Tácitu

Dendi Güiquipeya
Sartal a: Güiquipeandu, Landeal
Retratura supuesta Tácitu.

Tácitu [ˈtaθitu] (en latín Publius Cornelius Tacitus Caecina Paetus [ˈpuːblɪʊs kɔrˈneːlɪʊs ˈtakɪtʊs kaeˈkiːna ˈpaetʊs]) hue un políticu, hablaol i estoriaol romanu los sigrus I i II.

Via[eital | edit source]

Las enteracionis tocantis a la su via son escassas, quasi toas mentás entri los sus própius escritus i sacás de la correspondéncia con Plíniu el Nuevu. Angunas huentis epigráficas tamién lo mientan.

Pol cognomen Caecina se l’á atijau a la família los Cecina pol parti mairi. Su pairi quiziá huera l'otru Cornéliu Tácitu al que se refieri Plíniu el Vieju[1], varón del ordin eqüestri d’antipassaus celtas. Tácitu iju tuvu nacéncia, con mucha probaliá, en Vasio (ogañu Vaison la Romaine, ena Galia Narbonensis, entri los añus 55 i 58 ed. C., dalcuerdu conos endirgus duna carta[2]. Otrus autoris din que Tácitu sedria galu, pero de mas al norti, de pa la Galia Belgica.

Pol mé los emperaoris, Tácitu hacinó un balagueru títulus, comu el mesmu assigura[3], hiziéndusi conas primeras diniais a los deziochu añus. Nel añu 77, Tácitu se convoó cona ija Júliu Agrícola, miembru esti de família senatorial. Estus agarris le facilitarun que densiguia huera trebunu melital nuna las quatru legionis el ejélcitu el su suegru entri los añus 77 i 79. Al amén desti selvíciu, aballó a Roma andi hue ordenau qüestol nel 81, quiziá pol favol el emperaol Titu.

Quatru añus endispués sedria edil u trebunu la plebi, cargu suficienti pa puel consiguil la pretura nel 88, añu en que tamién se hizu con un puestu saceldotal, huendu XVuir sacris faciundis[4]. Entri el 89 i el 93 estuvu nel gubiernu provincial, comu legau u procónsuli, en Asia i Achaia.

De que murió Domicianu i Nerva le suceyó, Tácito aballó pa Roma otra vezi andi acontinó la su carrera política. Comu el cónsuli junta Nerva nel 97, Vergíniu Rufu, enfeneció duna malotia a la pielna, Tácitu hizu de consul suffectus u designatus. Embaju essi onol prenunció la laudatio funebris que Plíniu mienta enas cartas[5].

Entri los añus 97 i 102 Tácitu anduvu nel chascu contra Máriu Priscu, junta el su amigu Plíniu el Nuevu, añus estus de fecunda ativia literária. Mas tardinu, abaldona Roma i ahila pa la Germania comu legatus Augusti pro praetore i, de que regressa otra vezi a la capital, s’enlia a escrebil las sus Historiae.

Pal añu 112 es procónsuli en Asia i quiziá llegara a conocel añus dispués la sucesión de Adrianu, anque no es mu siguru. La fecha la su muerti s’inora.

Obra[eital | edit source]

Tácitu, comu muchus los estoriaoris la Antigüeá, escrebió estórias pol bel participau de la via política i bel estau presenteru nel polvinil el Estau. No estanti, Tácitu no aspera al momentu la su jubilación pa escrebil, pos de que mueri Domicianu i con el el regimin aginanti i recarcanti los Fláviu, Tácitu escrebi i pubrica unas sérii obrinas, denominás opuscula u opera minora, en oposición a la sus grandis obras estoriográficas.

  • De uita Iulii Agricolae. Es un tratainu biográficu sobri el su suegru, enque se entrimesturan un haci génirus literárius i temáticus comu la alabáncia fúnebri, la descrición geográfica i de puebrus i la monografia. Gastó las parabras el cabiceru i el caberu l’obra pa propaganda política de crítica contra Domicianu. Nel se cuenta la labol Agrícola enas tierras la Britannia. L’obra la espubricó pa úrtimus el añu 97.
  • De origine et situ Germanorum. Tamién es mas conocia comu la Germania. Apaici entri el añu 98 i 99. Es un tratau de caraiti enológicu i geográficu. L’obra s’estrutura en dos grandis partis, una que es una descrición general tocanti al sítiu, arrayus, costumbris los gelmanus i la otra una bicha mas hundeá a tentu las tribus gelmanas. Nella s’espón unu los pensamientus freqüentis ena epoca i que dende Séneca afroreci en quandu en ves enas obras literárias los primerus sigrus el Empériu, que es el conceutu el ombri braviu comu ejempru costumbris puras i no corrutas a la contra lo que dessisti en Roma.
  • Dialogus de oratoribus. Es un diálogu de caraiti ciceronianu, cuya entiá pon en dua l’autoria i cronologia, anque angañu se crei —polo general— sel tacitea pol mó el estilu. Nessas letras Tácitu espressa la situación que dessisti eno tocanti a la retólica. La caraba aconteci en cá Curiáciu Maternu, quien hartu la via comu hablaol, quiel eicalsi mas al escrebieru obras trágicas comu el Cato. Palramentan al tentu el própiu Curiáciu, Marcu Apru i Júliu Segundu. Secundariamenti apaici Vistanu Messala. Carabean fronterus Curiáciu i Apru, estuviendu el primeru dalcuerdu con que la hablatorias está emputecia i Apru, a la contra, con que á volucionau i es nesseçáriu adautalsi a los nuevus tiempus.
Portá una eición 1598.


La su obra estoriográfica mayol —opera maiora— apaici dies añus mas tardi, entri los añus 104-110. Son dos grandis obras qu’albarcan mas dun sigru acontecimientus políticus i que la tradición quasi siempri a trasmitiu dambas a dos juntas.

  • Historiae. Las espubricó nel 110 i son un relatu el periodu rezienti el Empériu. Albarcan dende la caia el regimin Nerón (dende el 69) hata la muerti el úrtimu los Fláviu, Domicianu. Es la continación de lo que el cámbeu sistema supusu dende que Júliu Cesa consiguiera tolos pueris.
  • Annales. El nombri vien dau pol métodu que sigui, espurechu al hechu polos antíguus cronistas i estoriaroris que cuentaban en añu en añu. Los Annales relatan i revacan sobri los añus la dinastia Júliu-Cláudia. La su estrutura era en tres éssadas (en seis en seis librus), anque no tolas éssadas se conselva pol enteru. La éssada primera, que trata sobri Tibériu se conselva quasique entera, desquitandu cachus el libru V i el VI. Lo tocanti a Calígula s’escambajó la huerça dellu. Los periodus Cláudiu i Nerón se hallan con emportantis lagunas.

Abreviaturas[eital | edit source]

Tácitu, dalcuerdu con el catálogu el dicionáriu Oxford tien l’abreviatura Tac. (Tác.). Sus obras s’abrevian assina:

  • De uita Iulii Agricolae: Ag.
  • Germania: Ger.
  • Dialogus de oratoribus: Dial.
  • Historiae: Hist.
  • Annales: Ann.

Referéncias[eital | edit source]

  1. Nat., VII 76.
  2. Plin., Ep., VII 20.
  3. Hist., I 1, 3)
  4. An., XI 11
  5. Ep., II 1, 6.

Bibliografia[eital | edit source]

  • VV. AA., Historia de la literatura latina, Mairil, Cátedra, 1997.
  • VV., Oxford Latin Dictionary, Oxford, Clarendon Press, 1968.
  • Tácito, Anales, entrod. i trad. J. L. Moralejo, Mairil, Gredos, 1982.
  • P. Cornelio Tácito, Anales, ed. B. Antón Martínez, Mairil, Akal, 2007.