Rosamund Pike

Rosamund Pike
Rosamund Pike en 2018
Enhormación pressonal
Nombri de nacencia	Rosamund Mary Ellen Pike
Nacencia	27 de enero de 1979 (45 años) Hammersmith (Londri, Réinu Uniu)
Nacionalidá	Británica
Caraitirísticas físicas
Altol	1,74 m
Ojus	Azul
Familia
Padre	Julian Pike
Collera	Robie Uniacke (desde 2009)
Ijus	2
Educación
Educau en	Wadham College Badminton School
Enhormación profissional
Oficiu	Atol de vos, atol de teatru, atol de cini, atol de televisión, narrador y atol
Añus ativu	desde 1998
Estrumentu	Violonchelo
Destincionis	Audie Award for Best Female Narrator Primetime Emmy Award for Outstanding Actress in a Short Form Comedy or Drama Series (2019)

Rosamund Mary Ellen Pike (Hammersmith, Ingalaterra, 1979), es una atrís británica de cini i televisión, qu'á síu nombrá a varius premius dentri los qu'estan el Óscar, el Grobu d'Oru, el BAFTA i el premiu SAG i tous ena crassi de mejol atrís.

Biografía

La su nacencia hue en Hammersmith n'Ingalaterra nel añu 1979 i era la única ija de Caroline i Julian Pike, dambus dos cantantis d'ópera. Assestió al Badminton School en Bristol anantis de estuyal literatura ingresa en Wadham College, Oxford. Pallí le dió los sus estuyus Bernard O'Donoghue, el ganaol del Premiu Whitbread, i Robert J.C. Young, el anombrau teóricu poscoloñal. Hue una estuyanti brillosa i conseguió un primel lugal enos sus dessámis del primel añu, que sonin conocíus comu Moderations. Endispués d'estal un añu p'acontinal cona su carrera comu atrís, golvió p'acabijal los sus estuyus i agencial-si el su títulu nel añu 2001.

Anduvu habrandu por dos añus col atol Simon Woods, al que conoció ena nuversidá, peru aluspués, nel añu 2005 esmençó a salil col diretol Joe Wright, que le hizu comprometimientu nel lagu Como en Italia, en setiembri del añu 2007, peru la collera acabijó l'avencia nel 2008, endispués d'adial el casoriu. En deziembri del añu 2009 s'arrejuntó col impresariu Robie Uniacke, qu'era deziochu añus mas grandi qu'ella. En hebreru del 2012 anunciarun que andavan asperandu'l su primel iju i dió a lús al su iju el seis de mayu del 2012. Aluspués, en juñu del 2014 la atrís anunció qu'asperava a sotru iju del su ombri i el dos de deziembri del 2014 dió a lús al su segunderu iju mentau comu Atom.

Á síu conocía entrenacionalmenti polos sus pessonagis dela villana Miranda Frost ena penícula de James Bond Die Another Day, Jane Bennet en Pride and Prejudice nel 2005 i Amy Dunne en Perdida. Ena televisión, dissalin los sus papelis en A Rather English Marriage nel 1998, Wives and Daughters nel 1999, Love in a Cold Climate nel 2001, State of the Union nel 2019 o The Wheel of Time nel 2021 i mas. Tamién pareció comu Sarah Beaumont nun epissodiu dela serii Foyle's War nel 2002. Ogañu vivi en West End, es una alvertía tocandu'l violonchelu i palra con fruidés alemán i francés.

Correúra profissional

Mentris andava entavía en Oxford, entrepetó i derigió angunas obras de teatru, mesmamenti una de Simon Chesterman, qu'antoncis era un estuyanti de posgrau. Hizu paricionis en pogramas dela televisión británicus, encruíus A Rather English Marriage nel 1998, Wives and Daughters nel 1999 i la miniserii Love in a Cold Climate nel 2001. Tamién pareció nel 2002 comu Sarah Beaumont nun epissodiu dela serii Foyle's War.

Rosamund nel 2010, nel festival entrenacional de cini en Torontu.

Endispués de graual-si, le brindarun un papel comu zagala Bond i agenti del MI6 assisná pa ayual a James Bond ena penícula Die Another Day. Tamién pareció nel pograma Bond Girls Are Forever i endispuesinu, nel omenagi BAFTA ala serii de penículas de James Bond. Alogu, entrepetó a Elizabeth Malet en The Libertine nel 2004, coprotagonizá por Johnny Depp, pola que ganó el premiu del Cini Endependienti Británicu ala mejol atrís de repartu. Essi mesmu añu, entrepetó tamién a Rose en Promised Land, una penícula sobri Israel i protagonizó ala centífica Samantha Grimm ena adatación al cini dela serii de juegus del computaol mentaus comu Doom.

Nel 2005, pareció comu Jane, la ermana mas grandi de Elizabeth, entrepetá por Keira Knightley, en Ergullu i prejuíziu. Alogu, protagonizó la adatación al cini dela novela Fugitive Pieces d'Anne Michaels. Entrepetó tamién a una dessitosa avogá ena penícula Fracture, junta Anthony Hopkins i Ryan Gosling. Nel 2008, protagonizó las obras de teatru Hitchcock Blonde de Terry Johnson i Summer and Smoke de Tennessee Williams, dambas dos nel West End de Londri i Gas Light nel Old Vic Theatre de Londri. Nel 2009, entrepetó el pessonagi prencipal de Madame De Sade pola temporá del West End de Donmar. Nel 2010, pareció ena penícula británica Made in Dagenham i ena penícula canadiensi Barney's Version aondi entrepetava a Miriam. Essi mesmu añu, protagonizó una produción de Hedda Gabler nuna gira pol Reinu Uníu. Tamién gravó el trebaju de vos pa un papel prencipal ena penícula Jackboots on Whitehall nel 2010 i emprestó la su vos pa una serii d'udiulibrus de James Bond, mentaus comu The Spy Who Loved me.

Nel 2012, entrepetó el papel dela Reina Andrómeda, dela mitología, ena epopeya de fantesía Wrath of the Titans i rempraçó a Alexa Davalos, que avía hechu'l papel en Furia de titanes, peru avía abandonau devíu a un conflitu de pogramación. Amás, entrepetó a Helen Rodin, la protagonista feminina junta Tom Cruise nel thriller mentau Jack Reacher, una adatación dela novela One Shot de l'escrevienti Lee Child. La penícula tuvu una receción crítica derechera i agenció mas de dozientus deziochu millonis de dolaris.

Pike junta Ben Affleck ena presentación de Gone Girl.

Protagonizó el thriller sicológicu Gone Girl nel 2014, derigiu por David Fincher, una adatación al cini dela novela del mesmu nombri de Gillian Flynn i junta Ben Affleck, entrepetó a Amy Dunne. Sigún Fincher, hue el su primel elegimientu pa esti papel, pos quería algunu que no huera anombrau, pos ella no avía pareciu en nengún papel prencipal emportanti anantis de l'esmiençu dela penícula, que s'inaguró nel LIII Festil de Cini de New York, aondi la penícula i la entrepetación della tuvierun grandis alabanças dela crítica.

Dendi'l 2015, emprestó la su vos a Lady Penelope Creighton-Ward ena nueva vessión de Thunderbirds Are Go producía por ITV Studios por juntu con Weta Workshop. En hebreru del 2016, protagonizó el vídiu musical de Voodoo in My Blood de Massive Attack i nel 2018, hue escogía comu la corresponsal dela guerra Marie Colvin en A Private War, derigía por Matthew Heineman i basá en Marie Colvin's Private War, un artícalu de Vanity Fair escrevíu por Marie Brenner. Nel 2019, hue escogía pal papel de Moraine ena adatación de Amazon Prime Video dela eúrica fantesía de Robert Jordan en The Wheel of Time, que s'inaguró en novembri del 2021. Dendi antoncis á pareciu enas dos temporás inagurás de The Wheel of Time.

Nel 2021, entrepetó ala estafaora Marla Grayson, nel thriller policial I Care a Lot, derigíu por J Blakeson i coprotagonizau por Peter Dinklage, Eiza González i Dianne Wiest. La su entrepetación acebió grandis alabanças. David Rooney de The Hollywood Reporter dixu que Rosamund Pike aporta una eficacia crara i una enespressiva de no moralidá a un tutol leal. Papel pol que ganó el premiu Grobu d'Oru ala mejol atrís de comedia o musical. Amás, protagonizó i hue produtora executiva del podcast de fición estórica d'ochu epissodius ¡Edith!, que dramatiza un pedíoru duranti la presiencia de Woodrow Wilson, quandu queó incapás por un derramu nel celebru i la Primel Dama Edith Wilson tomó el mandu del poel mentris s'endonava'l su ombri. Clark Gregg entrepeta'l papel del presienti Woodrow Wilson i Esther Povitsky entrepeta a Trudy Grayson, qu'era la mejol amega dela Primel Dama. Nel 2022, s'anunció que protagonizaría'l segunderu largumetragi de Emerald Fennell, la penícula Saltburn.

Filmografía

Cini

Añu	Títulu	Papel	Notas
2002	Die Another Day	Miranda Frost
2004	Promised Land	Rose
2004	The Libertine	Elizabeth Malet
2005	Pride & Prejudice	Jane Bennet
2005	Doom: la puerta del infierno	Samantha Grimm
2007	Fracture	Nikki Gardner
2007	Fugitive Pieces	Alex
2009	An Education	Helen
2009	Surrogates	Maggie Greer
2010	Burning Palms	Dedra Davenport
2010	Jackboots on Whitehall	Daisy	Vos
2010	Barney's Version	Miriam Grant-Panofsky
2010	Made in Dagenham	Lisa Hopkins
2011	The Organ Grinder's Monkey	Rochelle	Cortumetragi
2011	Johnny English Reborn	Kate Sumner
2011	The Big Year	Jessica
2012	The Devil You Know	Zoe Hughes
2012	Wrath of the Titans	Reina Andrómeda
2012	Jack Reacher	Helen Rodin
2013	The World's End	Sam Chamberlain
2014	A Long Way Down	Penny
2014	Hector and the Search for Happiness	Clara
2014	What We Did on Our Holiday	Abi McLeod
2014	Gone Girl	Amy Elliott Dunne
2015	Devolver al remitente	Miranda Wells
2016	A United Kingdom	Ruth Williams
2017	The Man with the Iron Heart	Lisa Von Osten
2017	Hostiles	Rosalie Quaid
2018	Beirut	Sandy Crowder
2018	Entebbe	Brigitte Kuhlmann
2018	A Private War	Marie Colvin
2019	The Informer	Wilcox
2020	Radioactive	Marie Curie
2020	I Care a Lot	Marla Grayson
2021	Evidence of it All	Narraol	Vos en cortumetragi
2023	Saltburn	Elspeth Catton
2024	Hallow Road	Mairi	Posprodución

Televisión

Añu	Títulu	Papel	Notas
1998	A Rather English Marriage	Celia	Penícula
1999	Wives and Daughters	Lady Harriet Cumnor	Miniserii
2000	Trial & Retribution	Lucy	Epissodiu: Trial & Retribution IV Parti 1
2001	Love in a Cold Climate	Fanny	Miniserii, dos epissodius
2002	Foyle's War	Sarah Beaumont	Epissodiu: The German Woman
2002	Bond Girls Are Forever	Ella mesma	Decumental
2008	The Tower	Olivia Wynn	Penícula
2009	Freefall	Anna	Penícula
2009	Yesterday We Were in America	Narraora
2011	Women in Love	Gudrun Brangwen	Penícula
2015 - 2016	Thunderbirds Are Go	Lady Penelope	Vos, catorzi epissodius
2019	Archibald's Next Big Thing	Narraora	Vos, trezi epissodius
2019	State of the Union	Louise	diés epissodius
2020	Moominvalley	Moominmamma	Vos, ventisseis epissodius
2021 - presente	The Wheel of Time	Moraine Damodred	Repartu Prencipal
2024	3 Body Problem	No es atrís	Produtora executiva

Teatru

Añu	Obra de teatru	Papel
2002	Hitchcock Blonde	The Blonde
2006	Summer and Smoke	Alma Winemiller
2009	Madame de Sade	Renee
2010	Hedda Gabler	Hedda Gabler

Podcast

Añu	Títulu	Papel	Notas
2021	Edith!	Primel dama Edith Wilson	Tolos epissodius i tamién produtora executiva
2023	People Who Knew Me	Connie Prynne/Emily Morris	Tolos epissodius
	Mother, Neighbor, Russian Spy	Narraol	Tolos epissodius

Premius i nombracionis

Premius Oscar

Añu	Géneru	Penícula	Resultau
2015	Mejol atrís	Perdida	Nombrá

Premius BAFTA

Añu	Géneru	Penícula	Resultau
2014	Mejol atrís	Perdida	Nombrá
2023	Mejol atrís de repartu	Saltburn	Nombrá

Premius BIFA

Añu	Géneru	Penícula	Resultau
2004	Mejol atrís de repartu	The Libertine	Ganaora
2009		An Education	Nombrá
2010		Made in Dagenham	Nombrá

Premius Grobus d'Oru

Añu	Géneru	Penícula	Resultau
2015	Mejol atrís en Drama	Perdida	Nombrá
2019		A Private War	Nombrá
2021	Mejol atrís en Comedia o Musical	I Care a Lot	Ganaora
2023	Mejol atrís de repartu	Saltburn	Nombrá

Premius Primetime Emmy

Añu	Géneru	Serii	Resultau
2019	Mejol atrís dun cortu de comedia o drama	State of the Union	Ganaora

Premius del Sendicatu d'Atoris

Añu	Géneru	Penícula	Resultau
2010	Mejol repartu	An Education	Nombrá
2014	Mejol atrís	Perdida	Nombrá

Premius Sant Jordi

Añu	Géneru	Penícula	Resultau
2015	Mejol atrís de penícula estrangera	Perdida	Ganaora

Atijus p'ahuera

• En Commons ai conteníu multimedia sobre Rosamund Pike.
• vídius de Rosamund Pike
• Rosamund Pike en The Libertine
• Entrevistá por Peter Frase

• Datos: Q230004
• Multimedia: Rosamund Pike / Q230004