Platón

Platón
Enhormación pressonal
Nombri de nacencia	Αριστοκλής
Nombre en griego antiguo	Πλάτων
Nacencia	años 420 a. C.juliano Atenas (Antigua Atenas)
Muerti	años 340 a. C.juliano Atenas (Antigua Atenas)
Sepoltura	valor desconocido
Lengua materna	Griego antiguo
Familia
Pairis	Aristón de Atenas Perictione
Educación
Alunu de	Sócrati
Enhormación profissional
Oficiu	Filósofo, epigramista, poeta, escrevienti y filósofo del derecho
Ária	Filosofia, literatura, epistemología, Derechu, Política, educación, família, War, amistad, amol, filosofía antigua y antigüedad clásica
Cargus acupaus	Escolarca de la Academia de Atenas (desde 387 a. C., hasta 347 a. C.)
Alumnos	Aristóteli y Teofrastu
Movimientu	Platonismo
Género	Diálogo platónico
Correúra deportiva
Deporti	Lucha griega

Platón d’Atenas (428/27 – 347 e. C.) hue unu los mas elustris filusofus griegus. Hue discípulu de Sócrati, hundaol la Acaémia i maestru d’Aristótili. Se crei qu’el su nombri verdaeru iba siu Aristocli; Platón (πλάτος en griegu senifica «anchón») era un apelliu que, probabrienti, hazia referéncia a la su caraiterística física, sigún el su pelitasqui aléticu u los sus ombrus anchus u enclusu a la su ámplia cabusia enteletual en tratatandu temas de heitu tan astratu. La su filusofia á siu de gran emportáncia i enfruéncia. Platón abadó albondus los temas el pensaeru conocius: ética, política, metafísica i toria la conocéncia.

Via

Archivu:Platón y Aristóteles.jpg

Ecena la "Escuela d'Atenas" de Rafael con Platón a la gocha i el su dicípulu Aristótili porteandu el su libru d'"Ética"

Platón (en griegu Πλάτων) tuvió la su nacencia un añu dispués la muerti el políticu ateniensi Pericli. El su pairi, Aristón, s’idi que hue decendienti el rei Codru i la su mairi, Peritioni, del estaista Solón.

Al prencípiu, a Platón le pilraba la filusofia e Crátilu, un siguiol el filusofu hóniu Eráclitu. Sin embalgu, alreol los 20 añus, s’atopó con Sócrati i se trucó dicípulu dél. Una mihina dispués el 399 e. C., Platón estuvu pa Megara con angunus los otrus dicípulus de Sócrati, agüespiándusi en ca Uclidi. Nel 388 e. C., deque cuentaba ya con 40 añus, viahó pa la Mana Grécia cola entención de conocel de celquina las comuniais pitagóricas. Nesta ocasión, vinu a conocel a Arquita e Tarentu. Mentris, nesi viahi, Dionísiu I convió a Platón de dil a Siracusa, en Sicília. Platón palti pa Siracusa cola esperáncia de emprantal pallí las sus ideas políticas. Sin embalgu, acabihó pol desaculalsi i regresa p’Atenas.

Nel su retolnu, hunda l’Acaémia. Esta estitución alú alquiei prestíhiu i hata ella acuia un alabán de hovin en cata duna estrución i mesmaenti ombris elustris a fin de debatil ideas. En 367 e. C., Dionísiu I mueri i Platón retolna pa Siracusa con el prepósitu d’entental una vedi mas emprantal la sus ideas políticas la corti el enfeneciu rei. Sin embalgu, el deseu el filusofu hue en bardi i 7 añus dispués güervi p’Atenas, ondi premanecerie a la direción l’Acaémia hata la su muerti nel 347 e. C.

Pensaeru platónicu

Asín poncima, Platón esarrolló la noción de qu’el ombri está en contautu continu con dos tipus de rialiá: la entelihibri i la sensibri. La primel rialiá es concreta, remanecienti, imutabri; la segundera, a la escontra, son tolas cosas qu’afetan a los muestrus sintius, son rialiais ependientis, mutabris i son imahin las rialiais entelihibris.

Toria las ideas

Esta dobri conceción de cuantu desisti alcibi el nombri e Toria las Ideas u Toria las hormas. Hue esarrollá cumu ipótisi nel dialogu Fedón i costitui una maea e garantidal la posibiliá de la conocéncia i hadel fornua una entelihibiliá relativa a los fenóminus.

Pa Platón, el mundu concretu precibiu polos sintius es una languiosa reproución el mundu las Ideas. Ca ohetu concretu que desisti palticipa, unta tolos otrus ohetus la su categoria, duna Idea prefeta. Una atelminá mesa, pol sabulugal, tendrie una séri d’atributus (númiru e patas, colol, horma, ec.). Otra mesa tendrá otrus atributus, peru nu ehará de sel tamién una mesa. Tolo que hadi que dambas las dos seyan mesas es lo que Platón idiria sel la Idea e mesa.

La ontulohia de Platón idi antoci qu’argu es ena miia en que palticipa e la idea desi ohetu. Nel chascu la mesa es inrelevanti, peru lo qu’enteresa a Platón son cosas cumu el «sel umanu» u la «hustícia», pol ponel un clusu.

El pobrema que Platón se propón resorvel es la tensión que abia entri Eráclitu i Parménidi: pal primeru, cuantu desisti s’enhalla con contina muación; pal segunderu, a la escontra, la mobición es una ilusión, pos argu que es nu puei ehal de sel lo que es i argu que nu es nu puei sel, asina, nu desisti muación.

Pol sabulugal, lo qué hadi qu'un atelminau arbu seya el mesmu endi el estayu de simienti hata moril i lo qué hadi que él seya tan arbu cumu otru d'otra espéci, con caraiterísticas tan deferentis? Velaquila una muación, tantu del arbu en relación segu mesmu (con el colal el tiempu él creci), cumu del arbu en relación con otru. Pa Eráclitu, el arbu está sempri muandu i enhamás es el mesmu, mentris que pa Parménidi, el arbu enhamás mua, es sempri el mesmu i es una ilusión la su muación.

Platón resuervi esi pobrema cola su Toria las Ideas. Lo que hadi de remanecienti nun ohetu es la Idea, mas prehisaenti, la palticipación desi ohetu na su Idea correspondienti. I la muación aconteci polque esi ohetu nu es una Idea, sinu algotra incompleta reprehentación la Idea desi ohetu. Nel sabulugal el arbu, lo que hadi que él seya el mesmu i seya un arbu i nu algotra cosa, apesal de la su deferéncia daquellu qu'era dequ'era mas nuevu i dotrus arbus d'otras espécis (i mesmaenti e los arbus la mesma espéci) es la su palticipación de la Idea d’Arbu: la su muación s’ebi al hechu de sel una languiosa reprehentación la Idea d’Arbu.

Toria nosiulóhica

Platón tamién labutó en una toria nosiulóhica, u sá, una toria qu’espricotea cúmu se puei conocel las cosas, u tamién una toria la conocéncia. Sigún él, en viendu muhotrus un ohetu a ca ná, una presona s’alcuerda, drentu e ná, de la Idea daquel ohetu que vidu nel mundu las Ideas. Pa espricoteal cúmu pasa estu, Platón hecha manu dun mitu qu’idi que, enantis la nacéncia, el alma e ca presona vivia nuna Estrella ondi s’asiahan las Ideas. Namás naci una presona, la su alma es hundeá pa la Tierra i el guarrachadu hadi que orvii lo que vidu na Estrella. Peru en viendu un ohetu espetalsi e destintas hormas (cumu los deferentis arbus que se puein vel), el alma s’alcuerda la Idea daquel ohetu que hue viu na Estrella. Tal recuerdu, en Platón se huchea ἀνάμνησις.

El concetu la reminicéncia

Una las condicionis pa la envestigación acelca las Ideas es que nu estamus en estau de completa inoráncia sobri ellas. A la escontra, nu tendríamus ni deseu ni puel pa landealas. A lo viu, es una condición nesedária pa tal envestigación que tengamus ena muestra alma anguna espéci de conocéncia u recuerdu del muestru contautu colas Ideas i mos alcuerdamus de las Ideas pol velas reproucias languiosaenti nas cosas. Desti mó i maea, tola céncia platónica es una reminicéncia. La envestigación las Ideas supón que las almans presistun nuna rihión devina ondi contemplaban las Ideas.

Conocéncia

Platón nu precuraba las verdaeras eséncias la horma física cumu hidun los atomistas, sinu que pol enfluéncia socrática precuraba la verdá esencial las cosas. Platón nu pia landeal la eséncia la conocéncia enas cosas, pos estas son corrutibris, u sá, várian, muan, sulhin i se van. Cumu el filusofu eberie landeal la verdá prena, eberie landeala nargu con sostribu, las verdaeras concausas, pos lohicaenti la verdá nu puei varial: si ai una verdá essencial pa los ombris, esta verdá ebi valel pa tolas presonas. Asinque la verdá ebi sel landeá en argu superiol, enas cosas ebi desistil otru hundamentu que vaiga mas pallá lo físicu, estu es, una metafísica. Esti landeu racional es contemplativu i estu senifica que es mestel landeal la verdá en el enteriol el própiu ombri. Con tó i con esu, el própiu ombri nu es namás suhetu palticulal, sinu un palticipanti las verdais esencialis el sel.

Archivu:Academia Platón.JPG

Platón deprendi filusofia. Mosaicu romanu e Pompeya

Platón, lo mesmu que Sócrati, precura descubril las verdais esencialis las cosas. La conocéncia era asín un conocimientu el própiu ombri, peru siempri aseñalandu el ombri nu cumu cuelpu, sinu cumu alma. La conocéncia que contenga nel alma era la eséncia daquellu que desistia nel mundu sensibri, asín en Platón tamién la ténnica i el mundu sensibri eran segundárius. El alma umana eno tocanti a la prefeción, palticipa del mundu prefetu las Ideas, inque esti hormalismu namás seya reconocibri na esperéncia sensibri.

Tamién la conocéncia tinia finis moralis: canteal al ombri pa la bondá i la feliciá. Asina, la horma e conocéncia era una reconocéncia, que hadrie al ombri cael enas verdais que sempri ya poseyia i que lo fruhian a dicelnil mehol dentri las aparéncias de verdais i las verdais. La otención la autuconocéncia era un caminu rúspiru i metoicu. Eno tocanti al mundu material, el ombri puei tenel namás una opinión (δόξα) i ténnica (τέχνη), que premitia la sobrivivéncia el ombri al tiempu e que no tocanti al mundu las Ideas u la verdaera conocéncia filusófica, el ombri puei tenel la verdaera conocéncia u ἐπιστήμη. Platón nu defendia que tolas presonas tuviesin los mesmu acesus a la radón. Apesal de tós tenel el alma prefeta, nu tós chegaban a la contemplación asoluta el mundu las Ideas.

Toria política

Platón preponia un muelu d’estau gobelnau pol filusofus, pos eran los únicus que pol tenel apescá la lus las Ideas, pol conocel la Idea e Bien, sedrien escapás de derihil con retitú al puebru.

La primel vertú era la de la Sabiduria i eberie sel la cabeza el estau, u sá, la gobelnanti pos es la que posei el caraiti d’oru i emprea la radón.

La segundera «espéci» de vertú era el Riañu, pos eberie sel la gasopeta el estau, u sá, los sordaus, pos la su alma e prata está enllena e voluntá.

El trecel héniru vertú es la Tempranza, qu’eberie sel el bandul, u sá, los trebahaoris, pos la su alma e bronci se cantea pal deseu las cosas sensibris.

Concetu d’ombri

El ombri pa Platón estaba deviiu en cuelpu i alma. El cuelpu era la matéria i el alma era la palti imaterial i devina que posei el ombri. Al tiempu qu’el cuelpu sempri está en contina muación de heitiu, horma, ec., el alma nu mua nunca, apaltil el momentu en que se naci abemus el alma prefeta, inque nu sepamus. Las verdais esencialis están escritas en el alma pol sempri, inque en naciendu orviamus, polqu’el cuelpu es la carci el alma.

Platón atarazaba el alma en tres paltis: cabeza (controla las otras dos paltis), gasopeta (es la palti iracibri, la de los sentimientus) i bandul (es la palti concupicibri, la de los premitivus deseus).

Platón asiguraba que el alma dispués de la muerti rencalnaba en otru cuelpu, peru el alma que s’acupaba cola filusofia i con la Idea de Bien, esta era previlehiá pol puel pasal el restu la etelniá en compaña los diosis.

La conocéncia el alma es la que da sintiu a la via. Tó cuantu desisti hue la labutación dun Demiurgu, un devinu artesanu que crió el mundu rial i el su heitiu.

L’ación el ombri se ristrinhi al mundu material; nel mundu las ideas el ombri nu puei hormal naina, polque posei la prefeción nel sintiu latinu la parabra.

Obra

Platón escrebió prencipalmenti pol mé de dialogus —dialética—. La coleción los sus escritus, arreparaus auténticus, son cronulohicaenti:

• 1. Ipias menol.
• 2. Alcibiadi.
• 3. Apolohia e Sócrati.
• 4. Utifrón.
• 5. Critón.
• 6. Ipias mayol.
• 7. Laqui.
• 8. Lisi.
• 9. Cármidi.
• 10. Protágura.
• 11. Górhia.
• 12. Menón.
• 13. Fedón.
• 14. La Furriona.
• 15. Fedru.
• 16. Ion.
• 17. Menésinu.
• 18. Utidemu.
• 19. Crátilu.
• 20. La Repúbrica.
• 21. Parménidi.
• 22. Teetetu.
• 23. Sofista.
• 24. Políticu.
• 25. Filebu.
• 26. Timeu.
• 27. Crítia.
• 28. Leis.

Huerapalti desta retolá d’obras, se conselvan numerosas cartas, de las que namás sieti s’arreparan auténticas.

Tetralohias

Ain dos crasificacionis de patrás de las obras de Platón: la trilóhica, de Aristófani e Bizánciu, i la tetralóhica de Trasilu. Sigún Dióhini Laérciu, las nuevi tetralohias son:

• I. Utrifón, Apolohia e Sócrati, Critón, Fedón.
• II. Crátilu, Teetetu, Sofista, Políticu.
• III. Parménidi, Filebu, La Furriona, Fedru.
• IV. Alcibíadi (primeru i segunderu), Iparcu, Los amantis.
• V. Teahi, Carmidi, Laqui, Lisi.
• VI. Utidemu, Protágura, Górhia, Menón.
• VII. Ipias (mayol i menol), Ion, Menésini.
• VIII. Clitofón, La Repúbrica, Timeu, Crítia.
• IX. Minu, Leis, Epínomi, Sétima carta.

Muchus dialogus nu encluius enas tetralohias de Trasilu cerculun con nombri e Platón, inque huesin arreparaus espúrius enclusu na Antigüeá.