José de Espronceda

Dendi Güiquipeya
José de Espronceda

José Ignacio Javier Oriol Encarnación de Espronceda y Delgado (Almendraleju, 25 marçu de 1808 – † Mairil, 23 mayu de 1842), hue un poeta estremeñu dela época del Romanticismu.

Vía[Edital | Editá'l códigu]

En Mairil, estandu a estuyal nel Colegiu de San Mateo, se unió a una socieá secreta, Los Numantinus, pa vengal la muerti Rafael del Riegu. Denunciau por ellu, hue desterrau a un monesteriu de Guadalajara duranti cincu añus. Aluspues salió d'España i vivió en Bélgica, Fráncia, Ingalaterra (ondi se namoró de la ija el coronel liberal emigrau Epifanio Mancha, Teresa) i Paisis Baxus cumu esiliau liberal. Golvió pa España con algotrus liberalis pol mé la anistía declará pola muerti del rei Hernandu VII, en 1833. Dio la boqueá entavía en huendu nuevinu de garrotinu en 1842.

Obra[Edital | Editá'l códigu]

Duranti la su estancia nel monesteriu, i alentáu pol su maestru, el eruitu i pueta sevillanu Albertu Lista, encetó a escrebil el puema estóricu El Pelayu en otavas realis, qu'ehó sin acaberu. Endispués escrebió la novela estórica Sanchu Saldaña u el castellanu e Cuéllal.

Se le consiera el pueta románticu español pol escelencia pol mé el su talanti byronianu. En efeutu, la su puesía recuelda a la de Lord Byron, sobri tó enus sus dos puemas narrativus más estensus: El estuyanti e Salamanca, al tentu el tema seutol donhuanescu, que se pué consieral cumu un acabáu esponenti el heníru románticu leyenda, i el incompletu El Diablu Mundu (1841), eterohénu puema filusóficu nel que s'encluyi el famosu «Cantu a Teresa», deicáu a la su querindonga Teresa Mancha. Tamién escrebió gran cantiá e puemas cortinus que hucheó Canciones, entri los que destaca cumu el más conocíu «La canción del pirata»; tamién feguran «A Harifa nuna orhía», «El verdugu», «El mendigu», «El reu e muerti» u «Canción del cosacu». Tós estus puemas s'ispiran en presonahis rehuíus u hundeáus pola socieá, colu que pol primel vedi apaecin caraenti hormuláu el tema social ena lírica española.

Nel su «Inu al sol» i nel puema «Óscal i Malvina» Espronceda s'acelca tamién a la puesía e James Macpherson, enventol del vati célticu Ossian. L'estilu más cautiváu pol autol estremeñu es amanti e los efetus retóricus peru es flesibri i espiráu enus sus más mehoris intis.

Hue descohíu palramentáriu enas Cortis Heneralis, en 1842 pol Partíu Progresista.

Atihus[Edital | Editá'l códigu]