Hevia
| José Ángel Hevia | ||
|---|---|---|
 | ||
| Enhormación pressonal | ||
| Nombri de nacencia | José Ángel Hevia Velasco | |
| Nacencia |
11 de octubre de 1967 (56 años) Villaviciosa (España) | |
| Nacionalidá | Española | |
| Enhormación profissional | ||
| Oficiu | Tocaol | |
| Cargus acupaus | Presidente de la SGAE (2018-2019) | |
| Seudónimu | Hevia | |
| Género | Música folk | |
| Estrumentu | Gaita | |
| Sitiu web | www.hevia.es | |
| Destincionis |
| |
Hevia [ˈeβja] es el nombri artísticu José Ángel Hevia Velasco, músicu asturianu i acaémicu onol de la ALLA. Arcançó nombreria pol tema Busindre reel i es sonau pol bel colaborau ena criación la gaita eletrónica murtitímbrica.
Biografía[Edital | Editá'l códigu]
José Ángel Hevia tuvu nacéncia ena localiá asturiana de Villaviciosa nel 1967. Emprencipió a tocal la gaita quandu tinia ochu añus. El cebiqui pol estrumentu vinu de mas patrás, de pa quandu con quatru añinus vidu pol primel vezi a un gaiteru tocandu nuna romeria en Amandi. Mençó a dal crassis pal tocaeru la gaita tres vezis a la semana, endispués la escuela, en Gijón, embaju los endirguis el maestru Armando Fernández. Al añinu plática, Hevia tocaba en quandu en ves junta bandas folclóricas. En ensiñándusi Hevia a la gaita, su gelmana María José emprencipió a recebil los endirguis al tambol pol mé de Sabino Cifuentes. El duu, José Ángel a la gaita i Ma. José al tambol, plontinu se hizu sonau pol Astúrias.
Correura profissional[Edital | Editá'l códigu]
De alunu a maestru, Hevia hundó una banda gaitas al poquinu d’emprencipial a dal crassis en 1985. Aprovechandu el empiqui general que dessistia pola música populal ena región, Hevia hundó escuelas en Villaviciosa, Candás, Ribeseya i Mieres, sin ejal de tocal junta la gelmana i participal en grupus folclóricus. Hue diretol la Banda Gaites Villaviciosa dende 1986 hata el 2001. Llegó a grabal un discu junta Ma. José i otras colaboracionis, Hevia, en 1991. Los estuyus Filologia Ispánica queaban entrivolaus entri las sus atuacionis i endirgus.
No mu tardinu s’enlió, junta al su alunu Alberto Arias, pogramaol enholmáticu i Miguel Dopico, ténicu eletrónicu, a desarrollal un proyeutu gaita MIDI qu’arrecogiera los sonis de destintus estrumentus vientu.
En 1997 prencípia la grabación del segundu discu Tierra de nadie con el que consiguió un éssitu mundial, vendiendu mas de dos millonis cópias i encabeçandu las listas ventas. El primel cenzillu hue Busindre reel, del que plontu le hizun una remescla pal arrádiu. El segundu gran éssitu hue El garrotín, cuya velsión remesclá sirvió de banda sonora pa la Vuelta ciclista a España nel 1999.
En 2000 has el tercel discu, Al otro lado, sutitulau en asturianu Al otru llau, con sonis muchu mas fusionaus qu’el anteriol. El primel cenzillu hue Tanzila, de enfruyéncias árabis. El tema Baños de Budapest, el segundu cenzillu, tuvu mu güena acogia, del que se hizun ansimesmu remesclas.
En 2003 espubrica Etnico, ma non troppo andi los sonis se van mesturandu cona eletrónica, aventurandu la línia eletrónica i chill-out el su quintu discu Obsessión. Desti s’estrai la canción Luz de domingo pa la pinicla omónima de José Luis Garci.
Discografía[Edital | Editá'l códigu]
- Hevia, 1991.
- Tierra de nadie, 1998.
- Tierra de nadie (edición especial), 1999.
- Al otro lado (Al otru llau), 2000.
- Etnico, ma non troppo, 2003.
- Obsessión, 2007.