Villa romana de Torre-Águila
La villa romana de Torre-Águila es unu delos prencipalis yazimientus arquiológicus d'epoca romana n'Estremaúra. Se halla nel términu monicipal del Montiju, junta'l ríu Guadiana i estuvu pobrá dendi el sigru I ata el sigru VII. Enque el sitiu se conocía dendi hazi tiempu á con el nombri de Los Pareones[1] i El Tesoro, hue en 1984 quandu encetarun las primeras escavacionis.
Sitiu
[Edital | Editá'l códigu]La villa se destiendi por un terrenu anchu a dambus dos laus dela carretera local del El Montiju a Barbañu. Se halla a 189 msnm, renti un braçu de Guadiana i a unus 300 m del cursu atual del ríu Guadiana.
La entrá la tien dendi la propia carretera que ajunta la carretera de Don Carlu con Barbañu.
Estoria
[Edital | Editá'l códigu]La villa la encontrarun por un casual nivelandu enas tierras puestas en regueríu de Torre-Águila, una delas fincas ena hesa de Barbañu, cerca del puebru nuevu.
Sigrus I ata el III
[Edital | Editá'l códigu]La villa duró bastantis sigrus, ya que los restus más antiguus hallaus son del sigru I i el farrungamientu i abandonu quasi compretu es del sigru VII. La huerça delos restus que hallarun pretenencia ala segunda (sigrus II-III) i tercel etapa dela casa.
Cona hallaúra dun lagal imponenti i mu buen estau de conservación púu abrigual-si que la atividá prencipal dela villa era la dela azeiti.
La parti de vivienda se destribúi en dos peristilus, destacandu-si el desenterramientu duna sala de veranu en perfetu estau de conservación cona bóveda entera i las dos entrás con pergañus i un vanu con partilús.
Son de grandi importancia las dos partis de termas, la más antigua ena parti norti i la más rezienti, del sigru IV, por baxu, junta la nueva vivienda, dambas a dos perfetamenti reconociblis en quasi que toas sus partis, con arquerías i pañus de paré bien conservaus.
Sigru IV
[Edital | Editá'l códigu]Los restus de más moderniá, asseñalan que del sigru IV palantri l'atividá prencipal hue el vinu. D'esta época es la vivienda alevantá por cima dela antigua conas características propias delas villas romanas del imperiu baxu. Se destaca d'esti tiempu la sala octogonal[2].
Sigrus V-VI
[Edital | Editá'l códigu]En tiempus dela fuga del cristianismu s'apreparó una navi comu templu junta el que avía un cimenteriu, que los restus están agora a estudial-si. Daquí palantri, la villa hue descaeciendu ata quasi abandonal-si del tó.
Sigrus VII ata ogañu
[Edital | Editá'l códigu]Con tó i con essu, angunus delos edificius siguierun a gastal-si duranti tiempus morus i ena Edá Media. En angunas delas navis avería una ermita ondi se halló en el sigru XII la virgi de Barbañu eno que eran Los Pareones i la trasladarun a una ermita nueva que alevantarun ena parti más elevá junta la Cañá dela Virge, en un recó que has Guadiana.
La parcela cayó en manus privás dispués delas despropiacionis i parcelacionis del Plan Badajoz, ondi alevantarun un cortijinu que estuvu en pie ata las últimas escavacionis i adecentamientu del yazimientu.
Atillus
[Edital | Editá'l códigu]Asociación de Amigos de la Villa Romana de Torreáguila. | Reportagi fotográficu en Las Vegas Baxas.
Referencias
[Edital | Editá'l códigu]- ↑ http://lasvegasbajas.blogspot.com.es/2011/10/villa-de-torre-aguila.html
- ↑ Fco. Germán Rodríguez Martín, folletinu informativu dela villa.