Conventu San Diegu d'Alcalá

Conventu San Diegu d'Alcalá
	; Vista Conventu San Diegu.
Tipu	convento de frailes franciscanos
Sitación	Huentis de León (España)
Coordenadas	38°04′00″N 6°32′47″O / 38.066711961416, -6.5464166298501
Costrucción	1613
	[editar datos en Wikidata]

Conventu San Diegu d'Alcalá es un antigu conventu franciscanu del siegru XVI, trashormau ugañu en otel i qu'está assitiau en Huentis de León al sul d'Estremaúra.

Ambienti

El conventu San Diegu d'Alcalá de Huentis de León está assitiau ena hesa estremeña, arroeau d'una semejanti fauna i frora aondi vivi el guarru ibéricu de bellota i amás aondi está el Menumentu Natural delas Cuevas. Está ena Comarca de Tentudía, con sitius al reol tan estrordinarius comu las ilesias de Huenti Cantus i Bienvenía, assína comu la Praça Torus de Cabeça la Vaca i los Castillus de Segura de León i Montemolín. Sobri'l mes de juñu, tamién se celebra en Huentis de León la festividá del Corpus Christi, aondi los dançantis acorrin las callis del puebru dançandu, sobritó ena prossecion del día del Corpus i del domingu adispués, mentau comu'l domingu dela otava.^[1]

Arroeau d'estoria i naturaleza, esti antigu conventu franciscanu del siegru XVI, es un sitiu previlegiau pa desenganchal i desfrutal delas maravillas qu'el lugal brinda. Las sus abitanças d'inseñu se mesturan conos sillaris visigóticus i frescus qu'enrecuerdan la quietú d'antañu.^[2] Un sitiu mu cumpríu nel que paeci estal hormandu una parti dela estoria. Ena antigua ilesia, ai un lugal apreparau con assientus aondi relaxal-si i concentral-si. Subiendu ala zona delos cassullus, aondi ugañu están las abitanças, se puen vel unus lindus frescus conservaus enas sus entrás. Amás i por avel síu un otel, tieni una pecina moerna, con unas vistas previlegiás d'esta repolía zona del sul d'Estremaúra.^[3]^[4]

Estoria

Esti conventu franciscanu de San Diegu d'Alcalá, está enas ahueras de Huentis de León, ena comarca de Tentudía. Se costruyó dendi'l 1597 ata'l 1613 conas limosnas delos vezinus del puebru, sobritó conas portacionis de Don Juan de Giles i Don Bartolomé Hernández Guerra. La su costrución hue mu costosa i huerun los sus vezinus del puebru los que s'acuparun delos dezisseis añus que durarun las obras pala su costrución, hata que hue inagurau nel 1613.^[5] Duranti las sus obras un arbañil cayó dendi la bóveda sin hazel-si nenguna heriúra i endispués él mesmu contó qu'avía rezau a San Diegu mentris diva cayendu. P'agralecel la su salvación nel percanci, se hizu religiosu i ala final murió de viejinu nel conventu franciscanu de Frexenal dela Sierra.^[6] Aluspués d'inagurau, se gastó pa vivil los frailis descalçus dela Ordin de San Franciscu i comu la imagi del santu qu'avía era la de San Diegu d'Alcalá i amás pola su devoción d'esti santu nel puebru, el conventu passó a llamal-si assina. Por mé dela ayúa delos vezinus del puebru, los frailis puyerun andal pallí hata'l añu 1822, quandu ala finiquita, tolas sus propiedais delas órdinis monacais huerun dessamortizás polas Cortis del Trieniu Liberal.^[5]^[7]

Alos acaberus del añu 1822 s'esmençó a gastal comu'n molinu d'azeiti. Endispués, quandu passó a sel de gastu privau, las estalacionis huerun pa destintus mesteris, comu agrícolas o ganaerus i comu casona o almacén palas güertas i campus d'al reol, lo que hizu que ca vés anduviera mas estropiciau, hata'l su entangu comu otel a escomiençus del siegru XXI. Tamién uvu n'estas obras de restauración un mu grandi acidenti enos arreglijus delas bóvedas i nel que se izi que púu avel ayuau San Diegu d'Alcalá, paque huera menus gravi delo que poía avel síu. Ugañu está rabilitau mesturandu cosas originais con otras d'estilu mas moernu, comu las sus abitanças qu'están enos antigus cassullus monacais, que hazin del Conventu San Diegu, un sitiu milagreru i repolíu de guipal.^[5]^[7]

Descreción

Esteriol

El conventu de San Diegu hue hazi siegrus un conventu dela Ordin de San Franciscu. Está assitiau ena provincia de Badajós, ena localidá de Huentis de León. El inseñu del edificiu á respetau l'arquitetura original del conventu, comu los cassullus monacais trashormaus en abitanças pa descansal, el claustru o la sala capitulal hecha un lindu restaurán. La decoración mestura los componentis originais conos d'estilu más moernu, pa tenel una mesturança mu interessanti i atrativa.^[1]

Interiol

El su claustru, tieni unas galerías clausurais enllenas con frescus del siegru XV, i amás tieni unas antiguas abitanças delos frailis franciscanus, pa poel descansal cona mesma tranquilidad i silenciu comu lo hazierun aquellus frailis. Estas dozi abitanças sonin duplis con bañu compretu col aprovechamientu del terrenu. La su ilesia es de una sola navi cona pranta de crus latina, cona su antigua sacrestía i cona su salona capitulal, aprepará con una güena acústica pala letura delos frailis. La antigua ilesia del conventu franciscanu á síu adatá pa poel celebral actus sociais o runionis de trebaju, con una cabusía de dozientas pessonas.^[5]

Nel antigu refetoriu del conventu están la cafetería i el restaurán, aondi poemus guipal angunas tinajas embaxu'l suelu, que antigamenti eran gastás comu almacén pa guardal augua, azeiti o comistina de qualquiel crassi. Ala entrá dela cafetería i endrentu d'ella ain pieras de molinus d'antañu. El claustru hue'l coraçón del conventu, pos toa la vida dela comunidá se hazía al reol suyu, porque tolas dependencias emportantis estavan alos sus alreoris. Ugañu, passa lo mesmu, pos la apreparación es la mesma. El claustru superiol, aondi estavan los cassullus monacais, agora án síu abilitaus palas abitanças con tolos mesteris. Tamién ai un hornichi retangulal aondi s'encuentra una biblioteca chiquenina, pa poel desfrutal dela letura.^[5]

Guipal tamién

Referencias

↑ ^1,0 ^1,1 «Hotel Convento San Diego, Hotel en Fuentes De Leon, Badajoz». Clubrural.com. Consultado el 22 d'otubri del 2023.
↑ «Hotel Convento de San Diego | Extremadura Gourmet». Archivado desde el original el 29 de septiembre de 2023. Consultado el 22 d'otubri del 2023.
↑ Urdí, Rubén López (21 de noviembre de 2022). «Qué ver en Fuentes de León: pueblo mágico de Badajoz». Caminante del Planeta - Blog de viajes. Consultado el 22 d'otubri del 2023.
↑ «Convento de San Diego de Alcalá de Fuentes de León (Badajoz). Franciscanos Menores Observantes.». PARES. Consultado el 22 d'otubri del 2023.
↑ ^5,0 ^5,1 ^5,2 ^5,3 ^5,4 «Hotel Convento San Diego de Fuentes De Leon. Las Mejores Ofertas en Hoteles.net». Hoteles.net. Consultado el 22 d'otubri del 2023.
↑ «REVISTAS SAN DIEGU D'ALCALÁ». Consultado el 22 d'otubri del 2023.
↑ ^7,0 ^7,1 Gallardo, Fernando (16 de diciembre de 2016). «Convento San Diego, tras las ventanas, montes de olivar». El País. ISSN 1134-6582. Consultado el 22 d'otubri del 2023.

Atijus p'ahuera

En Commons ai conteníu multimedia sobre Conventu San Diegu d'Alcalá.
Turismu de Huentis
Casas Roais Hoteles
Gastru-Esperencia Tentudia

Datos: Q123185332

[:3-1] 1,0 ^1,1 «Hotel Convento San Diego, Hotel en Fuentes De Leon, Badajoz». Clubrural.com. Consultado el 22 d'otubri del 2023.

[:1-2] «Hotel Convento de San Diego | Extremadura Gourmet». Archivado desde el original el 29 de septiembre de 2023. Consultado el 22 d'otubri del 2023.

[:4-3] Urdí, Rubén López (21 de noviembre de 2022). «Qué ver en Fuentes de León: pueblo mágico de Badajoz». Caminante del Planeta - Blog de viajes. Consultado el 22 d'otubri del 2023.

[4] «Convento de San Diego de Alcalá de Fuentes de León (Badajoz). Franciscanos Menores Observantes.». PARES. Consultado el 22 d'otubri del 2023.

[:2-5] 5,0 ^5,1 ^5,2 ^5,3 ^5,4 «Hotel Convento San Diego de Fuentes De Leon. Las Mejores Ofertas en Hoteles.net». Hoteles.net. Consultado el 22 d'otubri del 2023.

[6] «REVISTAS SAN DIEGU D'ALCALÁ». Consultado el 22 d'otubri del 2023.

[:0-7] 7,0 ^7,1 Gallardo, Fernando (16 de diciembre de 2016). «Convento San Diego, tras las ventanas, montes de olivar». El País. ISSN 1134-6582. Consultado el 22 d'otubri del 2023.

[1]

[2]

[3]

[4]

[5]

[6]

[7]