Ir al contenido

María de la O Lejárraga

Dendi Güiquipeya
María de la O Lejárraga
Enhormación pressonal
Nombri de nacencia María de la O Lejárraga y García Ver y modificar los datos en Wikidata
Nacencia 28 de diciembre de 1874 Ver y modificar los datos en Wikidata
San Millán de la Cogolla (España) Ver y modificar los datos en Wikidata
Muerti 28 de junio de 1974 Ver y modificar los datos en Wikidata (99 años)
Buenos Aires (Argentina) Ver y modificar los datos en Wikidata
Sepoltura Cementerio de la Chacarita Ver y modificar los datos en Wikidata
Nacionalidá Española
Familia
Cónyugi Gregorio Martínez Sierra (1900-1922) Ver y modificar los datos en Wikidata
Enhormación profissional
Oficiu Escrevienti, políticu, tradutol y dramaturgo Ver y modificar los datos en Wikidata
Ária Literatura, drama, Política y traducción Ver y modificar los datos en Wikidata
Cargus acupaus Diputado en las Cortes republicanas por Granada (1933-1936) Ver y modificar los datos en Wikidata
Seudónimu María de la O Lejárraga, Gregorio Martínez Sierra y María Martínez Sierra Ver y modificar los datos en Wikidata
Partiu políticu Partido Socialista Obrero Español Ver y modificar los datos en Wikidata
Destincionis
  • Real Academia Española Ver y modificar los datos en Wikidata
[editar datos en Wikidata]

María dela O Lejárraga García (San Millán dela Cogolla, La Rioja, 28 de deziembri del 1874 – Güenus Airis, 28 de juñu del 1974) hue una escreviora i femenista española. Tamién hue conocía comu María Martínez Sierra, nombri qu'adotó delos apellíus del su ombri i col que escrevió una grandi parti dela su obra, peru amás muchu delos sus escritus huerun enfirmaus comu María Lejárraga. Tamién hue Deputá al Congressu pol PSOE pola cercuscrición de Graná nel 1933.

Biografía

[Edital | Editá'l códigu]

La su nacencia hue en San Millán dela Cogolla en La Rioja, nuna familia arropá. Alos quatru añinus se muó cona su familia a Carabanchel Baxu, ala calli dela Sombra,[1] pos el su pairi, Leandro Lejárraga Estecha, nacíu en Tormantos, era operaol i exerció la melecina en Mairil. La su mairi, Natividad García Garay, tuvu la su nacencia en Mairil, i s'acupó pessonalmenti dela educación delos sus ijus, seguiendu los pogramas educativus francesis.[2]

Estuyó ena Associación pal Enseñaeru dela Mugel, aondi tuvu el primel contatu conas ideas pedagógicas dela Estitución Libri d'Enseñaeru. Acabijó los sus estuyus de Comerciu nel 1891, convirtiendu-si nuna professora d'ingrés pala Escuela d'Estitutrís i Comerciu. Los sus estuyus de magisteriu, los acabijó ena Escuela Normal de Mairil. Quandu era estuyanti, resultó al Congressu Pedagógicu Hispanu-Almericanu, aondi sostribó los postulaus educativus de Emilia Pardo Bazán.

Trebajó comu maestra dentri'l 1897 i el 1907. Nel 1899 pubricó la su primel obra: Cuentos breves, que hue acebía pola su familia con frialdá. Essu i el sel maestra le hizierun achoçal el su nombri embaxu'l nombri del su ombri, Gregorio Martinez Sierra, col que s'aconyugó nel 1900.

Tuvu sempri una avenencia mu estricá con Graná, possimenti dendi qu'escreviera el su libru Granada, guía emocional, enos primel añus del siegru XX, enque Daniel Eisenberg ispiró que hue una obra del su ombri, pos devíu ala incultación del su nombri, avía magua pola vera utoría d'angunas obras.[3] Assina nel 1930, el su maríu enfirmó un escritu nel que reconocía la coutoría dela su mugel, peru recramava estus derechus pa él propiu.[4]

Mesmamenti, tamién s'á reconocíu qu'obras de otrus utoris, comu hue el casu de El pavo real de Eduardo Marquina, huerun tamién escrevías por ella i qu'esti escrevienti namás qu'aportó escrusiva i possimenti la su vessificación.[5] Nel 1905 viajó pa Bélgica con una beca que le brindó conocel los sistemas educativus d'esti país, aondi tamién conoció las Casas del Puebru i la tesi socialista.[6]

Aluspués dexó la su lavol d'enseñaeru i pidió l'acedencia nel 1908 pa dedical-si pol compretu ala literatura. Dendi'l 1922 estava ya desapartá oficialmenti del su maríu i calavorava llenamenti ena labol de partal alas mugeris delos valoreus tradicionais que las acontinava inorantis i dependientis. Era una escreviora leía d'isquierdas que ya no vivía col su ombri, sempri mas procupau pol déssitu comercial. Nel 1931 golvió pa España, aondi calavoró ativamenti cona Repúbrica i dexó la su produción dramática hata'l añu 1948. Ala final no dexó d'escrevil ata la su muerti seis mesis enantis de cumpril los cien añus. Al acabaíçu dela Guerra civil escomençó un largu dessiliu por Francia, Méxicu i aluspués Argentina, aondi ala finiquita espenó nel 1974.[7]

Correúra profissional

[Edital | Editá'l códigu]

Nel 1901, juntu al su maríu, pubricarun la revista Vida Moderna, ena qu'escrevierun tantu escrevioris moernistas comu ralistas. Con Juan Ramón Jiménez hundarun la revista del moernismu poéticu Helios (1903-1904), aondi pubricarun, dentri otrus, Emilia Pardo Bazán, Antonio Machado, Jacinto Benavente, o los ermanus Quintero.[8] I nel 1907 la revista Renacimiento, de pocu duramientu, peru duna grandi calidá. Estas calavoracionis cimentarun una prohunda amistá dentri María Lejárraga i Juan Ramón Jiménez. Dambas dos pubricacionis estavan enteraus del tiraeru literariu uropeu. Era políglota i hue la que hizu la huerça delos canteus ingresis i angunu francés enfirmás en Renacimiento.[9]

La su obra Canción de cuna, inagurá nel 1911, acebió el premiu dela Real Academia Española comu la mejol obra dela temporá teatral 1910-1911. Delas obras ecenificás en Mairil dentri 1929 al 1931, alo menus venti eran della. Estu mos enseña'l déssitu de púbricu i l'interés dela crítica. Amás, la Compañía cómico-dramática Martínez Sierra, derigía pol su maríu, no entrepetó solamenti n'España sinu que temién hizu giras por Francia, Rienu Uníu, Estaus Uníus i Almérica Latina. Enos pogramas delas huncionis rezavan los nombris dambus dos. Quandu'l su maríu estava ahuera, era ella la que s'encargava del su Teatro Lara. Tamién calavoró con literatus consagraus comu Eduardo Marquina, ena su obra El pavo real, o con Carlos Arniches, en La chica del gato, qu'endispués hue llevá al cini.

El matrimoñu s'encontró con Manuel de Falla en París en 1913 por mé de Joaquín Turina i nel 1914 hiizu'l libretu de Margot, cona música d'esti mesmu músicu Joaquín Turina, un drama líricu en tres partis.[10] Aluspués de golvel a Mairil esmençarun a calavoral con Falla en angunus proyeutus. Nel 1915 s'inaguró El amor brujo, que combinava música i dança cona música de Falla i el libretu de Lejárraga nel Teatru Lara de Mairil.[11] Con esta obra querían d'espressal l'alma del puebru gitanu i pa hazel-lu, Falla tocava peaçus dela letra i Lejárraga descrevía el ton d'emoción del passagi. Viajarun en juntu a Graná, ciá qu'ella conocía en hondura, aondi le dierun los toquíus acaberus. La protagonista hue Pastora Imperio.[12]

Golvió a escrevil nel 1948 endispués duna compricá operación de tataratas i un añu dispués dela muerti del su ombri. Dendi antoncis esmençó a firmal col nombri de María Martínez Sierra i ala final tuvu que recramal qu'era la su obra pa poel cobral los derechus d'autol qu'avían passau ala ija del su maríu.

Nel 1950 viajó pa Nueva York i aluspués a California, pa entrevistal-si con produtoris de Hollywood. Pallí escrevió una comedia pa zagalinus i zagalinas, Merlín y Vivian o la gata egoísta y el perro atontado, que le hue rechaçá, enque ella puu vel lo acomparanti qu'era cona penícula La dama i el vagamundu. Desmaginá, viajó pa Méxicu aondi canteó palas editoriais Aguilar y Grijalbo. Calavoró ena presa i palró nel Ateneo Español. Polos poblemas de salú, se muó pa Güenus Airis, aondi acontinaría escreviendu hata la su muerti.[7]

Correúra femenista i política

[Edital | Editá'l códigu]
María de la O Lejárraga (1928), retratu hechu por Julio Romero de Torres i qu'está nel Museu Julio Romero de Torres.

Las sus ideas sobri la ación delas mugeris ena sociedá, se hilarun al reol de dos elementus: el sessu i la crassi social. La maternidá i lo domésticu sonin assuntus mu repetíus enos sus escritus, peru sempri emparentaus ala endividualidá femenina comu ciadana de llenu derechu, por essu, pusu la su mayol atención enas mugeris de crassi meya o meya capa. Nel 1914 pubricó Cartas a las mujeres de España i nel 1917, Feminismo, feminidad y españolismo, amás de calavoracionis enos pedióricus o ena presa escrevía, enas que dissali La mujer Moderna de Blanco y negro.[2]

Participó ena hundación de muchas associacionis femenistas. Nel 1917 participó en a criación dela UME o Unión de Mugeris d'España, con un duramientu de dos añus, junta la Marquesa del Ter. Endispués nel 1920 viajó a Ginebra comu espolichi d'España al VIII Congressu dela International Woman Suffrage Alliance, aondi calavoró ena escreviúra duna carta delos derechus femeninus, col reconocimientu dela igualdá política, almenistrativa i civil delos dos sessus eno tocanti alo nacional i entrenacional.[2] Hue un biembru ativu dela Sociedad Española de Abolicionismo participandu nun alaván de juntanças. Esta sociedá estava ena contra dela reglamentación delos prostíbulus.[13]

Nel 1926 participó ena hundación del Lyceum Club que presidió María de Maeztu, junta Victoria Kent i Zenobia Camprubí, dentri otras.[2] S'inaguró con cientu cincuenta socias de tolos tiraerus i n'ellu tamién participó Elena Fortún, ala que Lejárraga l'apopó ena su vocación literaria. Esti Club tenía una grandi bibloteca dirigía por Lejárraga.[14]

Femenista convencía, s'apontó nel 1931 al PSOE. Assina, esmençó la su lavol de propagandista repubricana, possimenti entri las mugeris, col pedioru de cincu conferencias La mujer ante la República que tuvu celebramientu nel Ateneu de Mairil del quatru al deziochu de mayu del 1931. Nestas conferencias tentó de descrevil los mieus que promovía el nuevu régimi, possimenti los religiosus.[15] Ca conferencia tenía un assuntu específicu i assina, la Realidad qu'era sobri la nueva ralidá dela patria, el Egoísmo que se sostriba nel defendimientu dela Repúbrica, la Religión qu'era sobri la custión religiosa, la Federación, qu'era sobri las utonomías i la Libertad qu'era sobri la revindicación delos derechus delas mugeris, qu'andava hormá en dos partis: por un lau lo que la mugel avía síu hata antoncis i por sotru lo que devía de sel nel hoturu, polo que arrepassó por íntegru los Cóigus Penal i Civil.[16]

Por esti pedioru de conferencias, el Lyceum celebró en El Retiro un omenagi nel su onol recadandu seiscientas pesetas qu'ella entriegó alos obrerus sin trebaju. Nel 1932 s'apreparó sotru cussu de conferencias enas que se analizó la sitación política i ena que participó con una conferencia col títulu de Dudas del momento.[17]

Promovió, junta Pura Maortua i María Rodrigo, la Asociación Femenina de Educación Cívica, qu'esmençó las sus atividais en el 1932. Las venti amegas que se runierun, querían que l'Associación no huera solamenti un estrumentu de revindicación femenista, sino tamién un hogal espiritual i material palas trebajaoras, possimenti de meya capa. Pa ellu abría espacius, conferencias, cussus i talleris. En seis mesis tenían ya seiscientas socias. Afió la aliança delas associacionis femenistas i pa ellu anduvu ena pubricación dela revista Cultura integral y femenina que tuvu un grandi déssitu. Ena Cívica tamién se tentó la enverneción teatral cona criación del Club Anfistora, derigíu por Pura Maortúa i Federico García Lorca, que huncionó con déssitu dendi l'otoñu del 1933 hata esmiençus del 1934.[14]

Nel 1933 hue elegía deputá al Congressu dela Repúbrica por Graná endrentu dela candilatura socialista i hue assiná vicipresienta dela Comissión d'Estrución Púbrica. Entrevinu enos assuntus generais, contraponiendu-si alos proyeutus de lei pa amprial las prantillas delos Cuerpus de Segurança i dela Guardia-Civil, i al dela derogación dela lei delos Términus Monicipais, porque pensava qu'eran proponimientus injustus pal puebru español, qu'andava hambrientu i que piía trebaju con precisa nessecidá. Nel 1936 acupó la representación dela Repúbrica Española en Suiça comu Agregá Comercial del Menisteriu d'Agricultura, Endustria i Comerciu.[8]

Tamién hundó i participó ena dereción del Comité Nacional de Mugeris en contra dela Guerra i el Fascismu, presidíu por Dolores Ibárruri. Nesti bandu tamién participó comu espolichi nel Congressu Mundial de París, la escrevienti i pediorista Consuelo Álvarez Pool, nel 1934. Lejárraga calavoró ena revista Mujeres, que pubricó esta associación.[14] En novembri del 1936 acupó el puestu d'Agregá Comercial dela Delegación d'España en Berna. En mayu del 1937 hue nombrá secretaria dela delegación governamental española ena XXIII conferencia dela Oficina Entrenacional de Trebaju. Quandu cambió la xefatura del goviernu nel 1937, cona restitución de Largo Caballero por Juan Negrín, hue cessá nel su cargu i se muó ala su casa envera Niça.[16]

La su obra literaria

[Edital | Editá'l códigu]

Libretus musicais

[Edital | Editá'l códigu]

Escomençó la su calavoración con Usandizaga nel 1912, quandu la Compañía Martínez Sierra representó en Santandel Canción de cuna. Las Golondrinas hue inagurá nel 1914 con un craru déssitu. Tamién escrevió La llama, que hue representau nel 1918, tres añus endispués dela muerti del compositor.

Nel 1914 Joaquín Turina le pidió un libretu i Lejárraga le hizu Margot, que hue representá nel teatru Eslava enbaxu la dereción de Martínez Sierra con una grandi escenografía i una espetaculal puesta n'escena. Pa apreparal sotra obra viajarun juntus al Marruecos español i conas esperencias del viaji, Turina escrevió una suite de cincu movicionis titulá Retrato dedicá a Lejárraga. Turina crió tamién la música pa un autu sacramental Navidad, inagurau nel 1916.

Calavoró con Manuel de Falla en El amor brujo y El sombrero de tres picos, enque acabijarun enemistaus, a pesal de sel un grandi sostribu del músicu enos añus dela su amistá. Tamién calavoró con Conrado del Campo Zabaleta en varias obras i con otrus autoris comu María Rodrigo. Es considerá la libretista española mas celebri.[18]

Teatru

[Edital | Editá'l códigu]

Nel su libru de memorias, Gregorio y yo, apondera que endispués d'inagural El ama de la casa nel 1910 dexó el su puestu de maestra i se dedicó escrusivamenti ala literatura, apopá a ca ná pol su maríu. Escrevió las sus obras mas comprometías i esprimentais entri'l 1925 i 1930, aondi en angunas d'ellas ispira qu'el amol románticu es un engañiju. Velaí-la, el su teatru es pedagógicu i críticu cona idealización del amol. Varias d'estas obras tié comu lexi un triángulu amorosu, comu Mujer (1925), La hora del diablo (1926) Triángulo (1929) i Sortilegio (1930) qu'enjamás s'inaguró n'España, es la su única tragedia i susprendi porqu'el triángulu está hormau por un ombri i una mugel que competin pol amol de sotru ombri i trata amás del suicidiu.[7]

Esta hue la obra cabera de María Lejárraga inagurá i enfirmá por Gregorio, que nel 1931 se muó pa Hollywood con Catalina Bárcena i Maria Lejárraga golvió pa España, dendi la Riviera francesa, aondi calavoró ativamenti cona Repúbrica i dexó la su produción dramática hata'l dessiliu.[7] Nel 1950, acabijó la su primel comedia, Es así, de duramientu normal i escrita endispués dela muerti del su maríu. N'ella güelvi a tratal del triángulu amorosu i la traición matrimoñal. Vivía en Güenus Airis aondi asperava inagural tamién Para casarse hay que ser viuda, comedia retoçona, comu decraró ella mesma nuna entrevista. Acontinó escreviendu otras obras comu Tragedia de la perra vida, sátira mitológica filosófica i metateatral que no puu vel representá.

Nel 1952 Lejárraga pubricó en Güenus Airis Una mujer por caminos de España. Nesti libru utobiográficu cuenta en horma d'epissodius varius momentus vivíus comu propagandista del Partido Socialista Obrero Español duranti la Repúbrica. Enque nun prencipiu pensava escrevil las sus memorias nun solu libru, tuvu que desseparal-las en dos librus deferentis porque el que diba a titulal España triste, no diba a sel acetau por l'alcaldeu franquista, assina que hue pubricau ahuera col títulu de Una mujer por caminos de España. Pa poel pubrical n'España escrevió Gregorio y yo nel que solu escrevía del teatru, peru tapocu passó l'alcaldeu, assina que hue pubricau aluspués en Méxicu nel 1953.[15]

Ena obra Una mujer por caminos de España. descrevi la sitación ena qu'está la mugel en España n'estus añus, dendi la su concencia femenista i socialista. Los epissodius mos descrevin una España roal que poquinu a pocu va cogiendu concencia delo que pué senifical la Repúbrica palas mugeris. Las sus obras caberas están arrecogías nun libru titulau Fiesta en el Olimpo, pubricau quandu tenía ochenta i seis añus i aondi arrecuerda al su ombri comu'l diretol d'escena ideal palos sus escritus.[18]

Plagiu de Walt Disney

[Edital | Editá'l códigu]

Lejárraga, por mé dela su tradutora Collice Portnoff, mandó nel 1951 a Walt Disney l'escritu del su cuentu Merlín y Viviana, aondi relatava la estoria dun perrinu que s'enamorava duna gatina presumía, pa si l'interessava pa anguna penícula. Alos dos mesis Walt Disney se lo degolvió i endispuesinu, nel 1955 s'inaguró La dama y el vagabundo cona que se poían vel qu'avian cosas acomparantis col su cuentu. Nuna carta ala su tradutora comenta del supuestu plagiu i escrevió:

«La mandamus a Walt Disney, la tuvu un par de mesis i la degolvió iziendu que no almitían namás que las obras qu'avían pedíu. Endispués, hizu una penícula La dama y el vagabundo, qu'era la mesma estoria, sin mas muança qu'avel convertíu la gatina en una perrina figurín. Esta ves no quisi retolical, pa qué?».[7]

Derechus d'utoría

[Edital | Editá'l códigu]

Quandu Katia Martínez Sierra, la ija huera del matrimoñu de Gregorio Martínez Sierra i l'atrís Catalina Bárcena, recramó derechus d'autol endispués dela muerti del su pairi nel 1947 en Güenus Airis, antoncis Lejárraga esmençó a firmal las sus obras col nombri de María Martínez Sierra. Assina lo hizu en Una mujer por caminos de España (1952) y Gregorio y yo, medio siglo de colaboración (1953).[7]

Nesti libro caberu, cuenta dun decumentu enfirmau nel 1930 por Gregorio Martínez Sierra, ena presencia de testigus, nel que confessa que las obras son compartías, alos efeutus lealis. Amás, nel su legau, centenaris de cartas i telégramas confirman que tolas obras de Gregorío se las escrevía María Lejárraga. Tamién se sabía que la su desseparación avía síu una ralidá dendi'l 1922. Ena su epoca era ya un hechu conocíu.[19]

La su aparencia ena literatura

[Edital | Editá'l códigu]

La revista Helios, hundá en abril del 1903 i dela que namás se pubricarun onzi númirus ata hebreru del 1904, s'á atribuíu erróniamenti al poeta Juan Ramón Jiménez, pos hue hundá por Gregorio y María de la O, peru essu si, siendu'l su prencipal promotol el poeta Juan Ramón Jiménez, col que María Lejárraga compartía secretus i confidencias. A ella le dedicó el siguienti poema:

« I María, tres vezis mapola,
María, augua i lira tres vezis,
la que llevó al pueta com'un zagal
por estus parquis de llantiju,
tendrá una rosa o un oru ena ves
d'aquel violeta del coraçón froríu
que la quería tantu ».

Nel 2012, se pubricarun dos novelas que tié a María de la O Lejárraga comu pessonagi, por un lau Palabras insensatas que tú comprenderás, de Salvador Compán i pol sotru Cándida, de Isabel Lizarraga, estudiaora dela su figura i dela su obra.[20][21] Nel 2015, la Nuversidá de La Rioja, pubricó el libru De literatura y música. Estudios sobre María Martínez Sierra, que trata las avenecias profissionais i criativas que tuvu con angunus delos componeoris mas emportantis del su mesmu tiempu. Nel 2018 el escrevienti i umorista gráficu sevillanu José Luis Castro Lombilla ganó el Premio Internacional de Relato Corto Encarna León con un cuentu sobri los días acaberus dela escreviora titulau La dama vagabunda. La última obra de María Lejárraga. Esti cuentu está pubricau pola Ciá Utónoma de Melilla.[22] Nel 2020 s'inaguró la produción del Centru Dramáticu Nacional, Elena Fortún, escrevía i derigía por María Folguera, ena qu'el pessonagi segundariu de María Lejárraga, tié una grandi emportancia pala costrución de Fortún comu autora. Hue entrepetau pola atrís Julia de Castro.[23]

En mayu del 2020 la editorial Renacimiento pubricó Luz ajena. El enigma de María Lejárraga, escrevíu por Isabel Lizarraga, una novela que ressolvi las razonis que puxarun ala autora a enfirmal col nombri del su ombri i que dessamina los enterrogantis dela su vida, dendi las sus primel obras hata los sus añus acaberus en Güenus Airis.[24][25] La Biblioteca Nacional d'España brinda dendi'l ventissieti de setiembri del 2024 hata'l cincu d'aneru del 2025, la esposición María Lejárraga, una voz en la sombra (1874-1974), concidiendu col cincuenta aniversariu de quandu espenó la escreviora riojana.[26]

Las sus obras literarias enfirmás col su nombri

[Edital | Editá'l códigu]
  • María de la O Lejárraga (1899). Cuentos breves.
  • María Martínez Sierra (1931): La mujer española ante la República. Conferencia leía nel Ateneu de Mairil los días 4, 9, 11, 15 y 18 de mayu del 1931. Mairil, Emprenta de J. Poveda.
  • María Martínez Sierra (1933): Dudas del momento, conferencia leía nel Ateneu de Mairil el día 8 de deziembri del 1932. Mairil, Bolaños y Aguilar Talleris Gráficus. I tamién: Mairil, Gráficas Halar S.L., 1978.
  • Una mujer por caminos de España. Recuerdos de propagandista. Güenus Airis, Editorial Losada, 1952. I tamién: Castalia-Estitutu dela mugel, Mairil, 1989.
  • Gregorio y yo, Medio siglo de colaboración (1953). Méxicu, Editorial Gandesa. Reedición: Edición y prólogo de Alda Blanco, Valencia, Pre-Textos, 2000, 398 páginas.
  • Viajes de una gota de agua (1954).
  • Fiesta en el Olimpo (1960).

Reconocencias

[Edital | Editá'l códigu]
Calli María de la O Lejárraga, junta'l Parqui Miguel Hernández, en Logroñu (La Rioja, España).
  • El dozi de juñu del 2017 col nombri de María Lejárraga abrió la biblioteca del Centru Coltural Sanchinarro.[27]
  • Nel 2019 i nel teatru Valle Inclán de Mairil, s'inaguró la obra Firmado Lejárraga, produción del Centro Dramático Nacional con relatu de Vanessa Monfort, dereción de Miguel Ángel Lamata, decumentación de Carmela Nogales i entrepetá por Cristina Gallego, nel que se revindicava la su figura.[28]
  • Nel 2022 Laura Hojman hizu un decumental sobri la su figura titulau A las mujeres de España. María Lejárraga.[29]
  • Muchas cidais españolas tien callis col su nombri comu Mairil, Getafe, Guadalajara, Logroñu, dentri otras.[30]

Guipal tamién

[Edital | Editá'l códigu]

Referencias

[Edital | Editá'l códigu]
  1. ↑ Karabanchel (04 d'aneru del 2024). «María Lejárraga». Karabanchel.com. Consultado el 25 d'otubri del 2024. 
  2. ↑ 2,0 2,1 2,2 2,3 Capel Martínez, Rosa M.ª (15 de juñu del 2012). «Una mujer y su tiempo: María de la O Lejárraga de Martínez Sierra». Arenal. Revista d'estoria delas mugeris 19 (1): 5-46. ISSN 2792-1565. doi:10.30827/arenal.v19i1.1407. Consultado el 25 d'otubri del 2024. 
  3. ↑ «D:\Programs\SoftQuad\HoTMetaL PRO 5\gifs\Granada .htm». web.archive.org. 04 de marçu del 2016. Consultado el 25 d'otubri del 2024. 
  4. ↑ Pérez, Eva Díaz (17 de setiembri del 2018). «La grandi escreviora qu'aborró el su nombri». El País. ISSN 1134-6582. Consultado el 25 d'otubri del 2024. 
  5. ↑ Marquina, Eduardo (1879-1946). «El pavo real». datos.bne.es. Consultado el 25 d'otubri del 2024. 
  6. ↑ «María Lejárraga, La Escuela de la República». laescueladelarepublica.es. 25 d'otubri del 2017. Consultado el 25 d'otubri del 2024. 
  7. ↑ 7,0 7,1 7,2 7,3 7,4 7,5 O'Connor, Patricia W. (2002). «Sortilegio de amor y los trágicos triángulos en la vida y obra de María Martínez Sierra». María Martínez Sierra y la República. Ilusión y compromiso: II Jornadas sobre María Lejárraga, Logroñu 23-25 d'otubri i 6-8 de deziembri'l 2001, 2002, ISBN 84-95747-19-7, páginas 15-34 (Estitutu d'Estuyus Riojanus): 15-34. ISBN 978-84-95747-19-8. Consultado el 25 d'otubri del 2024. 
  8. ↑ 8,0 8,1 Blanco, Alda (2006). «Una mugel polos caminus d'España». Revistas Csic. Consultado el 25 d'otubri del 2024. 
  9. ↑ Rodríguez-Moranta, Inma (2011). «Nuevas luces sobre María Lejárraga (1874-1974). Unas traducciones en la sombra de 1907». Triangle (4): 45-68. ISSN 2013-939X. doi:10.17345/triangle4.45-68. Consultado el 25 d'otubri del 2024. 
  10. ↑ PERIÓDICO, EL (22 de abril de 2019). «‘Firmado Lejárraga’, un estreno con acento aragonés». El Periódico de Aragón. Consultado el 25 d'otubri del 2024. 
  11. ↑ Ediciones P. Martín (1915). El Amor Brujo. Consultado el 25 d'otubri del 2024. 
  12. ↑ Ana María Arcos Espejo (25 de mayu del 2017). «Escenografía de la música de Manuel de Falla». Tesi dotoral dela US. Consultado el 25 d'otubri del 2024. 
  13. ↑ Masip Vals (25 d'aneru del 1924). «El femenismu n'ación». Nuevo Mundo, Mairil. Consultado el 25 d'otubri del 2024. 
  14. ↑ 14,0 14,1 14,2 Matilla Quiza, María Jesús (2002). «María Lejárraga y el asociacionismo femenino: 1900-1936». María Martínez Sierra y la República. Ilusión y compromiso: II Jornadas sobre María Lejárraga, Logroñu 23-25 d'otubri i 6-8 de deziembri'l 2001, 2002, ISBN 84-95747-19-7, páginas 83-101 (Estitutu d'Estuyus Riojanus): 83-101. ISBN 978-84-95747-19-8. Consultado el 25 d´otubri del 2024. 
  15. ↑ 15,0 15,1 Aguilera Sastre, Juan (2002). María Martínez Sierra y la República. Ilusión y compromiso: II Jornadas sobre María Lejárraga, Logroñu 23-25 d'otubri i 6-8 de deziembri'l 2001. Estitutu d'Estuyus Riojanus. ISBN 978-84-95747-19-8. Consultado el 25 d'otubir del 2024. 
  16. ↑ 16,0 16,1 Lizarraga Vizcarra, Isabel (2002). «Libertad (1931), de María Martínez Sierra: la mugel española de frenti al Cóigu Civil». María Martínez Sierra y la República. Ilusión y compromiso: II Jornadas sobre María Lejárraga, Logroñu 23-25 d'otubri i 6-8 de deziembri 2001, 2002, ISBN 84-95747-19-7, páginas 35-81 (Estitutu d'Estuyus Riojanus): 35-81. ISBN 978-84-95747-19-8. Consultado el 25 d'otubri del 2024. 
  17. ↑ Bermejo Martín, Francisco (2002). «María Lejárraga y el Ateneo de Madrid: (1931-1936)». María Martínez Sierra y la República. Ilusión y compromiso: II Jornadas sobre María Lejárraga, Logroñu 23-25 d'otubri i 6-8 de deziembri 2001, 2002, ISBN 84-95747-19-7, páginas 103-142 (Estitutu d'Estuyus Riojanus): 103-142. ISBN 978-84-95747-19-8. Consultado el 25 d'otubri del 2024. 
  18. ↑ 18,0 18,1 Jones, Joseph R. (2004). «María Lejárraga de Martínez Sierra (1874-1974), libretista y letrista». Berceo (147): 55-95. ISSN 0210-8550. Consultado el 25 d'otubri del 2024. 
  19. ↑ El Sol (Mairil) (03 d'aneru del 1931). «Bibloteca Informacion Teatral». Consultado el 25 d'otubri del 2024. 
  20. ↑ Donaire, Ginés (13 d'abril del 2012). «Salvador Compán recupera la figura de María Lejárraga en su nueva novela». El País. ISSN 1134-6582. Consultado el 25 d'otubri del 2024. 
  21. ↑ Diario de Navarra (02 de mayu del 2012). «'Cándida', el luchi "femeninu i femenista" del siegru XX». diariodenavarra.es. Consultado el 25 d'otubri del 2024. 
  22. ↑ ABC de Sevilla (11 de marçu del 2018). «El sevillano Castro Lombilla rescata a María Lejárraga». Diario ABC. Consultado el 25 d'otubri del 2024. 
  23. ↑ Folguera, María (18 de hebreru al 8 de marçu del 2020). «Elena Fortún [Sendero Fortún]». Centro Dramático Nacional - Ministerio de Cultura. Consultado el 25 d'otubri del 2024. 
  24. ↑ Sainz, J. (29 de juñu del 2020). «Isabel Lizarraga ahonda en «el enigma de María Lejárraga» a través de la novela 'Luz ajena'». La Rioja. Consultado el 25 d'otubri del 2024. 
  25. ↑ Sainz, J. (03 d'abostu del 2020). «La estoria que Lejárraga no s'arrochó a escrevil». La Rioja. Consultado el 25 d'otubri del 2024. 
  26. ↑ González Lejárraga, Antonio (27 de setiembri del 2024 al 5 d'aneru del 2025). «María Lejárraga, una vos ena sombra». Consultado el 25 d'otubri del 2024. 
  27. ↑ Éboli, Biblioteca Pública Municipal María Lejárraga, Dereción ena Calli Prencesa d'Éboli. «Biblioteca Pública Municipal María Lejárraga (Hortaleza) - Portal de las Bibliotecas de Madrid». bibliotecas.madrid.es. Consultado el 25 d'otubri del 2024. 
  28. ↑ Centro Dramático Nacional (05 de mayu del 2019). «Firmado Lejárraga [En letra grande] temporada 18/19». Centro Dramático Nacional - Ministerio de Cultura. Consultado el 25 d'otubri del 2024. 
  29. ↑ RTVE.es (12 de diciembre de 2022). «El decumental sobri l'alantá femenista nombrau al Goya que pues vel en RTVE Play». RTVE.es. Consultado el 25 d'otubri del 2024. 
  30. ↑ Club, Callejero. «Estau del tránsitu nel Passeu de María Lejárraga». Callejero. Consultado el 25 d'otubri del 2024. 

Biblografía

[Edital | Editá'l códigu]
  • González Peña, María Luz. Música y músicos en la vida de María Lejárraga. 1.ª edición Logroñu, Estitutu d'Estuyus Riojanus, 2009.
  • Guerra de la Vega, Ramón. Mujeres de la II República. Mairil, Edicionis Guerra dela Vega, 2013. ISBN 978-84-88271-34-1
  • Martínez Sierra, María. Gregorio y yo: medio siglo de colaboración. Valencia, Pre-textos, 2000.
  • O’Connor, Patricia W. Mito y realidad de una dramaturga española: María Martínez Sierra. Logroñu, Estitutu d'Estuyus Riojanus, 2003.
  • Rodrigo, Antonina. María Lejárraga: una mujer en la sombra. Mairil, EDAF, 1992.
  • La vida escrita por las mujeres. Vol. III. Baxu la dereción d'Anna Caballé. Barcelona, Editorial Círculu de Letoris, 2003. ISBN 84-226-9865-X
  • Isabel Lizarraga Vizcarra. Luz ajena. El enigma de María Lejárraga, Sevilla, Renacimientu, 2020.

Atijus p'ahuera

[Edital | Editá'l códigu]

Escritus

[Edital | Editá'l códigu]

Decumentais

[Edital | Editá'l códigu]

Páginas web

[Edital | Editá'l códigu]

Otrus

[Edital | Editá'l códigu]
Arrecuperau dendi "https://ext.wikipedia.org/w/index.php?title=María_de_la_O_Lejárraga&oldid=132717"