Perú

Dendi Güiquipeya
Perú
Bandera Escú
Lengua oficial castellanu, quechua, aimara, otras luengas nativas.
Capital Lima
Presidenti Dina Boluarte
Primel Menistru Alberto Otárola
Congresu Presiente del Congreso:
José Williams
Cumprimentu
 - Total
 - 0,4% augua
Posición 19ª
1.285.215,6 km²
Puebración
 - Total (2017)
 - Densiá
Puestu 40º
32 102 723
24 ab/km²
PIB
 - Total (2016)
 - PIB/capita
Posición 38ª
286.728 millonis e US$
Monea Sol PEN
Inu Himno Nacional del Perú
Domiñu Internet .pe
Cóigu telefónicu +51
Biembru de: Unasur, ONU, OEA, APEC, CAN, Mercosur, BID, Grupo de Río, FLAR, CAF, OEI

El Perú [peˈɾu] (en quechua i aimara: Piruw) oficialmenti la Repúbrica del Perú, es un país d'América del Sul, con capital en Lima. Hazi arrayu al norti con Equadol i Colómbia, al esti con Brasil, al sulesti con Bolívia, al sul con Chili i al oesti conel Océanu Pacíficu.

Estória[Edital | Editá'l códigu]

Escomiençus i periou Orizonti Tempranu[Edital | Editá'l códigu]

El territoriu ondi ogañu s'assitia el Perú hue unu los grandis centrus de cevilizacion precolombina. La primel de toas ellas hue la Cultura Caral, que s'assitió alreol el 3000 e.c. La Cultura Chavín se desarrolló pol norti el país entri 800 i 200 e.c. Paeci sel que hue un emportanti centru peregrinacion religiosu[1], enque no dessistió evidencias dun estau conquistaol, huendu la su espanson de naturaleza comercial.

Tamien se desarrolla al sul, entri 700 e. C.–100 d.C, la Cultura Paracas, que se devii en dos periodus, Paracas Cavernas, hata 200 e.c. ena que las tumbas sonin suterranias i tiene holma de copa envertia. A partil d'altoncis, el desarrollu las necrópolis llevó a la otra etapa, Paracas Necrópolis, hata 100 d.c. Los Paracas emplearun la momificacion, i arcançarun gran grau de domiñu ténicu nel elaboraeru de tejíus. Tamien destacarun en medecina, i comu se ve praticarun albondu trepanacionis.

Orizonti meiu[Edital | Editá'l códigu]

Nel norti apaeci la Coltura Mochica que se carateriça por un desarollu la agricoltura i tamien de la pesca i la navegacion. Tamien se carateriza por sel un periodu runchas, nel que apaeci una jefatura establecia i ereditária. Tuvun un gran desarrollu la cerámica, las sus representaciones mas emportantis están relacionás, cona guerra, la muerti i el erotismu.

Se desarrolla tamien la Cultura Nazca, sucesora de Paracas. Nesta cultura destacan las misteriosas línias de Nazca, arrepresentacionis de destintas figuras que namás se puein vél dendi el cielu.

Entri 700 i 1200 s'espandi la Cultura Wari, que holmó un empériu que dominó gran parti el área andina. Al atrás la su caía surgió el réinu Chimu nel norti, cuya capital, Chan Chan hue la ciá mas grandi d'América. Por sul se desarrolla la Coltura Chancay.

Empériu Inca[Edital | Editá'l códigu]

Finalmenti acabará destacandu el pueblu de los incas, el cual házia el sigru XV conquistó tolos puebruss andinus entre los rius Maule i Ancasmayo, arcançandu un área cercana a los 3 millonis de km², ogañu assitiá enos territorius del sul de Colómbia, el ocienti d'Equadol, Perú, Bolívia, el norti Chili i el noroesti d'Argentina, conhormandu lo que se conoci como Empériu incaicu. La su capital hue el Cuzco, assitiá ena sierra sul peruana. Amás del su poeriu melital, destacarun en arquitetura, construyendu albondu estruturas como la ciudadela de Machu Picchu, i un güen sistema de comunicacionis, que premitierun un huerti control por parti la autoriá.

Conquista i periou colonial[Edital | Editá'l códigu]

A meyaus el sigru XVI, la conquista encabeçá por Francisco Pizarro, aprovechó la guerra cevil entri Huascar i Atahualpa, últimus Inca, pa, con apoyu d'angunus puebrus enemigus al Empériu incaico, conquistarun el su territoriu pala Monarquia española; al atrás la toma del Cuzco i la hundacion de Lima estampanó la Guerra Cevil entri los conquistaoris pol repartimientu de las encomiendas del nuevu territoriu. En 1542, s'estableció el Virreinatu del Perú, qu'en un escomiençu albarcó de iure un espaciu geográficu dende lo que ogañu es Panamá ata el estremu sul del continenti. El nuevu ordin provocó un nuevu levantamientu conociu como la Rebelion de los Encomenderus. Ena década de 1570, el virrei Francisco de Toledo reorganiça el territoriu pacificandu el país de las guerras entestinas i culminandu cona resisténcia incaica.

El empériu español senificó pa el Perú una prohunda transformacion social i económica. S'emplantó un sistema mercantilista, sosteniu pola mineria del oru i la prata, de Potosí prencipalmenti, el monopoliu comercial i la esplotación de la manu d'obra indígena baju una horma de mita.

A caberus el siglo XVII i enicius el XVIII, la recaudacion de la Corona decayó pol declivi de la mineria i la diversificacion económica, assín como el contrabandu comercial. Nesti contestu, huerun empuestas las Rehormas Borbónicas nel país, que restarun poel políticu a la éliti limeña i afetarun económicamenti al comerciu enternu, lo que produju diversus levantamientus de los cualis el de mayol repercusion hue la rebelion de Túpac Amaru II; esta última llegó a ponel en peligru el gobielnu virreinal nel Cuzco, pero al golvel-se a la contra los criollus , precipitó la su derrota. Al atrás la muerti de José Gabriel Túpac Amaru, la cultura endígena hue huertementi reprimia polas autoriais borbónicas, pero no pudierun enpidil que no muchu tiempu endespues se destendieran las ideas emancipatorias.

Endependencia[Edital | Editá'l códigu]

El 28 júliu de 1821, el movimientu endependentista dirigiu pol general argentinu José de San Martín, provenienti de Chili, decraró la endependencia i enstauró un nuevu estau: la Repúbrica del Perú. El primel congressu peruanu se constitui el 20 setiembri de 1822. Mas tardi, en 1824 el general veneçolanu Simón Bolívar al atrás las sus vitorias enas batallas de Junín i Ayacuchi, el 6 agostu i 9 diziembri de 1824, acetó la capitulacion de las tropas realistas assitiás ena sierra sul, terminandu con el Virreinatu del Perú.

Repúbrica[Edital | Editá'l códigu]

Los primerus añus d'endependencia se desarrollarun entre ruchas caudillescas organizás polos melitaris pa arcançal la Presiencia de la Repúbrica. En este contestu, entre 1836 i 1839, se conholmó la Confederacion Perú-Boliviana, disuelta alogu de la derrota de Yungay contra el Ejércitu Uniu Restauraol.

Los runchaerus entre caudillus acontinarun ata el primel gobielnu constitucional del mariscal Ramón Castilla, quien puu restrutural i ordenal el Estau grácias a la güena situacion económica generá pola esportacion del guanu de las islas de la costa. En 1865, se produju una luchi con España pola ocupacion de las Islas Chincha, pa presional al gobielnu peruanu, lo que este gobielnu enterpretó como un atu de guerra. Chili i Equadol, decidierun apoyal al Perú pala su defensa, i mentris la escuadra española bloqueó los puertus del Callao i Valparaíso. El conflitu se destendió ata el definitivu Combati del 2 Mayu (1866), cuando España atacó el puertu del Callao, pero al final tuvu que retiral-si i ejal las áuguas sulamericanas.

En 1879, cona declaratoria de guerra al Perú por parti de Chili, escomençó la Guerra del Pacíficu. El casus belli hue el runchaeru entre Bolívia i Chili por un probrema d'empuestus en el cual el Perú se vio comprometiu por el Tratau d'Alianza Defensiva firmau con Bolívia en 1873. En una primera etapa de la guerra, la campaña naval, se repelió por mari el ataqui chilenu ata el 8 outubri de 1879, nel combati naval d'Angamos, en ondi s'enmoló, estandu a runchal contra 6 barcus de guerra enemigus, el almiranti AP Miguel Grau Seminario al mandu del monitol Huáscar. Alogu de vencel a la escuadra peruana, Chili escomiença la campaña terrestri de la guerra. La primel acion es el desembarcu de Pisagua i se desarrolló duranti quatru añus, ata que alogu del Manifiestu de Montán, el gobielnu ilegítimu de Miguel Iglesias, elegiu pol ejércitu envasol chilenu, firmó el Tratau d'Ancón que senificó el acaberu de la guerra, a pesal de la oposicion del gobielnu de Lizardo Montero i la resistencia ena sierra peruana comandá por Andrés Avelino Cáceres, el denominau Brujo de los Andes.

Endespues de la guerra, se inició un periou de "Reconstrucion Nacional" que, enque de relativa tranquiliá, no conoció la reativacion económica ni la pas política ata 1895 cona presiencia de Nicolás de Piérola. Con el gobielnu de Piérola, se materializó una política pluto-aristocrática con unas crassis alta i meya que vivian acomodadamenti al auspiciu de los grandis capitalis estauniensis i un puebru llanu con albondu carencias, frenti a las cualis reclamarun, prencipalmenti anti las malas condicionis de trebaju. Esta época, conocia comu de la Repúbrica Aristocrática, acabijó cona asunción d'Augusto B. Leguía, quien premaneció nel poel duranti onci añus —el Onceniu— con una política paternalista házia los endigenas i la criacion de un brevi periou de güena situacion económica.

El Onceniu de Leguía terminó en 1930 con el populal golpi d'estau de Luis Miguel Sánchez Cerro, qu'enició un periou de gobielnus melitaris i d'aparicion de movimientus popularis –comu el APRA o el PCP– en el escenariu políticu. Al final d'esti trecel melitarismu se sucedierun presientis democráticus enterrumpius primeru pol Ocheniu de Manuel Odría i un brevi golpi melital pa acontinal cona sucesion presiencial. Házia los añus 1950 s'enicia el éssodu rural, prencipalmenti dende la sierra házia las ciais de la costa, en el landeaeru de mejoris condicionis de via.

De holma gradual, duranti los años 60 la crisi política se hizu patenti, lo que provocó en 1968 la llamá Revolucion de las Huerças Armás, la toma del poel políticu por parti de las huerças armás al comandu del general Juan Velasco Alvarado con un mensagi antiemperialista, especialmenti anti-estauniensi, i antioligarca. S'enstauró assín un régimin que empulsó várias i prohundas reholmas de diversus resultaus que, globalmenti i a largu plaçu, tuvun un empactu prencipalmenti negativu ena economia nacional. Házia caberus de los 70, el gobielnu melital con tolas reholmas proucias s'alcontrava frenti a la crisi económica, a pesal del cámbeu de mandu ena cúpula melital i que la presiencia via siu asumia pol General Francisco Morales Bermúdez en el añu 1975. A pesal d'essu, se dio el fin de la revolucion i se retornó a la democracia. Se redató altoncis una nueva constitucion meyanti una Assamblea Constituyenti en 1979 i se convocó a elecionis en 1980.

Alan García.

Duranti la década de 1980, el Perú entró en una huerti crisi económica i social, debiu al descontrol del gastu fiscal, una considerabli deuda esterna i la crecienti enflacion juntu con el runchaeru armau enternu, acentuá pola aparicion de las balburdas terroristas d'enspiracion comunista que pretendian enstaural un nuevu Estau meyanti la luchi armá, como Senderu Luminosu primeru i el MRTA endespues. El terrorismu obtuvu una respuesta represiva de las huerças armás, la policia primeru i el ejércitu endespues. Los combatis entri dambus a dos bandus senificó la muerti d'alreol de 70 mil pressonas entri combatientis i campesinus. La crisi entró ena su fasi mas crítica a caberus de la década, duranti el primel gobielnu d'Alan García Pérez, quandu el Perú entró en una huerti crisi económica debiu al descontrol del gastu fiscal i la consiguienti iperinflacion que llegó a un mássimu de 7.649% en 1990, mentris que Sendero Luminoso ya via encursionau enas grandis ciais del país, dándu-si la fasi mas dura del runchaeru armau enternu.

En meyu de una crecienti impopulariá telmina el primel gobielnu d'Alan García, huendu ligiu enas elecionis de 1990 Alberto Fujimori, que dende los escomiençus del su mandatu alcontró una huerti oposicion en el Congressu por parti d'APRA i del FREDEMO.

El 5 abril de 1992, el presienti Alberto Fujimori provocó la crisi política en el Autogolpi de 1992 quandu disolvió las dos cámaras del Congressu i convocó a una assamblea constituyenti pa enstaural una nueva constitucion política. Al mesmu tiempu, enició el arrecuperaeru económicu medianti una política de shock económicu. Duranti el su gobielnu, se prouju un processu de corrupcion del Estau en conjuntu –que llegó a sel calificá de cleptocracia– con el que en essi momentu era Jefi del Serviciu de Enteligencia Nacional, Vladimiro Montesinos. Fujimori logra sel religiu en 1995 i enicia abondas enportantis mejoras macroeconómicas i sociales, enque no consigui solucional la larga recesion económica pola que passava el país resultau de las crisi enternacionalis. Fujimori hue religiu enas elecionis del 2000. Essi mesmu añu renunció a la Presiencia estandu en Japón duranti una gira oficial endespues del escándalu de los vladivideos, que demostrarun la redi de corrucion encabbeçá pol su assesol Montesinos.

El Congressu ligió comu Presienti interinu al congresista Valentín Paniagua, quien llevó a cabu las elecionis del 2001 ondi resultó eletu presienti Alejandro Toledo, quien enició una campaña enternacional pa estradital a Fujimori. El gobielnu de Toledo se caraterizó por acontinal i prohundizal el modelu económicu enplantau por Fujimori, altu crecimientu económicu promediu de 8% anual amás de un craru crecimientu macroeconómicu i la reativacion de la economía. Sin embargu, las deferencias socialis mejorarun pocu i las acusacionis de frivoliá i nepotismu, frecuentis. Toledo hue sucediu pol es-presienti Alan García Pérez en 2006. García á acontinau cona política económica de los gobielnus preceentis, lograndu baja enflacion, un crecimientu notabli de las esportacionis, un umentu sustancial del produtu nacional brutu i un encrementu de las reservas enternacionales sobri los 30 mil millonis de dólaris a caberus de 2008, no essentu de conflitus socialis enportantis comu probremas con el senderismo atijau al narcotráficu i protestas violentas comu el Paru de Moquegua de 2008 o el Baguazo de 2009.

Enas elecionis de 2011 ganó el candidatu nacionalista Ollanta Humala, venciendu a la su rival, Keiko Fujimori, ija d'Alberto.[2]

Atijus[Edital | Editá'l códigu]

  • En Commons ai conteníu multimedia sobre Perú.

Huentis[Edital | Editá'l códigu]

  1. «Archive copy». Archivado desde el original el 24 de noviembre de 2010. Consultado el 6 de noviembre de 2010. 
  2. http://www.elpais.com/articulo/internacional/Humala/llama/unidad/nacional/elpepiint/20110607elpepiint_1/Tes


Paisis d'América
Aití | Antígua i Barbua | Argentina | Baamas | Barbaus | Belici | Bolívia | Brasil | Canadá | Chili | Colómbia | Costa Rica | Cuba | Dominica | Equadol | El Salvaol | Estaus Unius | Grenada | Guatemala | Guyana | Honduras | Méjicu | Nicarágua | Panamá | Paraguai | Perú | Repúbrica Dominicana | Santa Luzia | San Vicenti i las Granainas | San Cristobal i Ñevis | Surinam | Triniá i Tobagu | Uruguai | Veneçuela | Jamaica

Posesionis: Anguilla | Clipperton | Guaalupi | Guayana Francesa | Groenlándia | Islas Bermuas | Islas Caicus | Islas Caimán | Islas Malvinas | Islas Sandwich el Sul | Islas Turquas | Montserrat | Martinica | Puertu Ricu | Shag Rocks