El Toril
| El Toril | ||||
|---|---|---|---|---|
| Entidad subnacional | ||||
 | ||||
| ||||
| Coordenadas | 39°53′50″N 5°46′50″O / 39.897222222222, -5.7805555555556 | |||
| Capital | Toril | |||
| Entidad | Monicipiu d'España | |||
| • País |
 España | |||
| Superficii | ||||
| • Total | 149,76 km² | |||
| Altol | ||||
| • Media | 266 m s. n. m. | |||
| Puebración (2023) | ||||
| • Total | 164 hab. | |||
| • Densidá | 1,1 hab/km² | |||
| Huso horario | UTC+01:00 | |||
| Código postal | 10521[1] | |||
| Patrono(a) | Blas de Sebaste | |||
.svg)
Toril es un municipiu español dela provincia de Cazris, Estremaura. Cuenta con una puebración de 159 en 2024[2].
Toponimia
[Edital | Editá'l códigu]El origin del topónimo de Toril puei dal lugal a dos enterpretacionis:
Algunus autoris identifican el términu de “toril” colo que podríe sel la su antigua denominación de “Torril”, en referiencia a una supuesta torri d’época árabi emplaçá nel lugal sobri las ruinas d’arguna villa romana, ya qu'era costumbri entri los musulmanis reutilizal antigüus asentamientus pala costrución de pequeñus baluartis defensivus i de vigiláncia del territoriu.
Otra leitura dela estória, concluiríe nel vocabu “toril” cumu derivación delos ussus ganaerus propius del lugal. Un toril es el recintu ondi si encierran las resis bravas que si van a lidial, i pol estensión si puei consideral cumu el cercaú ondi si guarda el ganau, aludiendu a las múltiplis desas dela çona dedicás ala ganadería.
Geografía física
[Edital | Editá'l códigu]Si encuentra assitiau ábati cerca de Prasencia, el su términu incluyi gran parti del Parqui Nacional de Monfragüi.
Es una pequeña puebración arrodeá de desas i praeras.
Naturaleza
[Edital | Editá'l códigu]La Desa
Toril representa el ábitat natural pol excelencia en Estremaura, la “desa”. Posséi unas delas mejoris masas d’alcornoquis de toa Estremaura. Estas son, pol sí solas, el patrimoniu mejol conservau.
El visitanti que llegui a Monfragüi tendrá una alternativa de calidá, que li incitará a estal más tiempu nel lugal, nu solu nel Toril, sinu ena comarca. Dendi el Centru d’Interpretación, se potenciará el aprovechamientu integlal dela desa, poniendu en valol tolos sus produtus i atividais. Se diseñarán, promoverán i mantendrán rutas temáticas, facilitándusi la proliferación d’actividais ligás a la dehesa (ornitologia, micologia, senderismu, excursionis a caballu, en bicicleta, etc.)
La desa es un modelu d’interación i aprovechamientu ejemplal de los recursus, que costituyin unu delos ejemplus mejoris de desenvolvimiento sustentabli del muestru planeta. Estu l'a llevaú ala su declaración pola UNESCO cumu Reserva dela Biosfera assina cumu Lugai d’Interés Comunitariu (LIC) i Çona Especial de Proteción parlas Aves (ZEPA) pol sel el símbolu delos esfuerçus del ombri pol preserval esti espaciu natural i albergal ecosistemas de gran valol.
El Agüelu
Un recursu natural col que contaba Toril era el “Agüelu”, un alcornoqui declaraú Árbol Singulal d’Estremaura. Esti Quercus suber, situau ena finca La Herguijuela, murió en 2011.[3] Destacaba pola su biometría i porti singulal. Tenía una artura de 15 metrus i un perímetru del troncu a 1,30 m 7,70 m i diámetru de copa de 20 m. La su edá estimá era de más de 500 añus. Tol rodal d’alcornoquis es de gran valol ecolóhicu; numerosos ejemplaris sobriepasan en tamañu a otrus árbolis consideraus cumu monumentalis en otrus territorius.
Ornitologia
L’abondáncia de masas d’agua embalsás contribuyi ala potenciación dela biodiversidá dela çona, ya que atrain a un gran númeru d’avis. Estu, uníu alas escasas molestias humanas que soportan i a l’abondáncia d’alimentus palas distintas especis, convierti al Toril ena despensa del Parqui Nacional de Monfragüi.
Si puein observal fácilmenti grullas ena temporada invernal, alimentándusi entri las encinas. Entri las acuáticas destacan las anátidas (rabuu, silbón, cercetas, patu cuchara, porrón moñuu, etc.) Otras son la garza rial, el somormuju lavancu, zampullín chicu, cormoranis, palomas torcacis, tarabilla común, colirroju tizón, alcaudón rial, abubilla, etc.
Pol últimu aimus de referirnus alas rapacis que puein observalsi gastandu cumu caçaderus estus entornus i d’algunus níus que puei habel nesta çona; assina podemus vel el águila imperial ibérica, rial, perdicera, calçá, u en los restus d’arguna res muerta, agrupacionis de buitris alimentándusi, alimochis, etc.
Micologia
El Toril es un lugal idílicu palos amantis delos hongus i las setas encontrándusi una gran variedá d’especiis. Podemus destacal Boletus (aereus, edulis, impolitus, fragrans, etc…), Amanita (vaginata, procera, caesarea, ponderosa, etc…), Lepiota (macrolepiota procera, macrolepiota rhacodes, etc…), Agaricus (xantoderma, bisporus, campestris, etc…), Russula (virescens, cyanoxantha, etc…), Lepista (nuda, paneolus, etc…) i Lactarius (deliciosus, etc…).
Estória
[Edital | Editá'l códigu]
Toril careci de datus que puean moldeal una estória estensa. Assina cumu el su origin etimolóhicu plantea dudas, los sus escomiençus son inciertus. Nostanti, paeci que el puebru del Toril comiença a sel una localidá con entidá a partil del sigru XV, formandu parti dela diócesis de Plasencia i al amparu dela su Ilesia.
Geografía umana
[Edital | Editá'l códigu]Demografía
[Edital | Editá'l códigu]Cuenta con una puebración de 159 en 2024[4].
| Gráfica de evolución de El Toril entre 1842 y 2021 |
 |
|
Puebración de derechu sigún los census de puebración del INE. Puebración de hechu sigún los census de puebración del INE. |
Transportis
[Edital | Editá'l códigu]La forma más sencilla d’allegar-se al municipiu es a través dela autovía EX-A1, Navalmoral - Portugal (salía 16).
Patrimoñu
[Edital | Editá'l códigu]Ilesia parroquial de San Blas
Ilesia parroquial católica baju la advocación de San Blas, ena archidiócesis de Mérida-Badajós, diócesis de Prasencia, arciprestazgu de Casatejá.[5] Obra del sigru XVI, realiçá en mampostería i sillareju en las esquinas, de planta rectangulal i una sola navi, conserva tres arcus de meyu puntu, dos d’ellus sobri fustis de granitu. Probablementi si costeó la obra pol obispu de Plasencia, Gutierre Vargas de Carvajal (1523-1559), cuyu escudu si encuentra ena ilesia.
Ena sacristía, adosá al ala norti si contempla una pila bautismal de granitu labrá con diversus motivus.
Quandu la ilesia estaba en ruinas, el Ayuntamientu costruyó en 1995 una pequeña ermita baju la advocación de San Blas, que hazi las funcionis de parroquia.
L’antigua ilesia de San Blas del sigru XVI, endispués d’arduus trabajus de restauración, s'a convertíu nel Centru d’Interpretación Reserva dela Biosfera: "Pórticu de Monfragüi", i acogi el archivu municipal.
Organiçación territorial i urbanismu
[Edital | Editá'l códigu]L'estrutura urbanística nu se correspondi exactamenti con la norma general de los puebrus estremeñus; se trata duna curiosa organiçación urbanística rural que paeci nu habel cambiau dendi el sigru XV.
Nel pequeñu cascu urbanu que a surgiu en tornu al templu parroquial de San Blas, vivin una docena larga de familias en casas de recienti costrución.
El restu dela puebración s'asienta enas fincas de mediana i gran estensión que componin el su ampliu términu municipal.
Patrimoñu cultural inmaterial
[Edital | Editá'l códigu]Festividais
[Edital | Editá'l códigu]3 de hebreru: Fiestas patronalis (San Blas) Mayu: Omenaji a la Dehesa i al Ríu Tiétal
Referencias
[Edital | Editá'l códigu]- ↑ Worldpostalcodes.org, código postal n.º 10521.
- ↑ https://www.ine.es/jaxiT3/Datos.htm?t=2863
- ↑ Cita web|url=http://www.hoy.es/v/20111213/regional/adios-viejo-alcornoque-herguijuela-20111213.html%7Ctítulu=Adiós al vieju alcornoqui de La Herguijuela|fechaaccesu=11 de marçu de 2017|apellíu=Hoy|idioma=es|sitiuweb=www.hoy.es
- ↑ https://www.ine.es/jaxiT3/Datos.htm?t=2863
- ↑ LISTAR POR LOCALIDAD DE PARROQUIAS cita web |url=http://www.diocesisplasencia.org/parroquias/listarlocparr.asp |títulu=Copia archivá |fechaaccesu=9 de hebreru de 2013 |urlarchivu=https://web.archive.org/web/20090410080044/http://www.diocesisplasencia.org/parroquias/listarlocparr.asp |fechaarchivu=10 d’abril de 2009
Enlacis esternus
[Edital | Editá'l códigu]Informacion del municipiu nel portal dela Mancomunidá Campu Arañuelu. Predición meteorológica para los próximus sieti días en el municipiu.