Gas

Dendi Güiquipeya
Ir a la navegación Ir a la búsqueda

Se denomina gas al estau de agregación dela materia nel qual, baju ciertas condicionis de temperatura i presión, sus moléculas enteracionan débilmenti entri sí, sin hormal enlacis molecularis, adotandu la horma i el volumi del rezipienti que las contien i tendiendu a separalsi, estu es, expandilsi, tou lo posibli pol la su arta concentración de energía cinética. Los gasis son fruius artamenti compresiblis, que experimentan grandis chambus de densida con la presión i la temperatura.

Las moléculas que constituyin un gas quasi nu son atraías unas pol otras, polo que se muevin nel vazíu a gran velocida i mu separas unas de otras, explicandu asín las propiedais.

Las moléculas dun gas se alcuentran pláticamenti libris, de modu que son capazis de destribuilsi pol tou el espaciu nel qual son contenius. Las huerças gravitatorias i de atración entri las moléculas son despreziablis, en comparación con la velocida a la que se muevin sus moléculas.

Los gasis ocupan completamenti el volumi del rezipienti que los contien. Los gasis no tinin horma definia, adotandu la delos rezipientis que las contien. Puein comprimilsi fácilmenti, ebiu a que existin enormis espacius vacíus entri unas moléculas i otras. Las sus partículas se alcuentran en un estau quasi libri. A temperatura i presión ambientalis los gasis puein sel elementus cumu el idrógenu, el ossígenu, el nitrógenu, el cloru, el flúol i los gasis noblis, compuestus cumu el dióssiu de carbonu o el propanu, o mesclas cumu el airi.

Los vaporis i el prasma compartin propiedais con los gasis i puein hormal mesclas homogéneas, pol ejemplu vapol de áugua i airi, en conjuntu son conozius cumu cuelpus gaseosus, estau gaseosu​ o fasi gaseosa.