Elena Anguissola

Elena Anguissola
Enhormación pressonal
Nacencia	c. 1537 Cremona (Itália)
Muerti	post. 1585 Mantua (Ducado de Mantua)
Familia
Pairis	Amilcare Anguissola Bianca Ponzoni Anguissola
Enhormación profissional
Oficiu	Pintol
Ordin religiosa	Monjas de la Orden de Predicadores

 

Elena Anguissola (c.1532-1584) hué una pintora i monja dominicana italiana, ermana dela pintora Sofonisba Anguissola.

Biografía

Se hizu monja col nombri de Sor Minerva, era ija de Amilcare Anguissola i Bianca Ponzoni. Enos decumentus del siegru XVI, la ortografía del apellíu, mua entri Angosciola i Anguissola. Los sus pairis eran d'origin nobri, el su pairi era dela nobreza genovesa i s'avía muau a Lombardía. Amilcare Anguissola vivía en Cremona cona su familia, nuna casa de via Pellegrino Tibaldi. Aprendió a tolos sus ijus una coltura umanística, cona leturas de librus en latín i italianu, i cona pintura palas ijas moças Sofonisba i Elena, pol maestru de pintura Benardino Campi (1522-1591). Vivierun por tres añus ena casa de Campi i nel 1546, quandu'l pintol dexó Cremona i se muó a Milan, Sofonisba Anguissola se hizu maestra de pintura delas sus ermanas chiqueninas. Esti es el primel casu decumentau en Italia de zagalinas enviás a vivil ena casa dun pintol pa ayual i guial el su tiraeru pal arti, assina comu la primel familia italiana con ermanas pintoras.

Nel 1550 Elena i Sofonisba, qu'eran las ermanas mayoris, passarun pal tallel de Bernardino Gatti, llamau Il Sojaro. S'apricarun en el retratu i tamién s'espirarun en el arti de Moretto da Brescia i el manierismu del retratu español. Dambas ermanas huerun pa Mantua, aondi huerun recibías ena corti delos Gonzaga. Nel 1566 Giorgio Vasari llegó a Cremona i hué güéspedi ena casa Anguissola, aondi se maravilló del arti delas ermanas, enque Elena Anguissola s'avía díu pal conventu de San Vincenzo en Mantua, pa hazel-si monja dominica, col nombri de Sor Minerva. El su nombri se mienta nuna carta de 1557, escrevía pol su pairi ala duquesa de Mantua i nel testamentu del su ermanu, del 1575. Pué sel que el Retratu de dominica comu Santa Catalina de Siena, seya'l su autorretratu, conservau ena Galería Borghese de Roma.

Interioris i retratus dela familia Anguissola

El supuestu retratu de Minerva Anguissola o autorretratu de Sofonisba hué pintau por Sofonisba Anguissola. La jovin Minerva tieni un vestíu con un brocau canchúu, de colol amarrón escuru, revestíu con ribeti de piel i forrajau con sea de colol natural. Tamién hatea un lindu sacu brancu, ribetiau con puntillas i el gambeti alevantau, comu'l estilu venecianu, i lleva una redicina de pelras chiqueninas arrecadandu el corrucu trençau pal testú. La pintora s'espacea enos detallis, comu los prieguis del vestíu, la lús sobri'l encaxi, el comprexu peinau de trenças. La caraterística de Sofonisba es la hondura delos ojus, conas niñas una mijina agrandás. Conocemus sotru retratu duna mugel jovin, adorná con alahas d'oru i coral, conas manus apoyás nuna manga. Se creyi qu'és la su ermana chiquenina Minerva.

La partía d'axedrés (1555).

En La partía d'axedrés está Lucía ala chova, Minerva quandu era volandera ala derecha i la su ermana chiquenina Uropa. Nel lau derechu patrás se pué vel l'aya delas moças, cúya presencia, unía ala sonrisa infantil i real d'Uropa, con un toqui d'umol que afiela cona toma d'atención en el axedrés delas ermanas mas grandis, hazi que la escena seya íntima i enllena de enqueramientu familial. Las dos zagalas protagonizan comu una batalla entri amazonas, una competición dela busca i conquista duna primacía femenina, duna virtú escapás de competil cona masculina, polo menus tocanti alo intelestual i coltural. Verdaeras amazonas i reinas rezan las ermanas Anguissola, adequámenti hateás pala cassión i dandu la manu a una vitoria que las entifica cona meta duna vida dedicá al estuyu i alos virtuosus ocupamientus.

Retratu de Minerva Anguissola.

Retratu de familia con Minerva, Amilcare i Asdrubale Anguissola (c. 1558-1559). Óliu sobri liençu, 157 x 122 cm. Museu Nivaagaard, Niva, Dinamarca.

Amilcare Anguissola conos sus ijus Minerva i Asdrubale de Sofonisba Anguissola es sotra escena dela familia Anguissola. Minerva con una manu alevanta la doblés del su vestíu, de pesau brocau azul, i cona sotra sustieni un ramal de froris. L'atención del pairi es toa pal su iju varón, el su segundu iju, que sustieni'l su braçu comu pa aconchaval-lu. Un perrinu compreta la escena. Nel fondón ai un agradabli paisagi, tisnau d'azul craru, de decrará infrugencia nórdica.

Retratu de monja, de Sofonisba Anguissola, enfirmau i cona fecha, quiciá seya un retratu dela su ermana Elena, ataviá comu Sor Minerva, pos hué la única pessona dela su familia que engressó nun conventu de monjas i púu sel pintá comu noviza pola su ermana Sofonisba Anguissola. La monja noviza sustieni un libru ena manu, forrajau en cueru roxu i conas senefas dorás.

Ijus d'Amilcare Anguissola i Bianca Ponzoni

El testu de referimientu, pa esta lista, es el catálagu espubricau nel 1994 por Leonardo Arte, que hué una ocassión pa arrepassal decumentus antiguus i conocíus pa acomparal-lus con otrus decumentus inéditus. Las fechas hundamentalis sonin:

• 1530, fecha del matrimoñu delos pairis.
• 1551, añu dela nacencia de Amilcare i la retahila cronológica delas nacencias delos zagalis.

No solu s'estudiarun decumentus d'ugañu, sinu tamién la edá que poían tenel los biembrus dela familia Anguissola enas pinturas de Sofonisba. Las sotras fechas de nacencia nesti catálagu, s'espressan ena horma de teneol, en dos o tres añus.

Sin bargu, pa respetal la retahila cronológica delas nacencias delos ijus, s'á descogíu en angunus casus por una datación entremeya, endrentu dela horquilla. Los nombris de Lucía i Elena eran los delas agüelas, i los sotrus estavan sacaus dela mitología o dela estoria antigua, comu era tutanera entri los Anguissola. No se sabi nenguna referencia pal nombri de Anna María.

Escúu dela familia Anguissola

• Sofonisba (1535-1625), pintora, s'aconyugó en primel lugal con Fabrizio Moncada i endispués con Orazio Lomellini.
• Elena (1536-endispués de 1585), pintora, engressa nel conventu col nombri de Sor Minerva.
• Lucía (1537-1565), pintora.
• Minerva (1539-1566), maestra i no pintora, peru escelenti enas letras latinas i italianas.
• Europa (1542 ó 1543-datu desconocíu), pintora, s'aconyugó con Carlo Schinchinelli.
• Asdrubale (1551-1623), músicu.
• Anna María (1555-1611), pintora i professora, s'aconyugó con Giacomo di Gaspare Sommi nel 1574.

Atijus p'ahuera

• Esta obra tieni un canteu de «Elena Anguissola» dela Wikipedia en ingrés, essatamenti d'esti espriqui, espubricá polos sus editoris baxu la Licencia de decumentación libri de GNU i la Licencia Creative Commons Atribución-CompartirIgual 3.0 Unported.

• Datos: Q1327840