Toleu

Dendi Güiquipeya
Sartal a: Güiquipeandu, Landeal
Cscr-featuredtopic.svg

Categoria:Endirguis destacaus

Gnome-globe.png39° 51′ 23.5″ N, 4° 1′ 30.4″ W

Toleu

Bandera e Toleu Escú armas de Toleu
Toledo PuertaBisagra.jpg
Nombri oficial {{{nombri_oficial}}}
País Flag of Spain.svg España
Comuniá Autónoma Castilla-La Mancha
Província Toleu
Província Toleu
Comarca {{{Comarca}}}
Ciá {{{monicípiu}}}
Coigu postal 45001-45009
Supifícii 232,1 km²
Artitú 529 msnm.
Longol 71 km a Mairil
Puebración 80.810 ab. (2008)
Gentilíciu Toledanu/a
Toletanu/a
toletensi
Rius Tahu
Página web www.ayto-toledo.org
Toledo.png

Toleu (el latín Toletum; en árabi: Ṭulayṭulah); en hudiuespañol Toldoth -puebrus, en ebreu-; en mozárabi: Tolétho) es una ciá assitiá ena España central, capital de la província hucheá e la mesma horma i e la comuniá autónuma e Castilla-La Mancha. Amás, el municipiu es consierau individualmenti cumu una comarca ena división hecha pola Diputación Províncial[1].

La ciá s´alcuentra ena marhin derecha e riu Tahu, nun monti e cien metrus d´artura sobri el riu, el cual la bordea pola su basi, hormandu un prenunciau meandru conociu cumu tornu el Tahu.

Tamién s´alcuentra esti nombri en varias ciáis enus Estaus Unius, la mas famosa assitiá en Ohio, asín cumu en Belici, Brasil, Colómbia o Hilipinas.

Geografia[eital | edit source]

Clima[eital | edit source]

Climugrama e Toleu (Buenavista)

Toleu tiini un clima meiterráneu con tendencia continental, con mu escasas lluvias que se concentran en primavera i a finalis el otoñu, con sequía estival acusá i emportanti oscilación térmica diaria. Las temperaturas son frescas en ivielnu, con yelás frecuentis inque menoris qu´en otras zonas de la rehión, i artas en vranu, con máisimas que normalmenti superan los 40º.

Puebración[eital | edit source]

Fatoris cumu el aumentu el preciu dela vivienda en Mairil i la mejora delas comunicacionis, que assitian a Toleu a solu veinti minutus de la estación d´Atocha de Mairil gracias al Tren d'Alta Velocidá, an prevocau un huerti aumentu dela puebración toleana enos úrtimus añus.

Estoria[eital | edit source]

Alcázar de Toleu.
Catedral de Toleu.
Vista heneral de Toleu.

Estoria antigua[eital | edit source]

El primel asentamientu fihu el que se tiini conocencia ena uguañoti ciá e Toleu es una seri e castrus, sobri los que aluspués se hormó la ciá celtibérica amurallá, unu e los mas emportantis centrus de los carpetanus. Unu d´estus primerus asentamientus s´assitia nel «Cerro del Bú» ("Lombu el Bú"), un lombu e la orilla gocha e riu Tahu, nel que s´an conseguiu abondus restus en escavacionis realizás, i que se puein vel nel uguañoti Museo-Hospital de Santa Cruz, en Toleu.

Nel añu 193 eC, i endispues una gran resistencia, Marco Fulvio Nobilior conquista la ciá. Los romanus la recostruyun i la hucheun Toletum, ena província Cartahinensi. La ciá esarrolló una emportanti endustria el yerru que la llevó a creal moneas. La zona ondi s´assitiaba la ciá sufrió un hondu procesu e romanización, cumu atestiguan los numerosus restus de villas romanas, especialmenti ena ribera e Tahu. Los romanus ehun abondus restus ena fas toleana, entri ellus un imponenti acuedutu, uguañoti destruiu ena su totaliá.

Estoria medieval[eital | edit source]

Aluspues los primerus ataquis bárbarus, se golvierun a eifical las antiguas murallas con ohetivus defensivus; aún con esu, nel añu 411 hue conquistá polos alanus, quienis huerun a la su vezi vencius polos visigous nel añu 418. Una vezi venciu Agila I, Atanagildo assitió la su corti ena ciá i posteriolmenti, con Leovigildo, se convirtió en capital el reinu ispanugou i en arzobispau, colo que tomó gran emportancia cevil i relihiosa (cumu preban los "Concilius de Toleu"). Mu cerca e Toleu, ena villa e Guadamur, s´alcuentró el "Tesoro de Guarrazar", escecional conhuntu e coronas votivas de los reis visigous.

Nel añu 711 hue conquistá pol Tarik i pasó a hormal parti el domeñu musulmán, perdiendu la capitaliá. Los árabis la hucheun Tulaytulah (en árabi طليطلة).

El predomeñu la puebración mozárabi la convirtió mu plontu en un focu e continus pobremas pa Córdoba. En 797 (sigún Claudio Sánchez Albornoz en 807, i 800 sigún Julen García López), duranti el emiratu d´Alhakán I, tuvu lugal un levantamientu contra Córdoba. El emir envió al muladí oscensi Amrús ben Yusuf (conociu como Amorroz enas crónicas cristianas) pa sometel la ciá. Amrús diesmó a los muladís localis meyanti un cruel ardid. Se trata el sucesu conociu cumu la "jornada del foso". Amrús organizó una fiesta nel palaciu el gobernaol i envitó a manducal a los muladís prencipalis de la ciá. A las puertas la resiencia, hizu assitial unus verdugus i, a miía que diban chegandu los envitaus, se les cortaba el cuellu, siendu tirau el cadável a una trinchera (velaquí el polque el nombri con que se tiini conocencia d´esti episodi). D´esta horma, el emir consiguió sometel pol un tiempu a los toleanus. Nu ostanti, éstus golviun a rebelalsi nel 811 i nel 829, aluspues de bel espenau.

Finalmenti, Abd al-Rahman III acabihó cola rebelión de la ciá e Toleu (juliu de 932), aluspués dun asediu e dos añus, ehándula bahu el califatu cordubés. Al cayel el califatu (sigru XI), Toleu se convirtió nun emportanti reinu e taifa, que nu ostanti, tuvu que pagal parias a los reis de Castilla pa conserval la su endependencia.

El 25 e mayu e 1085, Alfonso VI de Lión i Castilla entra en Toleu, medianti un alcuerdu previu con el Taifa que la gobernaba. Meyanti el alcuerdu e capitulación, el rei castellanu i lionés someti el reinu garantizandu a los puebraoris musulmanis la seguráncia las sus presonas i posesionis. El rei dió huerus propius a ca una las minorias desistentis: mozárabis (Toleu era un emportanti centru mozárabi, con liturhia propia, la ispanu-mozárabi, qu´entovia se conserva), musulmanis i hudius, posteriolmenti rehundius pol Alfonso VII nel Hueru e 1118. Endispués la conquista e la ciá, chegó el periou e mayol esplendol de Toleu, d´una gran entensiá curtural, social i política. La Escuela e traducioris de Toleu, florecienti duranti los sigrus XII i XIII, asín cumu las numerosas obras d´arti civilis i relihiosas, las cualis ehun una emportanti huella ena ciá.

Tras la conquista, se premitió la prática relihiosa e las comunidais hudia i musulmana, peru esta atitú nu se mantuvu duranti abondu tiempu. Los cristianus costruyun la nueva catedral sobri la mesquita mayol, que a la su vezi s´alcuentraba assitiá sobri la antigua catedral visigoa.

Duranti la guerra civil castellana, Toleu runchó huntu a Pedro I i, aluspués de sufril un largu asediu, hue conquistá en eneru e 1369. Duranti tola Edá Meia la ciá hue creciendu: nel sigru XIV recibió privilehiu ferial, i nel XV se convirtió en unu los prencipalis proucioris pañerus castellanus, ativiá que se sumó a las ya desistentis d´acuñación de moneas, fabricación d´armas, endustria sedera, etc. N´esta espansión participó e horma ativa la puebración hudia, hata la su espulsión en 1492.

Estoria moerna[eital | edit source]

Los Reis Católicus urbanizun i agrandun la ciá, i ena catedral toleana se proclamó a Juana i Felipe el Hermoso cumu erederus de la corona castellana (1502).

Hue una e las primeras ciáis que se uñó a la regüelta e las Comuniáis (1520), con derihentis cumunerus cumu Lasso de Vega i Padilla. Tras la derrota cumunera en Villalar, los cumunerus toleanus, derihius pol María Pacheco, la viuda e Padilla, huerun los que mas resistencia diun a los desinius de Carlos V, hata la su rendición en 1522. Toleu se convirtió en una e las capitalis el imperiu.

Posteriolmenti, cola decisión de tresladal la corti a Mairil, adotá pol el su ihu Felipe II, nel añu 1563, la ciá perdió gran parti el su pesu políticu i social. La ruina e la endustria testil aumentó la decaencia e Toleu, que sigui a la e la propia estoria d´España.

La costitución de la Real Compañía de Comercio y Fábricas (Rial Compañia e Comerciu i Fábricas), en 1748, nel marcu e renovacionis borbónicas ispirás pola Ilustración, trahu un brevi resurhil de la ciá, peru a meyaus el sigru XVIII estaba e nuevu arruiná.

Estoria contemporánea[eital | edit source]

Al estrumpil la Guerra Cevil española, la ciá queó en zona republicana. Nel Alcázar, sei e la Acaemia d´Enfanteria, se queó un grupu e sublevaus al mandu el Coronel Moscardó, que resistió endi el 21 e huliu hata la chegá e las tropas el heneral Varela (28 e setiembri e 1936). Esti episodiu, de resonancia mundial, hue mu gastau pola propaganda franquista. El alcázar, casi completamenti destruiu nel asediu, hue recostruiu totalmenti posteriolmenti.

La ciá es elehia oficialmenti capital de la Comuniá Autónuma e Castilla-La Mancha, tras una votación enas Cortis, el 7 e diciembri e 1983. Pala eleción, el gobiernu rehional encargó a Jose María Barreda un procesu d´enhormación i consulta a la puebración, las istitucionis políticas i las asociacionis curturalis. Ena votación enas Cortis, la propuesta e Toleu recibió la aprebación de 27 diputaus (los 22 socialistas i los cincu el Grupo Popular de Toledo), tres en contra (los popularis conquensis) i 12 astencionis.[2]

Vista panorámica el cascu estóricu e Toleu.

Almenistración[eital | edit source]

L´almenistración de la ciá correspondi al Ayuntamientu, hormau pol 25 concehalis lehius pol sufrahiu universal ca cuatru añus n´una circuscrición única con listas afechás. Enas úrtimas elecionis presentun listas en Toleu cincu partius políticus: Partido Popular (encaezá pol el anteriol alcardi, Jose Manuel Molina), Partido Socialista Obrero Español (encaezá pol el vicipresienti la "Junta de Comunidades de Castilla-La Mancha" i uguañoti alcardi, Emiliano García-Page), Izquierda Unida (Aurelio San Emeterio), Partido Demócrata Español i Tierra Comunera. Los tres primerus partius consigun representación: el PP, doci concehalis; onci el PSOE e IU, dos. Las dos hormacionis de gocha hizun un patu e gobiernu que llevó a la alcardia al candiatu socialista, Emiliano García-Page.

Monumentus[eital | edit source]

Alcázar de Toleu i la puenti e San Martín sobri el Tahu.
Cá El Greco.
  • Castillu e San Servando.
  • Catedral. (Gótica, sigru XIII. Catedral de Santa María de Toledo #El Trasparenti e Narciso Tomé, barrocu.)
  • Monasteriu e San Juan de los Reyes. (Góticu isabelinu, sigru XV)
  • Museo-Hospital de Santa Cruz, renacentista, sigru XVI.
  • Santa María la Blanca. Sinagoga, sigru XII. Estilu muehal.
  • Sinagoga del Tránsito.
  • Hospital de Tavera-Museo Duque de Lerma (Renacentista, el sigru I, influyó ena traza El Escorial).
  • Elesia e Santiago del Arrabal, muehal.
  • Elesia e Santo Tomé. (Muehal, el sigru XIV, ondi s´alcuentra el famosu "El entierro del Conde de Orgaz", El Greco).
  • El Cristo de la Luz, pequeña mesquita-oratoriu hecha nel 999, alogu ampliá con ásidi muehal pala su conversión en elesia.
  • Mezquita de Tornerías, sigru XI.
  • Alcázar, sigrus XVI-XX.
  • Puerta del Sol (Muehal, sigru XIII).
  • Puerta Nueva de Bisagra (De Alonso de Covarrubias, sigru XVI, sobri basi árabi).
  • Puerta Vieja de Bisagra u Puerta de Alfonso VI.
  • Puerta del Cambrón, sigru XVI.
  • San Román (Museu e los Concilius i la curtura visigoa).
  • Ermita del Cristo de la Vega (Muehal, sigru XI).
  • Puenti d´Alcántara.
  • Puenti e San Martín.
  • Posada de la Hermandad.
  • Puerta del Vado.
  • Teatru Rojas
  • Praza e Zocodover.
  • Conventu e Santo Domingo el Antiguo.
  • Circu romanu.
  • Casa el Temple.
  • Torri la Almofala.
  • Conventu e la Madre de Dios.
  • Palacio de Amusco.
  • Palacio Arzobispal.
  • Conventu e San Pedro Mártir.

Pressonahis emportantis[eital | edit source]

  • Doménikos Theotokópoulos (El Greco), pintol.
  • Garcilaso de la Vega, pueta.
  • Juan de Padilla, idalgu i cumuneru.
  • María de Pacheco, nobli castellana i cumunera.
  • Juanelo Turriano, Matemáticu Mayol.
  • Victorio Macho, escurtol.
  • Rafael Canogar, pintol.
  • Alberto Sánchez Pérez, pintol i escurtol.
  • Félix Urabayen, creaol literariu.
  • Ricardo Arredondo, pintol.
  • Mariano Salvatierra, escurtol.
  • Alfonso X el Sabio, rei.
  • Alfonso VI de León y Castilla, rei.
  • Francisco Cervantes de Salazar, escrebiol.
  • Francisco de Rojas Zorrilla, dramaturgu.
  • Jacinto Guerrero, componeol de zarzuelas.
  • Julio Rey, aleta.
  • Federico Martín Bahamontes, ciclista.
  • José Luis González, aleta.
  • Luis Moreno Nieto, perioista i cronista oficial.

Meius de comunicación[eital | edit source]

Ena ciá se pubrican diversus periódicus localis i províncialis. Amás, periódicus nacionalis cumu el ABC pubrica diariamenti una amplia seción local. Entri los periódicus localis destacan "La Tribuna de Toledo", "El Día de Toledo" i el de bardi "Noticias Toledo". Semanalmenti s´eitan las rivistas d´enhormación heneral "Ecos" i "Aquí".

Tamién ai meyus localis en telivisión, arradiu e Internet. En Toleu está la sei central la telivisión púbrica rehional, Castilla-La Mancha Telivisión, amás ai seis telivisionis localis aparti las nacionalis: Localia, Canal Diocesano-Popular TV, Teletoledo, Canal Noticias Continuo, Canal Regional de Noticias i La Tribuna Televisión. En cuantu a emisoris d´arradiu, están la decana "Radio Toledo (Onda Cero)", la "COPE", la "Cadena SER", "Radio Nacional de España", "Radio Castilla-La Mancha" i "Radio Aquí", algotrus arradius son la vecinal "Onda Polígono" i la diocesana "Radio Santa María". Drentu los meyus dihitalis i socialis, "Onda Toledo", "Toledo Mágico" i "Toledo Digital". En lo que pudríamus definil cumu "confidencialis", "El Digital Castilla-la Mancha", "TOLEDOCIO.COM" i "WEBTOLEDO".

Ciáis hermanás[eital | edit source]

Guipa tamién[eital | edit source]

Huentis[eital | edit source]

  1. Comarca e Toleu ena Deputación Provincial
  2. Dorado Badillo, Ángel. Toledo. 20 años de ayuntamiento democrático (1979-1999). Volumen I. Editorial Azacanes. ISBN 84-88480-66-8. Pág. 418-421

Atihus esternus[eital | edit source]

Grupus políticus nel Ayuntamientu[eital | edit source]

Meyus de comunicación[eital | edit source]