Bonifacio Gil

Dendi Güiquipeya
Ir a la navegación Ir a la búsqueda
Canadian Aboriginal Syllabics Example.svg Nesta páhina se gasta una ortografia destinta a la que normalmenti se gasta ena Güiquipeya.

Bonifaciu Gil García jue un musiculogu y folklorista riojanu de nacencia y estremeñu d'adopción. Tuvu nacencia en Santo Domingo de la Calzada, en 1898, y murió en Madril, en 1964. De chiquininu jue cantol nel coru el conventu San Franciscu nel su lugal natal, ispiertandu en él una verdaera vocación pol folklori, que más tardi estuvu patenti nel su serviciu nel Ejércitu cumu educaol musical en Burgus. A los venticincu añus ganó con nº 1 las oposicionis a Músicu Milital del Ejércitu, y lo mandarun pa Badajó. Apasionáu pol folklori y mostrando siempri inquietúis jaðia proyectus musicalis, en 1927, junda el Conservatoriu Badajó, en el qu'ejerci cumu Directol y professol d'Armonía, y tamién essi mesmu añu cría l'Orfeón de la ciá.

Integráu ya ena vía social y cultural pacensi, Bonifacio Gil esmienza a jolmal parti del Centro de Estudios Extremeños, jiðiendu un trebaju recopilación con mas d'ochocientus cantaris popularis y romancis d'Estremaúra. Es assina cumu Don Bonifaciu Gil se muestra acontinaol de los folkloristas estremeñus del S XIX contandu siempri con ayúa d'istitucionis púbricas movías pol cierta sensibilización social sobre la necessiá la recogía y estuyu los materialis folklóricus.

Bonifacio Gil vivió ventitrés añus en Estremaúra. La su deicación al folklori estremeñu está refrejá en una gran lista pubricacionis. Más, por encargu el Instituto Español de Musicología , acometió lo que pol antocis se denominó “Missionis Folklóricas” : acorrió varias provincias y llega a arrejuntal más de dos mil cantaris recogíus en distintus cancionerus, talis cumu el Cancioneru 'e Graná, el de Ciá Rial, el de Cadis y el de Toléu.

Amás del su trebaju recopilación y pubricación de cancionerus, tamién s'intresó pol angunus aspectus monugráficus del Folklori: infantil, taurinu, del campu, históricu, de Naviá...

Activiáis en Estremaúra[eital | eital coigu]

Bonifaciu Gil llegó a Badajó en 1924. Integrándussi de seguía nel Atenéu Badajó, comparti las sus aficionis curturalis con professoris, escritoris y artistas, y esmienza a acorrel Estremaúra para acercalsi verdaderaenti a la su cultura.

Los sus primerus viajis de recogía folklori juerun a Puebla la Carzá, Campanariu y Trujillu; y esmienza a arrejuntal cantaris y leyendas que le cuenta el puebru. Aconsigui unus 150 cantaris y romancis, qu'una vez estuyáus y crassificáus, considerará cumu autóctonas d'Estremaúra, desechando angunas pol no sel tradicionalis.

Atijus[eital | eital coigu]