Quintilianu

Dendi Güiquipeya
Quintiliano
Enhormación pressonal
Nombre en latín Marcus Fabius Quintilianus Ver y modificar los datos en Wikidata
Nacencia c. 35 Ver y modificar los datos en Wikidata
Calahorra (España) o Calagurris (Antigua Roma) Ver y modificar los datos en Wikidata
Muerti c. 96 Ver y modificar los datos en Wikidata
Roma (Empériu romanu) Ver y modificar los datos en Wikidata
Enhormación profissional
Oficiu Pedagogo, retórico, poeta, avogau, profesor y escrevienti Ver y modificar los datos en Wikidata
Estudiantes Tácitu y Juvenal Ver y modificar los datos en Wikidata
Estauta Quintilianu en Calahorra.

Quintilianu [kɪn̪tiˈljanu] (en latín Marcus Fabius Quintilianus, [ˈmaɾkʊs ˈfabɪʊs kwɪntɪlɪˈaːnʊs]) hue un avogau, maestru i escrebiol romanu el sigru I.

Via[Edital | Editá'l códigu]

Quintilianu tuvu nacéncia en Hispania, sigún las huentis[1] concretamenti en Calagurris (ogañu Calahorra), pal 30 e. C. Quiziá su pairi huera otru Quintilianu —Quintilianus senex—, que Séneca el Mayol mienta ena su obra[2].

Los primerus endirgus los recebió en Hispania, anque, comu s’estilaba naquellus tiempus, los estuyus superioris se hazian nangunus los prencipalis centrus curturalis el Empériu, de mó qu’aballó pa Roma. Allí tuvu comu endirgaol a unu los maestrus el satíricu Pérsiu, Rémiu Palemón. Con él deprendió gramática. Las ensiñáncias hablatórias las deprendió de Domíciu Afru. Ena su obra recuerda de quandu nuevu tinia socieá con Pompóniu i Séneca pa Roma[3].

De que s’ensiñó a las letras i a la oratória, gorvió pa Hispania, andi premaneció hata que Galba, de que consiguió el prencipau, nel añu 68, le pegó el escarpiu paque acuyera a Roma otra vezi. Los desotrus venti añus los eicó al deprendieru la retólica[4]. La fama las sus ensiñáncias le facilitó que montara una escuela retólica que hue paga pola Hazienda i andi deprendió a inlustris jóvin la socieá la epoca, comu Plíniu el Nuevu i a lo mijol Tácitu. Quandu Domicianu se hizu cargu el deprendizagi los ñetus la su gelmana[5] i la su nombreria le hizu ganal los ornamenta consularia. La sus própias obras cerculaban sin premissu, sigún el mesmu dis[6].

Tuvu una família, anque la su mujel murió pocu dispués de bel alumbrau a los sus ijus, quandu tinia venti añus. Los dos ijus tamién espenarun al cabu.

Quintilianu murió probabrimenti pal 100 d. C., momentu nel que la enteracionis sobri él son enteosas i escassas.

Obra[Edital | Editá'l códigu]

Quintilianu hue un notabri, críticu i teóricu maestru hablatória. Compusu angunus desculsus cuyus paí mas dunu llegó a espubrical. Se conselvan muchus testus decramativus, crassificaus pol Declamationes minores i Declamationes maiores. Anque polo que Quintilianu passó a la posteriá hue pola su obra vejés, la Institutio oratoria. Esta obra la compusu de que s’arretiró de la via comu docenti, pocu enantis de enfenecel, entri los añus 93 i 96, añu esti la muerti Domicianu.

La Institutio oratoria[Edital | Editá'l códigu]

L’obra se compón de dozi amprius librus, cuyu ojetivu prencipal es sel un tratau retólicu. La concausa de la que nació esta obra hue la malotia general i la situación decayenti i coquerosa las letras latinas dende el puntu vista crassicista. Los autoris latinus tinian guipau que, veloilus, se tinian desapartau de la nolma crássica pola volución natural la luenga i el pensaeru, de mois que muchus críticus i teóricus afrorecierun pal sigru I. Nel andal la retólica, Séneca el Mayol criticó el estilu ciceronianu i las sus premissas al tentu la hablatória. Aluspués, Quintilianu desenrevrujó ena Instituto oratoria un analís al tentu la situación contemporana l’oratória i cómu hazel pa corrigil los vícius en que se bian cayiu. Él mesmu, nel prólogu la obra, espón el esquema continius el tratau[7]. El primel libru, dis, contendrá una relación sobri las cosas prévias al ofíciu hablaol; el segundu las custionis básicas enas que trebajará el hablaol; los sotrus nuevi librus sedrán pal tratamientu las partis hundamentalis, veloí pa la inuentio-dispositio pun lau i elocutio-memoria-pronuntatio pol otru.

La Institutio Oratoria, ei. del sigru XV.

El puntu del que arranca Quintilianu es que pa sel un güen hablaol no sobra con palral bien: lo essencial pa llegal a sel un güen oraol es sel un uir bonus, nel sintiu moral i social…[8]:

Oratorem autem instituimus illum perfectum, qui esse nisi uir bonus non potest... Ara, consieramus hablaol perfetu al que, comu non seya un ombri güenu, non puei sellu…
'

Quintilianu arrepara en que Cicerón tien que sel consierau comu el muelu básicu del que el alunu retólica tien que escomençal. Los exempla pal deprendieru desta arti los gasta de Cicerón.

Del mesmu mó que es un uir bonus tamién á de sel una orator sapiens, estu es, que no palranguei, sino que habli con conocimientu[9]. Desti jeitu, es capás que el hablaol, pol mé dun desculsu deliberativu, demuestri el su conocieru al tentu duna custión de mó que puea ayual al güen desarrollu el Estau.

Quintilianu apela a la predisposición el alunu al deprendieru, pos sedrá escapás de llegal a hazel güenas decramacionis aquel zagal que quiel i tien la naturaleza pa ellu. Pol mé los progymnasmata u ejelcícius retólicus los alunus alquierin cona plática el suficienti nivel comu pa decramal i no, a la contra de lo que acontecia en su tiempu, que salian meyu hablaoris los alunus que sin platical enantis salian a la praça a engatusal a las gentis cona bambolla el su palrangueu.

El de Calagurris marra en acontinal con un muelu imitativu la hablatória, pol vezi adatalsi a los sus tiempus i a la volución natural el latín.

Abreviaturas[Edital | Editá'l códigu]

Dalcuerdu con el dicionáriu Oxford, esti autol tien la abreviatura Quint. Las sus obras s’abrevian Decl. (= Declamationes) i Inst. (= Institutio oratoria).

Referéncias[Edital | Editá'l códigu]

  1. Ausóniu XVI 2, 7.
  2. Con. X 2 i 4.
  3. Inst. VIII 3 31.
  4. Idem, I pr. 1.
  5. Idem, IV pr. 2.
  6. Idem, I praef. 7-8
  7. Ibidem 21-23.
  8. Ibidem 9.
  9. Ibidem, 18.

Bibliografia[Edital | Editá'l códigu]

  • VV. AA., Historia de la literatura latina, Mairil, Cátedra, 1997.
  • Winterbottom, M., M. Fabi Quintiliani Institutionis Oratoriae Libri Duodecim, 1970.

Declamationes Minores, 1984.

  • VV., Oxford Latin Dictionary, Oxford, Clarendon Press, 1968.