Juaquina Charro Gómez
| Joaquina Charro Gómez | ||
|---|---|---|
| Enhormación pressonal | ||
| Nacencia |
10 de septiembre de 1912 Montijo (España) | |
| Muerti |
1938 Montijo (España) | |
| Causa de muerti | Heriúra por arma de hueu | |
| Nacionalidá | Española | |
| Enhormación profissional | ||
| Oficiu | Trabajador doméstico y sindicalista | |
Juaquina Charro Gómez (El Montiju, 10 de setiembri del 1912-Incertu, 1938) hue una sendicalista estremeña represaliá i endispués afusilá ena guerra civil española polas sus ideas repubricanas.
Biografía[Edital | Editá'l códigu]
Tuvu la su nacencia el dies de setiembri del 1912 n'El Montiju (Badajós),[1] nuna familia umildi, ija dun carvoneru Teodoro Charro Rodriguez i de Maria Gómez Moreno, huendu la otava de nuevi ijus. Mu prontu dexó la escuela polos poblemas de possibli i se pusu a trebajal comu empreá dela casa.[2]
Huendu entavía mu nueva s'apuntó ala Casa del Puebru d'El Montiju i hue parti del Quairu Artísticu dela Casa del Puebru, qu'era una corrupela de teatru criau polas Joventuis Socialistas. Divan col teatru trebajandu polos puebrus dela comarca tentandu de concencial conas sus entrepetacionis alos sus abitantis, con messagis de libertá palos obrerus i las mugeris. Dentri las obras que entrepetavan se pue izil pol exempru angunas comu “La mugel adúltera”, “La londra i el milanu”, “Las hormigas roxas”, “Monticristu”, “El cavalleru dela libertá" i mas.[1][2]
Assina, polas sus atividais políticas, col tiempu esmençó a sel mentá comu La Passionaria d'El Montiju. Delos sus hechus más arrecordaus hue quandu ella en juntu a otras mugeris, se pelarun en púbricu pa revindical los sus derechus delas mugeris. Hue una mugel guapa i atrativa, col caraiti alegri i abiertu, por essu tenía amistais abondu. Tuvu un amiguinu montijanu, peru ala finiquita, él s'aconyugó con sotra mugel. Juaquina Charro era mu rachanti, con salurriu a gallonis, mu güena pessona i mu trebajaora.[1][2]
Pal 1933 calavoró ena criación dela Sociedá Obrera Feminina d'El Montiju (SOF), endrentu del Centru Obreru "La Defensa" col ojetivu del defendimientu delas mugeris trebajaoras. Hue presidía por Maria Pino Gómez, con naceru ena ciá de Méria. La Sociedá entangó crassis noturnas de deprendel a leyel i a escrevil i de coltura general palas sus apontás, deviu alas altas mediúras de nalfabetismu, pos la huerça d'ellas no avían díu ala escuela de chiqueninas.[1] Ala finiquita, Juaquina Charro "La Charra" hue nombrá abanderá d'esta Sociedá.[1][2]
El 13 d'abostu del 1936 hue rapá i obrigá a purgal-si con azeiti de recinu nel su puebru. Adenantis dela su matación hue enviolá arrepetiblimenti ena su casa.[3][4] El su ativismu nel defendimientu de "Los Naidi" tuvu una fatal resultancia, pos paeci sel que alos acaberus del 1938, alos ventisseis añus, hue afusilá en juntu a otrus deteníus entri Villal del rei i La Roca dela Sierra. Enjamás á siu hallau el su cuerpu.[1][2][5]
Reconocencias[Edital | Editá'l códigu]
- Una calli d'El Montiju tieni'l su nombri comu reconocencia dela su lavol ena vida social.[6]
Referencias[Edital | Editá'l códigu]
- ↑ 1,0 1,1 1,2 1,3 1,4 1,5 Rocha, Manuel Cuerpo (6 de febrero de 2016). «RETAZOS BIOGRÁFICOS DE PERSONAJES DE MONTIJO: JOAQUINA CHARRO GÓMEZ, "LA CHARRA"». RETAZOS BIOGRÁFICOS DE PERSONAJES DE MONTIJO. Consultado el 01 d'otubri del 2023.
- ↑ 2,0 2,1 2,2 2,3 2,4 Gragera, Juan Carlos Molano (10 de febrero de 2021). «Mujeres luchadoras durante la República en Montijo». Historias de Montijo. Consultado el 01 d'otubri del 2023.
- ↑ «Verdugos conocidos: la represión fascista en Montijo en 1936». www.elsaltodiario.com (en local). Consultado el 01 d'otubri del 2023.
- ↑ Ltd (13 de junio de 2014). «Recuérdalo tú y recuérdalo a otros: Extremadura: Joaquina Charro Gómez». Recuérdalo tú y recuérdalo a otros. Consultado el 01 d'otubri del 2023.
- ↑ «Google Académico». scholar.google.es. Consultado el 01 d'otubri del 2023.
- ↑ «Calle Joaquina Charro - Callejero de Montijo - Callejero.net». montijo.callejero.net. Consultado el 01 d'otubri del 2023.
| Control de autoridades |
|
|---|
Datos: Q115683501