Fernando Pessoa

Dendi Güiquipeya
Sartal a: Güiquipeandu, Landeal
Debuju Fernando Pessoa.

Fernando António Nogueira Pessoa [fɨɾˈnɐ̃ndʊ ɐ̃nˈtɔnjʊ nʊˈɣɐirɐ pɨˈsoɐ] hue un poeta i escrebiol portugués, unu los mijoris en luenga portuguesa.

Via[eital | edit source]

Primerus añus en Lisboa[eital | edit source]

Fernando Pessoa nel su primel añu via.

Fernando Pessoa tuvu nacéncia a las 15:20 el 3 Juñu el 1888 ena capital Lisboa. El partu aconteció nel quartu andal esquierdu el númiru 4u el Largo de São Carlos, frenti l’ópera Lisboa. La su família rescrecia de la pequeña aristocracia pol dambas partis. Su pairi hue Joaquim de Seabra Pessoa, natural de Lisboa, quien trebajaba comu huncionáriu púbricu el Ministério da Justiça i amás hazia de críticu musical pal Diário de Notícias. La mairi, Maria Magdalena Pinheiro Nogueira Pessoa, era natural de la Isla Tercera, de las Açoris. Con ellus vivian la agüela Dionísia i dos criás, Joana i Emília. Fernando hue bautizau el 21 Juñu el mesmu añu ena Igreja dos Mártires, en Chiado. La mairina hue Ana Luísa Pinheiro Nogueira i el pairinu veloí el General Chaby. El su nombri atija con San Antóniu, santu el dia en que tuvu nacéncia i amás concienti con Fernando de Bulhões, nombri pila desti santu.

Pessoa al añu de la muerti el pairi.

La su infáncia estu asseñalá pol hechus que marcarian de pol via al pueta. A las cincu la mairugá el 24 Júliu el 1893, su pairi mueri vítima de tuberculosi quandu apeninas cuentaba con 43 añus. Fernando namás tinia cincu añinus. Al sotru añu murió su gelmanu Jorge. La mairi se vidu obrigá a demualsi de casa i dilsi un vivieru mas moestu: el tercel andal el nu. 104 la Rua de São Marçal. Es desta epoca quandu apaici el primel los eterónimus: el Chevalier de Pas, hechu que cuenta mas tardinu Adolfo Casais nuna carta, andi se mienta el origin los eterónimus. Nessi añu escrebi el su primel puema eicau a la mairi: À minha querida mamã.

Infáncia i joventú en Durban[eital | edit source]

Afotu el segundu matrimoñu Magdalena.

En 1985 la mairi se convoa pol segunda vezi con el comandanti João Miguel Rosa, cónsuli Portugal ena ciá de Durban, en África el Sul, al que conoció un añu enantinu. Pol mó dessi casamientu, Fernando se mua cona su mairi i un tiu-agüelu, Manuel Gualdino da Cunha, pa Durban, andi coló la su joventú.

La mairi tinia que atendel al nuevu mariu i a los ijus que nacierun frutu el nuevu matrimoñu, de mó que el jovin Fernandu se sientia desmanchiliu del núcliu familial, lo qual le atorga momentus reflessión. En Durban estuyó al mó anglosajón. Culsó primária nuna escuela monjas irlandesas ena West Street. Allina hizu la primel comuñón. En 1899 engressa nun colégiu británicu, la Durban High School. Allí escomençó a deprendel ingrés i tendria el su primel atopu cona literatura ingresa. Autoris comu Shakespeare, Edgar Allan Poe (de quien endispués traduju angunus puemas al portugués), John Milton, Lord Byron, John Keats, Percy Shelley u Alfred Tennyson fegurarian entri las sus leturas. Esti endirgaeru en ingrés hizu que Fernando se convirtiera nun escrebiol bilíngüi.

Nel High School de Durban, se gorvió unu los alunus mas cimerus el su grupu, andi colaria tres añus. El mesmu añu andi engressó, cria el seudónimu Alexander Search. Pol mé desti seudónimu labora una correspondéncia con sigu mesmu. Nel 1901 aprebó con destinción el primel dessamin Cape School High Examination i escrebi los primerus pueminas en ingrés. Pol essas fechas mueri su gelmana Madalena Henriqueta, d’apeninas dos añinus. En vacáncias, aballan pa Portugal con el cuelpu su rezién enfenecia gelmana nel barcu. En Lisboa vivin pol un tiempu en Pedrouços i alogu ena Avenida de D. Carlos. Allina tuvu nacéncia el quartu iju frutu el segundu matrimoñu. Endispués se muan a la Isla Tercera, enas Açoris, ondi vivi la família materna. Desta epoca data el puema Quando ela passa.

Fernando Pessoa premaneci ena capital portuguesa mentris que el restu la famíla aballa de nuevu a Durban, hata que pol fin regressa solu a África nel vapol Herzog. Nessa mesma epoca, ententa escrebil narrativa en ingrés i se matricula ena Commercial School, diendu de nochi, mentris qu’acupa el dia en disciplinas umanísticas. En 1903 se presenta a las prebas d’almisión a la Universidade do Cabo da Boa Esperança i anque no consigui güena calificación nel dessamin, otién la mijol nota entri los 899 candilatus nel ensayu estilu ingrés. Pol essi mistériu recebi el Queen Victoria Memorial Prize. Al añu, engressa nel culsu univelsitáriu de la Durban High School, andi hundea enos crássicus latinus i ingressis i escrebi prosa i puesia en ingrés, produjéndusi los nuevus eterónimus Charles Robert Anon i H. M. F. Lecher. S’enlia a espubrical enos papelis el colégiu, andi saca un ensayu críticu entitulau Macaulay. Nessi mesmu añu naci su gelmana Maria Clara. Conclui los sus afortunaus estuyus ena África el Sul con el Intermediate Examination in Arts, ena Univelsiá, andi consigui una güeña calificación.

Regressu a Portugal[eital | edit source]

Estauta Pessoa, nel Café a Brasileira.

Ejandu la família en Durban, regressa definitivamenti a la capital portuguesa, solu, en 1905. Allina vivi cona agüela Dionísia i dos tias ena Rua da Bela Vista nu. 17. La família regressaria pa vacáncias, quartá ena que el jovin pueta viviria con ellus.

En 1906 se matricula al Curso Superior de Letras el qual abaldona sin ensiquiá compretal el primel añu. Es nesti momentu quandu escomiença a tratal con emportantis escrebioris la literatura en luenga portuguesa, enteressándusi pola obra de Cesário Verde i polos sermonis el Padre Antônio Vieira.

En Agostu el 1907 mueri la agüela Dionísia, ejánduli una erencina cona que monta una pequeña tipografia, la «Empresa Íbis —Tipografia Editora— Oficinas a Vapor». En ná i menus hue a piqui. A partil el 1908 se eica a la tradución correspondéncia comelcial, professión de la que viviria el restu la su via.

Hueraparti el su trebaju comu traduziol, Fernando Pessoa s’enlia a escrebil como ensayista i críticu literáriu espubricandu ena revista Águia. En 1912 arranca con el endirgui A nova poesia portuguesa sociologicamente considerada.

Úrtimus momentus[eital | edit source]

L'úrtima frasi Pessoa.

Añus mas tardi, el 29 Noviembri 1935, Pessoa entra engressau nel Hospital São Luís dos Franceses, con dianósticu de cólicu epáticu, siguramenti una colangiti agua prevocá pol un cárculu bilial i associá a la cirrosi epática. Tó essu hue frutu, sin dua, del su empiqui al vinu i al alguardienti que desarrolló a lo largu la su via en Lisboa. Murió al sotru dia, el 30 Noviembri, quandu tinia apenas 47 añus d’eá. Enos úrtimus momentus via, pii las antiparras i huchea a los eterónimus. La su úrtima frasi la escrebió ena luenga ena que s’educó: I know not what tomorrow will bring “No sé qué trairá el mañana”.

Obra[eital | edit source]

Fernando Pessoa hue una autol criativu nel güen sintiu la parabra: amás de crial literatura crió pressonagis qu’escrebieran essa literatura. Fernando se desdobraba en destintas pressonas, llamás eterónimus i es que él mesmu assiguraba que lo nesseçáriu no era vivil, sino crial: viver não é necessário; o que é necessário é criar.

Las parabras que definin la trayetória literária Pessoa se hallan nesti puema veloí:

O poeta é um fingidor.
Finge tão completamente
Que chega a fingir que é dor
A dor que deveras sente[1].

“El pueta es un fingiol. / Fingi tan compretamenti / que llega a fingil que es dolol/ el dolol que deveras sienti.”. Los eterónimus de Pessoa, sin dua el mayol atrativu desti pueta, son pressonaliais destintas, no son meros seudónimus. Criacionis la su menti que cobran via ena literatura i a las que enclusu dota de datus biográficus. Los eterónimus mas conocius huerun Álvaro de Campos, Ricardo Reis, Alberto Caeiro i Bernando Soares, manque la lista entri eterónimus, meyu-eterónimus i seudónimus arcança el largu númiru de 72 nombris.

Ortónimu[eital | edit source]

Con el nombri ortónimu se mienta a lo escritu pol Fernando Pessoa que tien su mesmu nombri i pressonaliá. No estanti, l’obra ortónima Pessoa coló pol destintas fasis mu enfruyenciás pol patriotismu (que se ve en Mensagem, andi se respira el sebastianismu), la religión i las socieais secretas comu la Maçoneria. La puesia ortónima es de ton épicu i avezis trágicu. Es consierau pol sigu mesmu comu simbolista i muelnista, pola evanescéncia, indefinición, innovación i insatisfación. Con ellu se crian destintas nuevus “ismus” comu el sensacionismo, el paulismo i el interseccionismo. L’únicu libru espubricau en portugués en via hue prehisamenti una obra ortónima: Mensagem.

Eterónimus[eital | edit source]

Álvaro de Campos[eital | edit source]

Hue el únicu en muestral una volución a lo largu la su obra. Sigún la via que le didu, Álvaro era un engenieru cuya educáncia bia siu ingresa, manque era d’origin portugués. Se sintia, sin embargu, estrangeru en qualisquiá parti el mundu.

Los sus comiençus son decaentistas, pingau de simbolismu i qu’endispués sedria de huturismu. Aluspués duna via enllena desilusionis, se troca niilismu. El puema mas conociu i enfruyenti hue Tabacaria.

Ricardo Reis[eital | edit source]

Rública Ricardo Reis.

El eterónimu Ricardo Reis es descritu comu un meicu que se definia comu latinista i monárquicu, símbulu la literatura ociental. Sigui los prencípius la almonia crássica con elimentus estoicus i epicureistas, amás del boculismu de las Odas.



Alberto Caeiru[eital | edit source]

Nació en Lisboa i vivió quasique tola via de campusinu. Apeninas tinia hecha la primária, pero es sin dua el maestru del restu los eterónimus i del própiu ortónimu. Era el poeta-filósofu que defendia la simpreza, dehuyendu de tolo que supusiera astración i metafísica. Es el únicu eterónimu prenamenti puéticu, pos pensaba que la puesia era el únicu meyu de dal cuenta la rialiá. El su velsu era chanu, dreitu, sin simbologia.

Referéncias[eital | edit source]

  1. Fernando Pessoa/Bernardo Soares, Autopsicografia, 1930

Atijus[eital | edit source]