Eráclitu

Agora ain pessonas trebajandu nesti artícalu Por causa d'estu, puein faltal conteníus o avel marrus en el hormatu. Has el favol, enantis de hazel qualquiera muación, vai-ti ala carava a tentu d'esti artícalu pa poel cordinal la su redación.

Eráclitu, sigún J. Moreelse

Eráclitu o Eraclitu d'Éfesu [eˈɾaklitu] o [eɾaˈklitu](en griegu Ἡράκλειτος ὁ Ἐφέσιος [heráklɪːtos hos ep^hésios]) (Éfesu 544 e. C. - † 484 e. C.), hue un filósofu elenu, quiciá el mas genial de los llamaus pressocráticus.

Via

Los datus biográficus d'esti filósofu se los devemus a Diógeni Laérciu. Según esti, arcançó la frol la via (que pa los griegus estava pa los quarenta añus) ena LXIX olimpiá, es izil, pal añu 504 o 503 e. C., de má que la su via estuvu entre los sigrus VI i V. La su activiá filosófica cessó pal 480. e. C., polo que concuerda cona datacion Apolodoru i otrus utoris.

Eráclitu tuvu nacéncia ena ciá d’Éfesu, en Jónia, en el senu duna família aristócrata, de las mas enfruyentis ena ciá. El destensu comérciu d'esta ciá con otras colónias comu las del sul itálicu i con el continenti griegu hizu qu’alquiriera un ambienti propíciu pa la filosofia i la céncia. Comu otrus nobris la epoca, Eráclitu se sentia aristócrata de sangri i éspiritu, de mó que escarecia al puebru, bichu que se repegava al su pensaeru i dotrina filosófica. Con tó i con essu, enque huera de família poerosa i puyera vel-se metiu en política facilmenti, Eraclitu rehusó d’enconchaval-se en el gobiernu la ciá. Quijun poné-lo comu βασιλεύς en Éfesu, pero no acetó el puestu, el qual acupó su germanu. Tamien no acetó el cargu qu’el rei Dariu quiju ofrecé-le ena corti persa, sigún decumenta de horma duosa Diógeni Laérciu.

Es capásd que la su enterria al puebru huera veniu del momentu en que los demócratas efesinus avientaran al su amigu Ermodoru de la ciá, algu qu’Eraclitu vidu síntoma duna política coquerosa i corruta. El escarecimientu pol puebru i pol mal goviernu golvierun a Eraclitu una pressona amisentrá i pestosa, consierandu que lo qu’él pensava no quearia al arcanci el ombri corrienti. Más, l’única obra qu’escrevió la acolocó en el templu. Por esti caraiti i lo esbariçosu los sus escritus, plontinu lo enmotarun ὁ σκοτεινός "el escuru".

Eraclitu izia que via deprendiu por sí mesmu i que naidi le via enseñau ná. Sin embargu, por mu hurón que se golviera no pia inoral las corrientis el pensaeru i los grandis poemas épicus comu qualquiera aristócrata cultu de la epoca. Angunus antíguus consieravan al efesinu discípulu Jenófani, enque pareci avel anacronismu, pos quandu nació Eráclitu, Jenófani ya via huyiu de Colofón. Es capás, essu sí, de vel estau familiarizau cona dotrina suya pola cercania las ciais i pola nombreria que cuentava Jenófani por antuenci. Eraclitu se bulra de Omeru i lo huchea, assín comu a otrus poetas l’Antigüeá por inoral la razón. Se relaciona cona filosofia milésia en tantu qu’él tamien busca el prencípiu rigiol i se opón en concecion al pensaeru eleáticu, polo que no premaneceria inoranti d'estas corrientis.

De las destintas muertis que le dan a Eraclitu l’únicu que s’entrevei es que bichó solu i maletu, polo que izin paí, d’idropesia. Sigún Ermipu, el efésiu hue a preguntá-le a los meicus si le pian estrael las umiais achuchandu-le el bandul i comu le ijun que naina, agarró i se tumbó al solatu i mandó a unus zagalis que lo intierraran con istiercu, de mó que murió al sotru dia.

Atijus

• Fragmentus d'Eraclitu en estremeñu