Tomás Chiscano Andújar
| Tomás Chiscano Andújar | ||
|---|---|---|
| Enhormación pressonal | ||
| Nacencia | 1938 | |
| Nacionalidá | Española | |
| Enhormación profissional | ||
| Oficiu | Escrevienti | |
Tomás Chiscano Andújar (1938), maestruscuela i escrebiol serón.
Biografía
[Edital | Editá'l códigu]Tomás tuvu nacencia en Villanueva la Serena. Trebahó de maestruscuela. Hueraparti la su labutación docenti, tien escritu en várius periódicus rehionalis i revistas. Está hubilau, anque acontina escrebiendu. Tamién es hundaol el coletivu Villanueva Porticvs.
Amás espubricó un parabreru castú entitulau Vocabulario serón, andi s’arrecohin vozis cumu jarca, sandunga, candongo, ajunque u jariego. Amás enclui angunas las parabras ténicas pretenecientis a la herga las artis gráficas u un apendis con locucionis i frasis hechas.
Obra
[Edital | Editá'l códigu]Esti autol serón tien escritas várias obras, angunas inéditas, lo mesmu de velsu qu’en prosa. Espubricaus tien dos librus puemas, veloquilus estus:
- Todavía.
- Borbotones de ensueños.
Premius i reconocencias
[Edital | Editá'l códigu]Cumu escrebiol tien ganau angunus prémius tamién, tantu en Estremaura cumu huera della. Son veloquí estus:
- Primel prémiu "Lecturas" con La plaza de San Cristóbal (narración) en 1975, Barcelona.
- Primel prémiu en tema local nel "II certamen literario Santiago y Santa Ana" con Si alguna vez (puema) tamién nel 1975, en Villanueva la Serena.
- Primel prémiu enos "VII Juegos Florales de la Poesía ‘AGLA’" i prémiu "Rafael Gómez Castell" con Floreció (puema) en 1987, Montihu.
- Finalista enos I, III i IV "Premios Antonio García-Oriozabala" qu’olganiza el diáriu HOY enos añus 1981, 1983 i 1984 al respetivi.
Bibliografia
[Edital | Editá'l códigu]- Tomás Chiscano Andújar, Vocabulario serón, Carisma libros, Badahós, 2007.
- Tomás Chiscano Andújar, Borbotones de ensueño, Beturia, Mairil.