Zeta
Sesta letra el alfabetu griegu.
El su nombri en griegu antíguu era ζῆτα [zdɛ̂ːta] i en moernu es ζήτα ['zita].
La su grafia mayúscula es Ζ i la menúscula ζ. El latín, ya en epoca emperial escomiençó, de que se margulló ena cultura griega, a gastal la letra Z pa trascrevil prencipalmenti nombris própius elénicus. Esta letra acabó por encluil-se nel abecedáriu latinu, acupandu la última posicion, por sel ésta la última las letras acetás polos romanus nel su repertóriu alfabéticu.
Esta letra, presenti ena huerça los dialeutus el griegu antíguu, sirvia pa represental la volucion los grupus induropeus *dj, *gj i *j + vocal a [dz]. Assina las parabras Ζεύς < *djeus o ζῶ < *gjo-. No estanti esti son esprimentó pol analogia conos grupus internus σδ que los griegus escrevian tamien comu ζ una metátesi a [zd].
Esti son, primeru en interiol parabra, aluspues nel escomiençu, por assimilacion total progressiva coló pal son [z] en jónicu-áticu i pa [dd] en lacóniu, beóciu i tessáliu: assina una parabra comu χατίζω se prenunciava en unus lugaris [khati̋zdɔː], [khati̋zɔː] o [khati̋ddɔː].
La grafia ζ, en epoca elenística escomencipió a empreal-se pa anotal la sonoriá la s: ἀναβαζμούς. La volución a [z] que siguió el jónicu-áticu i, por ende, la coiné hue la que se conselva en griegu moernu: χρωματίζω [xroma'tizo]. Amás, el griegu moernu gasta el dígrafu τζ pa la trascricion de [dz] en parabras, prencipalmenti, enpréstamus el turcu, del ingrés o del francés: τζάμι, τζάκι, τζην, τζιπ, τζαζ.
Comu numeral, tien el valol de 7 (ζ´) i de 7000 (,ζ).
Bibliografia
[Edital | Editá'l códigu]- Berenguer Amenós, J., Gramática griega, Barcelona, Bosch, 200237.
- Liddell, H. G., Scott, R., A Greek-English lexicon, Oxford, Oxford University press, 19969.
- Lejaune, M., Phonétique historique du Mycénne et du Grec ancien, París, Klinsieck, 1972.
- VV. AA., Νεοελληνική γραμματική, Atenas, Οργανισμός Εκδοσέως διδακτικών βιβλίων, 2005.
- VV. AA., Griego moderno para filólogos clásicos, Atenas, Ediciones Nefeli, 1999.