Torri de Santa María
| Torri de Santa María | ||
|---|---|---|
| Entidad subnacional | ||
 | ||
 Escudo | ||
 Ubicación de Torri de Santa María | ||
| Coordenadas | 39°15′10″N 6°06′53″O / 39.2528327, -6.114816 | |
| Capital | Torre de Santa María | |
| Entidad | Monicipiu d'España | |
| • País |
 España | |
| Superficii | ||
| • Total | 19 km² | |
| Altol | ||
| • Media | 490 m s. n. m. | |
| Puebración (2023) | ||
| • Total | 529 hab. | |
| • Densidá | 27,84 hab/km² | |
| Huso horario | UTC+01:00 | |
| Código postal | 10186[1] | |
| Sitio web oficial | ||
Torri de Santa María (prenunciau n'estremeñu ['torɪ ðe 'santa ma'ɾia]; en castellanu i oficialmenti, Torre de Santa María) es un monicipiu dela provincia de Caçris, ena comunidá utónoma d'Estremaúra (España). Está assitiau ena Sierra de Montanchi i nel añu 2022 tenía 531 abitantis.[2]
Geografía
[Edital | Editá'l códigu]La Torri de Santa María s'assitia entrimeyas los monicipius d'Aldea'l Canu, ena Ruta la Prata, A-66 i Miajás, ena utovía A-5, qu'uni Mairil con Badajós. Se destiendi ampié dela Sierra de Montanchi i dendi'l puebru puei aportal-si andandu barrera parriba a Montanchi por mé dun caminu de canchus i pieras que costruyerun los romanus. Está assitiá 36 km al sul de Caçris, 50 km al noresti de Méria i unus 30 km al suresti de Trugillu, i hazi arrayu con Montanchi, Valdehuentis, Salvatierra de Santiagu, Çarça de Montanchi i Valdemoralis.[3]
Estoria
[Edital | Editá'l códigu]Sigún el cregu Tirso Lozano Rubio (Montanchi, 1865), la Torri de Santa María hue hundá nel siegru XIII. Sin embargu, las primeras escreturas en que se mienta'l puebru son del siegru XVIII, de quandu esti pretenecía a Montanchi. N'aquellus entocis vivían 148 pressonas, la metá dellas labraoris, i era una villa real, quié izil-si, por lei dependía derechamenti del rei d'España. Tirso Lozano Rubio la descrivi cumu «[una villa] metía nun terrenu llanu, un poquinu rota, assitiá a una legua dela Villa de Montanchi, qu'es la su capital, i a 14 leguas dela Villa de Hornachus. Es rica en trigu i vena, peru lo que más abondeci es el centenu. Ai semillas de tolas crassis, una tupa de ganau —sobritó ovejas, guarrus i vacas—, caça, pesca, vinu, azeiti, frutas, legumbris i sementijas»[4].
Quandu la revolución liberal hondeó col Antiguu Régimi, la Torri de Santa María se golvió un monicipiu costitucional dela nueva España burguesa i escomençó a hazel parti del partíu juizial de Montanchi. Ogañu preteneci ala Mancomunidá Integral Sierra de Montanchi i Tamuja[5].
Puebración
[Edital | Editá'l códigu]| Gráfica de evolución demográfica de Torri de Santa María[6] entre 1842 y 2022 |
 |
|
Población de derecho (1842-1991, excepto 1857 y 1860 que es población de hecho) o población residente (2001-2021) según los Censos de Población desde 1842. Población según el padrón municipal de 2022 del INE. |
La puebración dela Torri de Santa Maria creció duranti la primel metá del siegru XX i alcançó la cumbrera endispués dela Guerra Cevil, peru la falta de trebaju i la revolución del sistema de parieru dela sociedá moerna án causau una deminución mu gorda delos abitantis i el puebru á perdíu dos terceras partis dela puebración en pocu más de 50 añus.
Economía
[Edital | Editá'l códigu]Las atividais conómicas más emportantis dela Torri de Santa María son l'agricoltura i la ganaería. Sin embargu, n'estus añus últimus án perdíu emportancia ya que l'esplotiju dela tierra no rehundi cumu antañu. A más, los zagalis nuevus án empeçau a trebajal n'otrus laus, cumu puean sel las piereras dela comarca i la frábicas de Caçris i Miajás. Tocanti a otrus setoris dela conomía, nel puebru ai algunus comercius chicus, herrerías, construtoras, baris (destaca-si'l Tioky, ala vera dela EX-381), dos casas roalis i una residencia pa viejinus. Enas aldehueras del puebru s'assitia mesmu una posá pa viajaoris junta tres restaurantis i una gasolinera, comercius que los torregueñus llaman «Los Paraoris». Cerquina d'estus negocius poemus atopal la sedi dela Mancomunidá Sierra de Montanchi i la picina monicipal, que namás anda abierta en branu, epoca'l añu en que'l puebru s'enllena de vesitantis.
Coltura
[Edital | Editá'l códigu]Ena parti d'endrentu dela Torri ai una «Casa de la Coltura» qu'está ahormá duna salona reselvá pa autus emportantis, una biblioteca chica, una sala andi se puein usal ordenaoris de baldi i un pal de salas andi se hazin cussus d'estrución. Eno tocanti alas associacionis del puebru puein mental-si:
- La d'«Amas de Casa», que s'acupa d'avial la comía palas fiestas, d'entangal el baili de «Los Tabrerus» i del tratu cona ilesia «Nuestra Señora del'Assunción» pa avial las prossecionis, la limpieza, el coru i otrus assuntus.
- L'«Associación Coltural El Chicurrichi», que s'acupa d'entangal conciertus, bailis tradicionalis ena praça'l puebru i obras de teatru. Tamién calavora con'associación d'«Amas de Casa» quandu se celebran rehuíjus i autus que precisan convitis.
Hueraparti, dambas las dos associacionis calavoran en l'apreparamientu duna feria local en que s'enseñan toa crassi de herramientas y trastis viejus que gastavan los antiguus del puebru.
San Mateu i la Fiesta delos Tabrerus
[Edital | Editá'l códigu]El día 21 de Setiembri se celebra el día de San Mateu, Patrón dela Torri de Santa María, i tamién la Fiesta de los Tabrerus.
La Fiesta delos Tabrerus es la fiesta más antiga'l puebru. Assienta las sus raízis en tiempus delos celtas i hué volucionandu alo longu dela estoria, acibiendu la enfrujencia delos morus i golviéndu-si enos tiempus moernus quasi-religiosa, lo mesmu qu'á acontecíu con algunus celebramientus comparantis enos puebrus dela comarca (reparai las Tabras delos Quintus d'Albalá, los Tabrerus dela Vigin del Rosariu de Valdehuentis i las Tabras de San Bras de Montanchi). Escomiença cona descoja delas tabreras. Antañu eran nombrás pola Ilesia i eran seis: las dos primeras eran las mairinas de San Mateu i las otras hazían d'acompañantis; ogañu se presentan librimenti i toas son mairinas de San Mateu por igual. Lo más corrienti es que las tabreras sean moças qu'entavia no s'án casau, peru alas vezis no se presentan i tienin de represental essa hunción zagalas casás o crías más chicas. En quanti que las tabreras án síu descogías, án de precural-si un dançaol pa bailal juntus la dança'l «Chicurrichi» bien hateaus con vestimientas de muchus coloris destintus. El Chicurrichi se baila con ardil, en apricandu un juegu de pies vistosu que sigui'l son delos panderus, las frautas i los tamboris.[7]
Patrimoñu
[Edital | Editá'l códigu]Casas señorialis
[Edital | Editá'l códigu]Ena Torri de Santa María ai cincu casas señorialis, cuyas fachás dan ala calli General Lozano i presentan elimentus comunis: puertonas d'acessu, un balcón por cima dellas, ventanas con barrotis de hierru, escúus d'armas delas familias nobris, canchus picaus i arcus con bóvedas traviessas. La huerça dellas compartin un jardín pala parti d'endrentu i tienin otru más chicu ena parti d'alantri, presenteru dendi la calli.[8]
Ilesia dela Nuestra Señora del'Assunción
[Edital | Editá'l códigu]L'edificiu más emportanti dela Torri es la ilesia parroquial dela Nuestra Señora del'Assunción, assitiá ena praça prencipal del puebru. Hue costruía entri los siegrus XVI i XVII i está a cargu'l párracu de Montanchi, osea-si, preteneci ala diócesi de Coria-Caçris. Es de pranta retangulal, cuna navi partía en quatru cachus. Hue costruía a manu con pieras de granu que rehuerçan mesmamenti los contrahuertis. Lo mesmu la sacrestía cumu la torri s'acopran al tempru pol lau dela epístula, andi tamién s'alcuentra una delas dos puertonas de maera revestías d'arcus de meyu puntu que hazin d'entrá al tempru. L'altal mayol hue costruíu nel siegru XVII con maera pintá de varius coloris por mé dela ténica'l estofau. Dél se destacan l'imagi dela Vigin, l'escoltura chica de San Bras i una escoltura mu repolía dela Vigin col Niñu, assitiá al lau del Vangeliu i pintá tamién por mé del estofau a caberus del siegru XV.
L'Enzina Nieta
[Edital | Editá'l códigu]Enas aldehueras del puebru, envera la EX-381 i un poquinu antis d'allegal «a Los Paraoris» s'alevanta con ergullu unu delos arvus más nombraus de tola Estremaúra: l'Enzina Nieta. Es una enzina (Quercus ilex Ballota) cuna altura de 17 metrus, un troncu de quasi 5 metrus de canchol i una picolla de 21 metrus de diametru. Se destaca pola su antiguidá, ya que, sigún los alvertíus, escomençó a pulal ai pocu más de 500 añus nun terrenu ferti, seguramenti prantá delos labraoris pa ayuá-lus conas sus tareas agrícolas.[9]
N'otubri del 2013, un güen dau dela Enzina Nieta hormau de ramas emportantis dela estrutura del arvu se farrungó dispués duna temporá de ventolás, acontecel que, junta las maluras que l'atacan dendi hazi tiempu á, l'abarrancarun i amenaçan la su sobrivivencia.[10]
Referencias
[Edital | Editá'l códigu]- ↑ Worldpostalcodes.org, código postal n.º 10186.
- ↑ «Cáceres: Población por municipios y sexo. (2863)». INE. Consultado el 16 de enero de 2023.
- ↑ «Geografía - Ayuntamiento de Torre de Santa María - Ayuntamiento de Torre de Santa María». www.torredesantamaria.es. Consultado el 20 de enero de 2023.
- ↑ Lozano Rubio, Tirso (1894). Historia de la noble y leal villa de Montanchez.
- ↑ «Municipios - Mancomunidad de Sierra de Montánchez - Mancomunidad de Sierra de Montánchez». www.mancomunidadsierrademontanchez.es. Consultado el 20 de enero de 2023.
- ↑ Instituto Nacional de Estadística. «Alteraciones de los municipios en los Censos de Población desde 1842». Consultado el 31 de enero de 2023.
- ↑ «Día de San Mateo y La Fiesta de los Tablero - Ayuntamiento de Torre de Santa María - Ayuntamiento de Torre de Santa María». www.torredesantamaria.es. Consultado el 20 de enero de 2023.
- ↑ «Edificios de Interés - Ayuntamiento de Torre de Santa María - Ayuntamiento de Torre de Santa María». www.torredesantamaria.es. Consultado el 18 de enero de 2023.
- ↑ Domingo (8 de enero de 2021). «[:es]Árbol Singular Encina la Nieta, El Canalón de Torre de Santa María[:]». Andalucia Rustica. Consultado el 20 de enero de 2023.
- ↑ «Se desploma gran parte de 'La Nieta', una de las encinas más viejas de la región». Hoy. 17 de octubre de 2013. Consultado el 20 de enero de 2023.
Atijus p'ahuera
[Edital | Editá'l códigu]- Página del Ayuntamientu de Torri de Santa María
En Commons ai conteníu multimedia sobre Torri de Santa María.
.svg){kind=small}