Veleyu Patérculu

Dendi Güiquipeya
Sartal a: Güiquipeandu, Landeal

Veleyu Patérculu (en latín Velleius Paterculus) hue un estoriaol emperial, autol de las Historiae Romanae.

Via[eital | edit source]

El praenomen que tien es duosu, pos unas huentis lo dan cumu Marcus i otrus cumu Gaius[1], heneralmenti acetau Marcus pola referéncia Priscianu.

Tuvu nacéncia pal 19 e. C. nuna família inlustri la Campaña. Ya de nuevu melitó nel ehélcitu romanu arcendiendu a trebunu melital enos territórius Trácia, Macedoña i Grécia nel 2 ed. C. Ombri entelihenti i entriquietu, endispués trebahó cumu prefetu caballeria i legau pol ochu añus pa Helmánia i Panónia, embahu el prencipau Tibériu. Al cabu hue nombrau qüestol i dispuesinu pretol. Toa una via enllena selvíciu melital i políticu hizu dél una pressona entendia en assuntus estau i capacitau pal componieru estoriográficu, anque el resurtau, polas cercustáncias enas que se movia la literatura la epoca claudiana, s’estruncó.

Se creyi que hue sentenciau a muerti pol mó Sehanu, con quien compartia una supuesta amistá, nel 31 ed. C.

Obra[eital | edit source]

La su obra hue una estória univelsal en chiquininu, entitulá Historiae Romanae "Estórias Roma", las qualas eica a M. Viníciu. Nellas se relata de holma desigual los hechus dende la estruición Troya hata la muerti Lívia nel 29 ed. C.

L’obra se devii en dos librus de largol mu dispal: el primel dellus, brevíssimu en comparáncia con el segundu, albarca el periodu dende la estruición Troya hata la bicha Cartagu nel 146 e. C. Dél dessistin várias seicionis que nu mos án llegau. El segundu libru cuenta dende Cartagu hata Agustu, detuviéndusi nel periodu entri Húliu Cesa i Agustu, tó enfocau cumu una apreparación pal vinimientu Tibériu.

Al igual qu’otrus autoris el sigru I, cumu Séneca u Valériu Máisimu, Veleyu se sienti achopaçau[2] pola heniliá los autoris crássicus. Anque, siguiendu la linía los coetanus, hue un propagandista el emperaol i la su obra s’encasulla ena labutación enciclopeica i con finis devurgativus i pedagóhicus. Desti heitu, la su precupación está nel periodu decisivu el cámbiu rehimin, que es ena guerra cevil entri Cesa i Pompeyu. La fortuna quiel que dambus a dos runchin i que pierda Pompeyu pa assin estaural el prencipau.

Gastó cumu huentis a otrus estoriaoris latinus cumu Titu Líviu, Pompeyu Trogu, Cornéliu Nepoti u Públiu Rutíliu.

Estilu[eital | edit source]

El estilu retólicu es el própiu la epoca, caraiterizau pol arrepelotonamientu, la repitición, dessaheracionis, contraposicionis, desvius. Con tó, muestra un espetu pocu cudiau, quiziá polas priessas conas que s’escrebió el testu. Son asseñalabris las alabáncias continas al emperaol. La retólica de la que gasta está destiná a la su ensiñáncia enas escuelas, polo que los testus las Historiae Romanae sedrian d’usiu común pal deprendieru estória i retólica.

Abreviaturas[eital | edit source]

L’abreviatura que l’assina el catálogu Oxford es la de Vell.

Huentis[eital | edit source]

  1. C.I.L. VIII.10, 311
  2. Veleyo Patérculo, Historia romana, entrod., trad. i not. Ma. Asunción Sánchez Manzano, Gredos, Mairil, 2001.

Bibliografia[eital | edit source]

  • Bayet, J., Literatura latina, Ariel, Barcelona, 19702.
  • Veleyo Patérculo, Historia romana, entrod., trad. i not. Ma. Asunción Sánchez Manzano, Gredos, Mairil, 2001.
  • VV. AA., Oxford Latin Dictionary, Oxford, OUP, 1968.