Barbañu

El nombri de Barbañu vien del nombri la dehesa que se destendía al salienti dela de Torre-Águila: la dehesa de Barbañu. El nombri de Barbañu es escuru i entovía ai una espricación etimológica atiná. Partiendu de cortis destinaus dela palabra, lo án atijau con raízis prerromanas o mesmu del ebreu^[1]. Angunus autoris vein en dichu topónimu una relación direta con el del Barbaña gallegu^[2]. Otras teorías apuntan a una etimología latina, sostribá en un derivau morfológicu de *BARBĀNA → *Barbānĕum^[3], lo qual está relacionau con otrus varius topónimus de dehesas i fincas segunderas comu La Floriana o La Cuvillana.

Sitiu

Esti puebrinu está assitiau a 5,5 km de Montiju, cerca de La Puebla de la Calçá i Lobón, a renti del ríu Guadiana. Perteneci ala comarca de Tierra de Méria – Vegas Baxas, ala comarca natural de El Lácara i al partíu judicial de Montiju.

Estoria

Barbañu se inaguró comu puebru de colonización el 6 d'otubri de 1956, frutu del Pran Badajós. Los colonus huerun prencipalmenti delas localidais vezinas, assín comu d'otrus puebrus estremeñus comu Chelis, Berlanga o Las Casas de Reina.

Menumentus

Ermita de Nuestra Señora de Barbañu

Despunta la ermita de Nuestra Señora de Barbañu, santuariu del sigru XV o XVI. Esti edificiu lo alevantarun cerca dandi atoparun l'imagin la virgin, lugal esti que conocin por Los Pareones.

Igresia parroquial

La igresia'l puebru es la parroquia de Nuestra Señora de Barbaño, que perteneci a la Archidiócesi de Méria-Badajós^[4].

Villa romana de Torre-Águila

Diendu pola carretera que uni Barbañu cola carretera nacional direción Lobón se encuentran las ruinas delo que hue una enormi villa romana de metá del sigru I i que siguió enfuncionandu ata el sigru VII comu villa visigoda. Se la conoci pol nombri de Villa de Torre-Águila. S'encuentra a 189 m i a unus 300 m del ríu Guadiana, ena parti norti del Charcu Las Casitas. La hallaúra d'esta villa aconteció en 1984 i se crei que púu bel teníu una puebracion de 500-700 pressonas al julgal pol númiru d'esqueletus atopaus en el yacimientu. Ogañu el sitiu arquiológicu está dispuestu palas vesitas, puyendu-si vel muchas dependencias comu los bañus, cubicula, peristilus, lagaris i la estrordinaria i bien conservá sala estival con partilús. S'está al tentu de nuevas escavacionis que saquin ala lus la parti dela necrópoli.

Fiestas

San Isidru. 15 de Mayu: Es la fiesta mas soná. Hazin una romería ata Guadiana, celebrandu-si ena alamea. Ain concursus de carrus i cavallus. Es una muestra dela cultura populal dela zona. Antigüamenti, los romerus se derigían dendi La Puebla i Montiju pol caminu Barbañu.
Fiesta del emigranti. Se celebra el primel fin-de-semana d'agostu i cuenta con una tradición de más de 25 añus.
Festival Romano de Barbaño: Con motivu del rescati i puesta en valol del conjuntu arquiológicu dela Villa de Torre-Águila, Barbañu vien celebrandu endi'l 2011 un festival romanu, con estalachis, ecenificacionis i vesitas ala villa.
Carnavalis.
Semana Santa i Corpus Christi.
Navidá.

Referencias

↑ VV. AA., Onomástica (antropónimos y topónimos de la zona de Montijo): Méria, 1988
↑ Castaño Fernández, A. M., Los nombres de Extremadura, Editora Regional de Extremadura: Méria, 2004.
↑ Carmona García, I., Toponimia de Las Vegas Bajas del Guadiana (inédit.)
↑ Lista parróquias la Diócesi Méria-Baajós https://web.archive.org/web/20100923123325/http://www3.archimeridabadajoz.org/index.php?option=com_content&task=view&id=22&Itemid=55&limit=1&limitstart=1

Atijus

[1] VV. AA., Onomástica (antropónimos y topónimos de la zona de Montijo): Méria, 1988

[2] Castaño Fernández, A. M., Los nombres de Extremadura, Editora Regional de Extremadura: Méria, 2004.

[3] Carmona García, I., Toponimia de Las Vegas Bajas del Guadiana (inédit.)

[4] Lista parróquias la Diócesi Méria-Baajós https://web.archive.org/web/20100923123325/http://www3.archimeridabadajoz.org/index.php?option=com_content&task=view&id=22&Itemid=55&limit=1&limitstart=1

[1]

[2]

[3]

[4]