Valdelacalçá
Dendi Güiquipeya
|
Valdelacalçá |
|||
|---|---|---|---|
|
|||
 |
|||
| Nombri oficial | {{{nombri_oficial}}} | ||
| País |  España |
||
| Comuniá Autónoma | Estremaura | ||
| Província | Baajós | ||
| Província | Baajós | ||
| Comarca | {{{Comarca}}} | ||
| Ciá | {{{monicípiu}}} | ||
| Coigu postal | 06185 | ||
| Supifícii | 32, 4 km² | ||
| Artitú | 185 msnm. | ||
| Longol | 30 km a Baajós | ||
| Puebración | 2.737 ab. (2008) | ||
| Gentilíciu | Valviensi, Vareñu | ||
| Rius | Guadiana, La Cabrilla, Valdelobos | ||
| Página web | www.valdelacalzada.es | ||
| {{{asiahamientu}}} | |||
La villa de Valdelacalçá, IPA [valdelakalˈθɑː], (en castellanu i oficialmenti Valdelacalzada) s'alcuentra ena província Baajós, Estremaura (España), en mé la antígua calçá romana qu'uñia Méria con Lisboa. Costitui unu los prencipalis núclius urbanus las Vegas Bajas Guadiana.
Continius |
[eital] Estória
Enas tierras espropiás de las grandis fincas La Vara[1] i El Condado de Torrefresno escomiençó la estória de Valdelacalçá. Estas dos fincas son los ecus de los pequeñus núclius puebración romana que datan d’epoca bajumperial, uillæ de las que s’án hallau numerosus restus en tol télminu monicipal i de los que tamién albondan en ambas málgin Guadiana comu son las de Torreáguila Montiju u El Pesquero Puebrunuevu Guadiana.
La zona ena que s'asiaja angañu la villa Valdelacalçá hue bandeá pola uia que acolleraba Emerita Augusta cona costa lusitana. La celcania el riu que, sigún las estimacionis, alreol los sigrus II-III d. C. colaba pola atual Puebra la Carçá, i la preséncia desta emportanti via comunicación dio lugal a qu’afrorecieran múrtipris uillæ pola comarca dende Emerita hata l'atual Portugal siguiendu el culsu el riu.
Valdelacalçá tuvu nacéncia n'Otubri el añu 1948[1], comu primel frutu urbanu la Rehorma Agrária i el Pran Badahó enas tierras las Vegas Bajas Guadiana a la pal que Valdívia lo hue enas Altas. Sedria el proyeutu pilotu dentri una larga sérii puebrus que compondrian la huerça puebracionis ena comarca las Vegas Bajas. Tras él esmençarun Guadiana, Alcaçaba, Puebrunuevu Guadiana, Novelda Guadiana, Sagrajas, Gévora, Valdebótua, Villafrancu Guadiana, Balboa, Alvarau, Guadajira, Lácara i Barbañu. Se lijió comu lugal puebración un terrenu chanu, a escasus 3 km de longol del riu Guadiana, entri los arroyus Cabrillas i Valdelobus.
El primel asentamientu colonus hue enos barraconis, un puebrau provisional dispuestu en simetria a mó de campamentu melital, andi los primerus vareñus proceentis d'Estremaura —prencipalmenti de la província pacensi dotras zonas d'España hizun la su via hata la entriega casas.
La primel fasi la costrución el puebru aconteció entri 1949 i 1951, encluyendu un total de 100 viviendas i el centru cévicu. Ena segunda fasi (1952-55) se costruyerun un total de 213 viviendas, los eifícius púbricus i el I. N. C. i ena tercel fasi (1954-60) s’alevantun 100 viviendas d'obreru i las casas aislás.
N'esti periodu holmación el puebru, el general Franco lo vesitó pol tres vezis, destacandu la vesita d’Otubri el 1956 ena que s’inaguró oficialmenti el Pran Bajós.
Una décaa dispués, en 1969, el antuenci préncipi Juan Carlos vesitó tamién el lugal.
En 1957 se hundó la primel cuperativa agrícula el puebru, la "Cooperativa Nuestra Señora de los Remedios", que mas tardinu se llamaria "Cooperativa Agrícola de los Colonos de Valdelacalzada", resurtandu la cuperativa dagora "Caval". En 1996 la Revista de información técnica y económica le da el nombri de «la cooperativa líder en Extremadura». Angañu es el motol económicu la localiá.
Tras el enolmi campeu qu’arcançó la localiá entri los añus 80 i prencípius de los 90, el dia 27 d’Abril de 1993 Valdelacalçá alquieri el títulu Monicípiu, independizándusi assín del ayuntamientu Bajós.
[eital] Economia
La economia la villa es sobritó agropecuária. Nu estanti, angañu, tras la venta numerosu ganau -prencipalmenti bovinu i ovinu-, la plática totaliá los valviensis s'eican al cautivu el campu.
El cautivu prencipal es el del frutal -cirgüelus, natarinus, maracotonerus i peralis-. De Valdelacalçá s'esporta a lugaris de toa Uropa las destintas variais de cirgüela, natarina i maracotón, huendu huenti engressus la localiá. Tamién se manufaturan frutas proceentis d'Andaluzia.
Otrus cautivus reguédiu son los del tomati, el maís i en minol miia el melón i la sandia. Cautivus d'ibielnu son las brócolis i las cebollas.
Agañu está en prohessu desarrollu un polígonu ena zona sul el puebru que cuenta ya con numerosas navis eicás al setol el automobi, la eletriciá, la costrución i, prencipalmenti, la fruta (cuperativas, frábica yoguris, ec.)
[eital] Lugaris d'enterés
[eital] Centru cívicu
El centru cívicu está compuestu pola Plaza de España alreol la qual se disponin otras praças minoris cumu la del Mercado i la de San José. El destraci hue obra el arquitetu José Borobio. Ena Plaza de España s’alevantarun, hunta el ayuntamientu i la elésia, la casa el meicu, las casas maestrus, la tahona i la primel tabelna el puebru. Estus eifícius s’alcuentran compuestus pol pórticus d’arcus de meyu puntu holmandu galerias con un regustu meyeval a las praças de tipu quadrangulal porticás. Pórticus autaus ain ansimesmu en Balboa, Guadiana i Alcaçaba.
Los prencipalis eifícius son el Ayuntamientu, la Elésia i la Casa la Curtura. Tantu'l Ayuntamientu cumu la Elésia pretenecin a la primel fasi costrución el puebru, mentris que la casa la curtura es de criación muelna.
- Ayuntamientu
El ayuntamientu costitui el muelu arquitetónicu qu'aberia de siguilsi enos demás puebrus colonización, destacandu ena su fachá los arcus de meyu puntu i la preséncia la estauta llamá El colonu en recuerdu los primerus pobraoris el lugal. A meyaus de 2009 empençarun unas obras pa remuelnizal i amprial to el eifíciu consistorial, conservandu la su fachá lantera[2].
- Elésia
La elésia, qu'alcibi el nombri de Sagrá Família, quea canteá la su fachá pa la del ayuntamientu, al estremu sul la praça. Sobresal el granitu en que s’enmarca la puerta assín cumu la torri el campanáriu que flanquea la elésia a la gocha ciscalá ena parti bajera pun meyurrelievi de San Isiru. Nel su interiol sobresal la cúpula el artal mayol, una bóvea ohival de 7,5 × 7,5 m sin zimbra, obra d’arbañileria talaverana. Nel su interiol descansa sobri una hornazina l'imagin la Vilgin Mairi, en onol a la quala se celebran las fiestas d'Otubri.
- Casa la Cultura
La Casa la Cultura hue inagurá el 7 Hebreru el 1996 pol anteriol presienti la Junta Estremaura, Juan Carlos Rodríguez Ibarra. La primitiva biblioteca s'enhallaba ena Seición Feminina el Frenti Joventuis, ena Ronda Saliente. No sedria hata meyaus la passá décaa quandu pol contribución la Junta, s’esmençaran las obras pal atual eifíciu. Las recientis reholmas d’engrandamientu acabijarun cona antígua casa meicu premitiendu gozal duna biblioteca mas ámpria i un salón d’autus mas despaciosu.
[eital] Los pinotis, abrevaerus i huentis
Son los restus que quean del pasau ganaeru la localiá. Hechus del granitu de la comarca la Serena, maestrus de Quintana i Santa Marta laborearun esta piera pa dal horma a los múrtipris elimentus qu'aciscalan las prencipalis callis i praças de Valdelacarçá.
Son de tres tipus, pinotis (aspéci chitus, la mayorias agora sirvin pa ahital las parcelas u andan tiraus nel riu), abrevaerus (angunus en bastanti mal estau, carentis de áugua) i huentis. Los prencipalis s'asiahan ena Plaza de España, del Mercado, de San José, de los Industriales, calli La Luna, Montijo, Ronda Norte i Poniente.
[eital] Cortijus
Los cortijus son los mas crarus testimoñus de los origin el puebru.
Junta la localiá, se halla el que le da nombri a los abitantis el puebru, el cortiju La Vara. La Vara albarcaba las antíguas hesas de Metidos de la Vara i Satisfolla de Hoces. De la espropiación las sus tierras nació Valdelacalçá cumu núcliu urbanu. Atualmenti, reholmau ena su estrutura interiol cumu salón de voas, el nuevu cortiju La Vara conselva sus espetacularis jardinis grácias a los qualis alcibi tamién nombri de El Cortiju Bonitu, i tamién una pulia capilla. Enfrontilá a esta, se enhalla una escrición lapidária latina.
Unus poquinus quilometrus direción oesti s'encuentran pol esti ordin los cortijus de: La Rueda Grande, la Rueda Chica i Sarteneja la Chica. Siguiendu la mesma tipologia, destaca el de la Rueda Grande qu'igualmenti conselva los sus jardinis i la su capilla.
Ahuera el télminu monicipal s’enhalla el Condado de Torrefresno. A mó de fortaleza, en Torrefresno s'alevanta una linda torri, visibri dende la carretera qu’uñi Montiju con Bajós (C-537), dos pequeñus torreonis nel su estremu sul con el escú el condalgu i várius framentus el antígu muru que lo arroeaba.
[eital] L'alamea
L'alamea, atualmenti quea namás que la del riu, pus la que arroeaba la localiá hue talá. La finaliá de l'alamea u bosqueti era la de protegel de los vientus el caseriu valviensi assín comu tamién de proporcional terrenu eificabri. Ya qu'el puebru diba creciendu ena su vertienti oesti -ondi s'asiajaba l'antígua alamea-, esta hue ceyendu terrenu hata escambajalsi del tó. La composición l'alamea el puebru era sobritó ucalitus, acipressis, moreras i choperas. A lo largu desta alamea deshilaban parti los monolitus que holmaban el uia crucis, lamentabrimenti tamién perdius. Namás se conselvan angañu hincaus unus pocus acipressis ena parti sul.
L'alamea el riu lo costitui la repuebración arbus no autótonus de la malgin de Guadiana correspondienti al télminu Valdelacarçá. La vegetación típica de gamassonis, tamuja, tabua, juncus, çarzas, lloronis i áramus hue suprantándusi a poquinu a pocu cola prantación de ucalitus foriatus i chopus. La venta las tierras que cogin la alamea el riu a las empresas de grava á prevocau que enos úrtimus añus un artíssimu polcentagi la masa forestal huera talá pala escavación de hoyas d'estración de piera, s'escambajaran las numerosas charcas naturalis i la morfologia la orilla el riu esprimentassi una deholmación emportanti.
Angañu, cona costrución duna acampá, duna orilla pesca ena zona denominá "La Barca", assín comu el acondicinamientu de la Charca el Infierno se está homentandu el númiru las ativiais nel riu, cumu la pesca, romerias i acampás.
[eital] Fiestas
Las prencipalis fiestas Valdelacalçá [3] son:
- San Isiru (15 Mayu)
Hata hazi escassamenti un pal d'añus, esta fiesta se celebraba cumu féria. Atualmenti la fiesta cobra el su antígu sintiu romeru, hiziéndusi los festejus con cantis i bailis tradicionalis, caldereta i juegus ena nueva acampá.
- El dia la Independéncia u dia la Tortilla (27 Abril)
Comu conmemoración la independéncia Valdelacalçá al respetivi de Bajós, ca 27 Abril se celebra ena praça el dia la Tortilla. Nella, tras el disculsu el siñu Alcardi, se realiza una furriona cona comia (tortillas i ibéricus) qu'aportan los vizinus el puebru.
- El Pilal u fiestas la Vilgin Mairi (12 Otubri)
Son las fiestas mas sonás del puebru. Se celebran en onol a la Vilgin Mairi con una féria. Vizinus de tolos puebrus de la zona s'acelcan a vel u correl las popularis vaquillas.
- Valdelacarçá en frol (primel quinzena Marçu)
No es propiamenti una festiviá, pero rezientimenti, con motivu la froración los arbus frutalis, el Ayuntamientu junta la Univelsiá Populal de Valdelacalçá olganiza rutas i ativiais camperas pa homental el turismu ena localiá. La colocación nel 2007 de dos miraoris, unu nel campu tiru i otru ena elésia-capilla de El Pajarito, á premitiu que genti de tolos lugaris la región qu'acuia a vel el espetáculu primaveral puyera almiral las etárias i etárias de rosa i brancu dende cierta artura.
- Festiviais de Semana Santa i Naviá
[eital] Referéncias
- ↑ 1.0 1.1 Diputación de Badajoz: Historia de Valdelacalzada
- ↑ Hoy.es: El edificio consistorial se somete a una profunda reforma.
- ↑ Diputación de Badajoz: Fiestas y tradiciones
[eital] Bibliografia
Traver Vera, Á. J., Historia cotidiana de Valdelacalzada, Bajós, 1998.
[eital] Guipa tamién
[eital] Atijus
| Comarca Tierra Baajós | |
|---|---|
|
Monicípius: Abuquerqui · L'Albuera · Baajós · Guadiana · La Coosera · Puebrunuevu Guadiana · San Vicenti Alcántara · Talavera la Real · Valdelacarçá · Villal el Rei Peanias: Alcaçaba · Alvarau · Balboa · Gévora · Novelda Guadiana · Sagrajas · Valdebótua · Villafrancu Guadiana. |
|
