Josefa Martín Luengo
| Josefa Martín Luengo | ||
|---|---|---|
| Información pressonal | ||
| Nacencia |
19 de setiembri de 1944 Salamanca (España) | |
| Muerti |
1 de jullu de 2009 (64 años) Salamanca (España) | |
| Nacionalidá | Española | |
| Educación | ||
| Educau en | Nuversidá de Salamanca | |
| Información prehessional/profissional | ||
| Oficiu | Enseñante | |
Josefa Martín Luengo (Salamanca, 19 de setiembri del 1944-Salamanca, 1 de jullu del 2009) hue una educaora libertaria española, tamién mentá comu Pepita.
Biografía
[adital | adital cóigu]La su nacencia hue el dezinuevi de setiembri del 1944 en Salamanca, en Castilla i León, ciá ena que estuya la carrera de Magisteriu i endispués la carrera de Sicología i Pedagogía, licenciándu-si pola Nuversidá de Salamanca nel 1972. Anantis de chiquenina, estuyó nun colegiu de monjas n'Alacanti, ena Comunidá Valenciana.[1][2][3]
Esmençó la su atividá educaora en Frexenal dela Sierra en Badajós, Estremaúra, derigiendu l'escuela hogal Nertóbriga, tratandu que los sus alunus tuvieran una educación integral, aondi la hormación dela pessona i el cogel güenus valoris hueran los sus passus, algu que sigún ella, hizu que las huerças vivas delos alreoris dessigiesin la su demissión imediata. Antocis la muan aforçá al puebru de La Bazana envera de Xerés delos Cavallerus en Badajós, peru se contrapusu con huerça a tan grandi injusticia i endispués de dos añus, le dan una praça i un trebaju d'assessora nun centru d'educación especial en Montiju.[1][2]
Esti casu llegó al Congressu delos Deputaus en Mairil, nuna entrepelación pal goviernu d'Adolfo Suárez, por un deputau socialista. Endispuesinu, n'aneru del 1978, en compaña de las pedagogas Concha Castaño Casaseca i M.ª Jesús Checa Simó ressolvierun hundal una escuela ena ciá pacensi de Méria, mentá Escuela Libri Paideia, pa promovel la pedagogía libertaria. Tamién hue una ativa militanti femenista, biembru del coletivu Mugeris pola Anarquía, hechu polas mugeris de pertenencia ala Escuela Paideia. Tié amás, inumerablis artícalus d'educación, anarquismu i femenismu.[1][2][4]
Sigún la su convinción, la Educación Libertaria tié que sel assolutamenti endependienti del Estau, pos el Estau precurará por mé delas sus escuelas, acontinal el cudiau delos sus interessis eno tocanti ala hormación dela ciadanía aparentis pala sociedá, gastandu ala escuela comu'l meyu de barajeu social. Ala final, espenó el día unu de jullu del 2009 ala edá de sessenta i cincu añus pola resulta del canci, nel Ospital Nuversitariu de Salamanca, en Castilla i León.[1][4]
Obras
[adital | adital cóigu]- Frexenal dela Sierra, una esperencia dela escuela en libertá. Campo Abierto Ediciones, nel 1978.
- Dendi la muestra escuela. Ediciones Madre Tierra, nel 1990.
- Ententu d'educación contrautoritaria i sicomotrís.
- La escuela dela anarquía. Ediciones Madre Tierra, nel 1993.
- Paideia, venticincu añus d'educación libertaria. Manual Teórico-Práctico, Villakañeras Ediciones, nel 2006.
Referencias
[adital | adital cóigu]- ↑ 1,0 1,1 1,2 1,3 sobrilaanarquiaiotrustemasvidaiobradepensaoris (30 de deziembri del 2019). «Josefa Martín Luengo mas conocía comu Pepita (Vida i Obra)». Sobri l'Anarquía i Otrus Assuntus. Consultado el 17 d'aneru del 2025.
- ↑ 2,0 2,1 2,2 «Josefa Martín Luengo | Paideia Escuela Libre | Mérida». Escuela Paideia. Consultado el 17 d'aneru del 2025.
- ↑ Martín Luengo, Josefa. 22 de marçu del 2022. Consultado el 17 d'aneru del 2025.
- ↑ 4,0 4,1 Josefa Martín Luengo i la Pedagogía Libertaria. 16 d'aneru del 2025. Consultado el 17 d'aneru del 2025.
Atijus p'ahuera
[adital | adital cóigu]
En Commons ai conteníu multimedia sobre Josefa Martín Luengo.- Tolos sus librus Pepita Martín Luengo.
- Udiulibru Educación Libertaria Vidiu Pepita Martín Luengo.
- Educación Anarquista Vidiu dela Educación Libertaria.
- Escuela delos Puebrus Pepita Martín Luengo.
Datos: Q468757