Vocal temática

Dendi Güiquipeya
Sartal a: Güiquipeandu, Landeal

En induropeu i ciertas luengas dél derivás, vocal que sirvi de transición entri la raís i la desinéncia.

Vocal temática en induropeu[eital | edit source]

La vocal temática sulhió en induropeu nun prohessu tardiu de regularización la luenga, pa facilital l’unión entri raizis consonánticas i morfemas aglutinaus qu’endispués dierun passu a las desinéncias. Nu tiini, pol tantu, valol semánticu, sinu morfolóhicu. La vocal temática en induropeu gastaba sempri un timbri meyu e/o, alternandu nel su usiu sigún las destintas categorias la luenga: nom. *dom-o-s/* voc. dom-e “casa”; *e-bher-e-t “llevaba”/*e-bher-o-me “llevabamus”.

Vocal temática enas luengas crássicas[eital | edit source]

El empreu la vocal temática acontinó enas luengas estóricas i hue mu emportanti sobritó en morfolohia nominal, ya que premitió la nacéncia dun paradima regulal tantu en griegu cumu en latín ondi dessistiria l’alternáncia e/o nel tema la parabra. En dambas a dos luengas esti paradima regulal compusu la segunda declinación. V. gr.: *wlkwos “lobu”: gr. nom. λύκ-ο-ς, voc. λύκ-ε, ac. λύκ-ο-ν, hen. λύκ-ο-ιο > λύκου, dat. λύκ-ω-ι; lat. nom. lup-o-s > lupus, voc. lup-e, ac. lup-o-m > lupum, dat. lup-o-i > lupo, abl. lup-o-d > lupo; scr. nom. vrk-a-s, voc. vrk-a, ac. vrk-a-m, gen. vrk-a-sya, abl. vrk-a-d, dat. vrk-a-ya, locat. vrk-e, estr. vrk-a. El latín, pol sel luenga d’acentu tónicu, aborró muchas destas alternáncias prencipalmenti ena flessión verbal pol apofonias: *fer-o-mos > fer-i-mus “llevamus”; *ed-o-mos > edimus “comemus”.

Bibliografia[eital | edit source]

  • Chantraine, P., Morfología histórica del griego, trad. Andrés Espinosa Alarcón, Barcelona, Ediciones Avesta, 1983.
  • Mallory J. P., Adams, D. Q, The Oxford introduction to proto-indo-european and the proto-indo-european world, Oxford, 2006.
  • Monteil, P., Elementos de fonética y morfología del latín, trad. C. Fernández Martínez, Sevilla, 1992.