Ossígenu

Dendi Güiquipeya

El ossígenu es un elementu químicu de númeru atómicu 8 y representau pol símbolu O. El su nombri provieni de las raícis griegas ὀξύς (oxys) («aceu», literalmenti «punzanti», en referencia al sabor los aceus) y –γόνος (-gonos) («productor», literalmenti «engendraor»; es izil, "productor d'aceus"[1]), porque en la época en que se le dio esta denominación se creyía, incorrectamenti, que tós los aceus requerían ossígenu pala su composición. En condicionis normalis de presión y temperatura, dos átomus del elementu s'enlazan pa formal el diossígenu, un gas diatómicu incoloru, inodoru e insípidu con fórmula O2. Esta sustancia constituyi una importanti parte la atmósfera y resulta necesaria pa sostenel la vía terrestri.

Forma parti del grupu los anfígenus en la tabra periúdica y es un elementu no metálicu artamenti reactivu que forma fácilmenti compuestus (especialmenti óxssidus) con la mayoría de elementus, exceptu con los gasis noblis heliu y neón. Asínmesmu, es un huerti agenti ossidanti y tié la segunda eletronegativiá más arta de toïtus los elementus, solu superá pol flúor.[2] Midíu pola su massa, el ossígenu es el tercer elementu más abundanti del universu, tras el idrógenu y el heliu,[3] y el más abundanti en la corteza terrestri ya que forma, prácticamenti, la mitá la su massa.[4] Debíu a la su reactividá química, no puei permanecel en l'atmósfera terrestri com'elementu libri sin sel reabastecíu constantementi pola ación fotosintética los organismus qu'utilizan la nirgía solar pa producil ossígenu elemental a partil del áugua. El ossígenu elemental O2 solamenti empezó a acumulalsi en l'atmósfera endispués l'aparición d'estus organismus, aproximadamenti hazi 2500 millonis d'añus.[5] El ossígenu diatómicu constituyi el 20,8 % del volumin l'atmósfera terrestri.[6]

Dau que constituyi la mayor parti la massa del áugua, es tamién el componenti mayoritariu la massa los seris vivos. Una hartá las moléculas más importantis que forman parti los seris vivus, comu las proteínas, los aceus nucleicus, los carbohidratus y los lípidus, contienin ossígenu, asín comu los prencipalis compuestus inorgánicus que forman los caparazonis, dientis y huesus animalis. El ossígenu elemental se produci por cianobacterias, algas y prantas y toäs las formas complejas de vía lo usan pala su respiración celular. Resulta tóxicu palos organismus de tipu anaerobiu obligau, las formas tempranas de vía que predominaban en la Tierra hata qu'el O2 comenzó a acumulalsi en l'atmósfera. Otra forma (alótropa) del ossígenu, el ozonu (O3), ayuda a protegel la biosfera de la radiación ultravioleta a un pazu altol, en la llamá capa d'ozonu, peru es contaminanti cerca de la superfici, dondi es un subproductu del esmog. A altolis aún mayoris la órbita baja terrestri, el ossígenu atómicu tié una presencia significativa y causa erosión en las navis espacialis.[7]

Carl Wilhelm Scheele descubrió el ossígenu de forma independienti en Upsala en 1773, o inclusu endenantis, y Joseph Priestley, en Wiltshire en 1774, peru el honor s'estila adjudicáglesi a Priestley debíu a que publicó el su lavutu endenantis. Antoine Lavoisier, cuyas investigacionis ayudun a desacredital l'entoncis popular teoría del flogistu de combustión y corrosión, acuñó el nombri «ossígenu» en 1777.[8] Esti se produci industrialmenti meyanty la destilación fracioná d'airi licuau, el usu de zeolita con ciclus de presión pa concentral el ossígenu del airi, l'electrólisis del áugua y otrus meyus. El ossígenu s'utiliza en la produción d'aceru, plásticus y textileis; los propulsoris de cohetis; l'ossigenuterapia; y l'asistencia pala respiración en aeronavis, submarinus, vuelus espacialis y submarinismu.

Guípesi tamién[Edital | Editá'l códigu]

Notas al pie[Edital | Editá'l códigu]


Huentis[Edital | Editá'l códigu]

Referéncias[Edital | Editá'l códigu]

  1. Asimov, Isaac. "Breve historia la química: Introducción a las ideas y conceptos de la química". (2014). Página 81. ISBN 978-84-206-6421-7
  2. =http://www.webelements.com/oxygen/electronegativity.html "WebElements Periodic Table of the Elements | Oxygen | Electronegativity"
  3. Nature's Building Blocks: An A-Z Guide to the Elements. (Oxygen). Emsley, John. (2001). páginas 297. ISBN 0-19-850340-7
  4. https://web.archive.org/web/20071026034224/http://periodic.lanl.gov/elements/8.html "Oxygen"
  5. "NASA Research Indicates Oxygen on Earth 2.5 Billion Years ago" http://www.nasa.gov/home/hqnews/2007/sep/HQ_07215_Timeline_of_Oxygen_on_Earth.html%7Cpublisher=NASA
  6. "Oxygen". Cook, Gerhard A.; Lauer, Carol M. (1968). The Encyclopedia of the Chemical Elements|editorial=Reinhold Book Corporation. Páginas: 499–512
  7. https://web.archive.org/web/20070613121048/http://www.spenvis.oma.be/spenvis/help/background/atmosphere/erosion.html "Atomic oxygen erosion"
  8. "Mellor's Modern Inorganic Chemistry". Parks, G. D.; Mellor, J. W.

Bibliografía complementaria[Edital | Editá'l códigu]

  • Walker, J. (1980). "Handbook of Environmental Chemistry. Volumen 1. Parte A: The natural environment and the biogeochemical cycles". The oxygen cycle. Página: 258. ISBN 0-387-09688-4.

Atijus[Edital | Editá'l códigu]