el corchu cumu a la ganaeria estensiva, pese a que las condicionis ecolóhicas que posei el parqui nu son en prencipiu las mehoris pal esarrollu el alcornocal. Nu ostanti, se da el chascu e que la entensa fraturación natural a la que an siu sometias las rocas i la su posteriol alteración, hazin qu´el alcornoqui alcuentri n´estas tierras unas condicionis suficientis pal su esarrollu (esarrollándusi e horma especial i con una fisonumia mu particulal).

Monumentus[eital | eital coigu]

Endrentu el terrenu el parqui s´alcuentran varius monumentus de gran enterés, cumu son:

  • Santuariu la Virhin el Puertu.
  • Cueva el Boquiqui
  • Acuedutu (Praséncia)

Estoria[eital | eital coigu]

Duranti el añu 2002, el ayuntamientu e la ciá e Praséncia esminció los trámitis pala creación d´un campu e golf nel parahi e Valcorcheru, que hata esi momentu era una hesa e propieá municipal, que se gastaba cumu lugal de recreu polos vecinus de Praséncia. Anti l´alarma social provocá pol el mieu a perdel esti valiosu enclavi natural cercanu a la ciá, se creó una cordinaora: "Valcorcheru: Protéhelu", que estaba integrá pol mas de 40 asociacionis de diversus ámbitus de la via pracentina, asín cumu pol un centenal de presonas a títulu presonal. Esta cordinaora prencipió la petición anti el Conseheru d´Agricurtura i Meyu Ambienti, de declaración de Paisahi Protehiu, valorándusi otras ocionis cumu pol sabulugal, la e parqui periurbanu. Finalmenti lograrun el su propósitu i el 12 d´abril de 2005 i meyanti el Decretu 82/2005, Valcorcheru hue declarau Paisahi Protehiu d´Estremaura.