Napoleón I de Francia

Dendi Güiquipeya
Napoleón I, por Andrea Appiani
Napoleón I, por Andrea Appiani

Napoleón Bonaparte (15 d'agostu, 1769; 5 de mayu, 1821) hue un milital, general, governanti i emperaol de Francia.

Nacencia i familia[Edital | Editá'l códigu]

Napoleón tuvu nacencia col nombri Napoleone di Buonaparte en Ajaccio, Córcega. Iju de Carlo Buonaparte, un avogau i políticu i la su mujel, Marie-Letizia Buonaparte. Los Buonapartes huerun una familia que pertenecía ala nobleza corsa. Napoleón muó el su nombri pa gorvé-lu más francés.

Carrera milital[Edital | Editá'l códigu]

Napoleón hue escapás d'entral ena academia milital de Brienne en 1779. Hue ala Parisian École Royale Militaire en 1784 i se graduó al sotru añu comu segundu tenienti d'artillería.

Napoleon pasó muchu delos ochu añus siguientis en Córcega. Allí jugó una papel ativu en temas políticus i militaris.

En 1789 estalla la Revolución Francesa, que provocó muncha inestabilidá enos añus siguientis en Francia. El primel papel destacau que tuvu hue nel asediu de Toulón, ondi vía desembarcau una frota anglu-española. Participó nel defendimientu del Palaciu delas Tullerías contra los contrarrevolucionarius que se levantarun contra la Convención el 3 d'outubri de 1795. Al añu siguienti va pa Italia pa tomal el control delas tropas francesas destinás allí. N'Italia derrota a las tropas austriacas i organiça los territorius allí conquistaus ena llamá Repúbrica Cisalpina.

Napoleón se casa con Josephine de Beauharnais el 9 de marzu de 1796.

En mayu de 1798, Napoleon hue enviau pa Egitu i Siria. Buscava conquistal esas provincias otomanas pa enfrontilá-si al Imperiu Británicu en Índia i defendel los derechus comercialis de Francia; el proyeutu hue acetau pol Diretoriu tamién pa alexal a Napoleón de Francia, ya que vía mieu deque consiguiera demasiau poel. La campaña de Egitu acabó con un fracassu milital. Golvió a Francia, ondi participó nel golpi d'estau de 18 de Brumariu (8 de noviembri de 1799), instaurandu el Consulau i huendu nombrau primel cónsul. En 1802 se convirtió en cónsul vitaliciu.

Cónsul i Emperaol de Francia[Edital | Editá'l códigu]

Cuairu de Napoleón comu Primel Cónsul en 1802

Ya comu governanti consiguió la vitoria ena Batalla de Marengu contra los austriacus, i la firma en 1801 del Tratau de Lunéville i al añu siguienti del Tratau d'Amiens, cona que se llegava ala pas temporalmenti n'Uropa.

Bonaparte hizu reformas a nivel internu; por exempru, las muacionis a nivel legal cona aprevación del Códigu Napoleónicu. En 1804 se corona emperaol, acreciendu assina el su poel.

Uropa no estuvu en pas duranti munchu tiempu. Napoleón i Francia s'entrentarun en varias guerras contra las coalicionis dominás por potencias comu Áustria, Gran Bretaña, Russia i Prusia. Destaca la su vitoria ena Batalla d'Austerlitz (1805).

Tamién sufrió derrotas, comu la vitória dela armá británica ena Batalla de Trafalgar, que le dió alos británicus el control del mari.

En 1808, Napoleón envadi la península Ibérica, buscandu el control d'España i Portugal, i coloca nel tronu d'España al su ermanu José. Estu causó el escomiençu duna guerra d'endependencia contra los francesis.

El 11 de Marzu de 1810, Napoleon se casa cona su segunda mujel, Marie-Louise.

Caía i dessiliu[Edital | Editá'l códigu]

En 1812, estalla la guerra con Russia. Napoleón inicia l'envasión del país. Los russus recularun i las huerças de Napoleón llegarun a Moscú. En pesal destu, l'exércitu de Napoleón nu hue escapás de derrotal alos russus, que llevarun a cabu una estrategia de tierra quemá. La rigurosidá del iviernu russu i la contraofensiva enemiga causó al exercitu de Napoleón munchas baxas. Finalmenti hue derrotau ena Batalla delas Nacionis polos exercitus de Russia, Prusia i Austria, entri otrus reinus.

Nel 30 de marçu de 1814 París se rindió. Napoleón dexó el poel en Francia el 11 d'abril de 1814. Hue dessiliau pala isla d'Elba nel Mari Mediterráneu.

Los 100 días[Edital | Editá'l códigu]

Napoleón huyi d'Elba i desembarca por sorpresa en Francia el 1 de marzu de 1815. Consiguió el sostribu del exércitu i golvió a governal en Francia duranti un periodu de 100 días. Finalmenti hue derrotau por una nueva coalición de potencias uropeas ena Batalla de Waterloo.

Segundu dessiliu i muerti[Edital | Editá'l códigu]

Napoleon hue dessiliau esta ves pala isla de Santa Helena ena costa d'África nel Océanu Atlánticu. Murió allí el 5 de mayu de 1821, possiblimenti de canci d'estógamu enque angunas envestigacionis án descubiertu nel su cuerpu grandis cantidais d'arsénicu, lo que indicaría que púu vel muertu envenenau.