Polígonu Nueva Ciá (Méria)

Polígonu Nueva Ciá

Pais

España

Comuniá Autúnoma

Estremaura

Província

Baahó

Ciá

Méria

Coigu postal

06800

El polígonu Nueva Ciá es el bárriu mas puebrau la ciá e Méria, província e Baahó i capital d'Estremaura (España).

Nesti polígonu resiencial vivin alreol de 20.000 presonas, i las costrucionis varian dendi pisus de proteción oficial i "chalets" en grandis urbaniçacionis, a angunas casas antiguas con corralis, es izil, desisti una gran varieá, i en cuantu al estilu costrutivu, nu se sigui un patrón determinau.

Acesus

"El Polígonu" (cumu sueli sel llamau polos emeritensis) quea deseparau el restu la ciá pol riu Guadiana, asínque los acesus al centru se hazin polas puentis Lusitania i Fernández Casado (normalmenti llamá "Puenti Nueva"), amas de pola puenti romana (siendu esta úrtima peatonal).

Es posibri entral al Polígonu Nueva Ciá diretamenti endi l'autuvia "Mairil-Baahó" i endi l'autuvia Via la Prata (esti barriu es puerta oesti e Méria), i s'alcuentra uñiu meyanti dos callis al polígonu endustrial "El Prado", el mayol núcleu endustrial de la ciá.

Eno qu'a servícius púbricus se refieri, las línias d'autubusis urbanus que pasan polas deferentis parás son la 4 i la 6, que llevan al centru la ciá, i la 5 i 8, cercularis. Desta horma, pasa un autubús ca 15 minutus ena mayol parti las parás.

Costrucionis emportantis

Ebiu a la su gran puebración, nel polígonu "Nueva Ciá" s'alcuentran assitiaus várius los eifícius mas emportantis la ciá, entri los que destacan los siguientis:

Bibliuteca Púbrica el Estau "Jesus Delgado Valhondo": Bibliuteca assitiá frenti a la estación d'Autubusis i huntu al parqui las "7 Sillas", es un eificiu moelnu al que van a estuyal dendi zagalis u chirivehis, a presonas preparandu oposicionis i ancianus pa leyel.
Centru Comercial "El Foro": El centru comercial i d'óciu con mayol acetación entri los emeritensis i abitantis de las puebracionis arrayantis, ebiu en parti a los sus cinis.
Ciá Eportiva: Enas traseras la "Guárdia Cevil", se prevei que chegui a sel unu los centrus eportivus mas emportantis d'Estremaura.
Escuela d'Alministración Púbrica
Estación d'Autubusis de Méria: Estación costruia en ladrillu pola Hunta d'Estremaura assitiá en Avenida de la Libertad, frenti a la Bibliuteca Púbrica el Estau.
Estuyus centralis de Canal Extremadura
Estuyus rehionalis de TVE
Feria de Muestras de Mérida: Antigua navi endustrial reabilitá (las navis de "La Cross", de las que a partil duna se costruyó esti eificiu). S'alcuentra assitiá cerca el Palaciu e Congresus.
Ospital de Méria
Paláciu e Congresus: Assitiau unta el riu i frenti a la puenti Lusitania i la Bibliuteca Púbrica el Estau, es unu los eificius que horman la parti moelna e Méria.
Polieportivu Guadiana: Sé el equipu e baloncestu e Méria, assitiau unta l'Escuela d'Alministración Púbrica.
Escuela e Tráficu la Guárdia Cevil: Lugal nel cuál se preparan los guárdias cevilis pa especializalsi en tráficu.