La Verdaera Elésia Jesús

Dendi Güiquipeya
Sartal a: Güiquipeandu, Landeal

La Verdaera Elésia Jesús [bɛɾð̪aˈeɾa eˈlezja hɛˈzʊh] (en ingrés True Jesus Church [ˈtɾuː ˈʤizəs ˈʧɜːɾʧ]) es una elésia pentecostal que assigura tenel al reol dos millonis miembrus assitiaus en quarenticincu paisis en seis continentis. Esta elésia hue hundá nel sigru XX, en concretu nel añu 1917, i la huerça los miembrus s´alcuentran en China i Taiguán [1].

La missión esta elésia es pedrical el evangéliu a tolas nacionis enantis la segunda vinia Jesucristu.

Las Dies Prencipales dotrinas i creyéncias[eital | edit source]

Las dies dotrinas i creyéncias essenciales la Verdaera Elésia Jesús son:

1. El Espritu Santu[eital | edit source]

La efetiva rececición el Espritu Santu se manifiesta nel palraeru de luengas desconocias i es, velaí, la garantia de tenel una eréncia nel cielu [2].

2. El Bautismu[eital | edit source]

El bautismu n'áugua es un sacramentu pa la remissión los pecaus i pa la regeneración. El bautismu debi acontencel en áugua corrienti natural, es izil, nun riu, nel mari u nun manantal. El bautizaol -ya bautizau anteriol en áugua i nel Espritu Santu- derigi el bautismu nel nombri Jesucristu[3] i la pressona que recebi el bautismu debi sel margullia tuita en áugua.

3. El Lavau Piezis[eital | edit source]

El sacramentu el lavau piezis premiti al creyenti tenel parti con Jesucristu. Tamién sirvi comu recordaeru del debel de tenel amol, santiá, umildá, perdón i selvíciu. Tol qu'á alcebiu el bautismu en áugua, tien que recebil el lavau piezis nel nombri Jesucristu. El lavau entri unus i otrus de los piezis puei sel platicau siempri que seya mestel [4].

4. La Santa Comuñón[eital | edit source]

La Ucaristia es el sacramentu que conmemora la muerti Jesucristu. Premiti participal de la calni i de la sangri Jesús i estal en comuñón con Él pa puel tenel via eterna i resucital nel úrtimu dia. Esti sacramentu veloí se has tan de continu comu seya mestel i se gasta pan sin lua i çumu uva [5] .

5. El Sábau[eital | edit source]

El dia libri, el sétimu dia la semana, el Sábau, es un disantu, bendiziu i santificau pol Dios. Tien que sel osselvau embaju la grácia el Siñol pa la conmemoración la criación i la sarvación provista pol Dios, cona asperáncia descánsiu eternu ena desotra via.

6. Jesús[eital | edit source]

Jesucristu, dalcuerdu con esta Elésia, resucitó al tercel dia i arcendió a los cielus, huendu sarvaol la umaniá, criaol los cielus i la tierra i el únicu Dios [6].

7. La Bíblia[eital | edit source]

La Santa Bíblia, compuesta pol Antíguu Testamentu i el Nuevu Testamentu, está espirá pol Dios i costitui l'única verdá escrita pa la via cristiana [7].

8. La Sarvación[eital | edit source]

La Sarvación l'atorga Dios pol mé la fe. Los creyentis tienin que confial nel Espritu Santu, pa andal en cata la santiá, pa honral a Dios i amal al restu pressonas [8].

9. La Elésia[eital | edit source]

La Verdaera Elésia Jesús, estalachá pol Jesucristu pol mé el Espritu Santu pa pola llúvia postrera, es la elésia verdaera restaurá del tiempu apostólicu.

10. La Segunda Vinia[eital | edit source]

La Segunda Vinia Jesucristu acontecerá nel úrtimu dia, de que abaji del cielu pa julgal al mundu. Los justus recebirán via eterna, pero los impius bicharán la condenación eterna [9].

Referéncias[eital | edit source]

  1. The Growth of Independent Christianity in China, 1900-1937, Daniel H. Bays
  2. (Romanos 8:16, Efesios 1:13-14)
  3. (Juan 3:5; Mateo 3:16; Hechos 2:3-8, 10:48)
  4. (Juan 13:1-7,13:15)
  5. (1 Corintios 10:17, 11:26; Juan 6:53; Marcos 14:24-25)
  6. (Juan 3:16; 1 Corintios 15:3-4; Hechos 4:12)
  7. (2 Timoteo 3:16)
  8. (Efesios 2:8)
  9. (Mateo. 25:31-34; 1 Tesalonicenses 4:16-17)

Atijus[eital | edit source]