Geografía d'Estremaúra

Estremaúra es la quinta comunidá utónoma d'España pol superficii, con 41.633 qm². Las sus dos provincias sonin las de mayol superficii d'España. Arraya al norti conas provincias de Salamanca i Ávila (Castilla i Lión), al sul con Güerva, Sevilla y Córduba (Andaluzia); al salienti, con Toleu i Ciá Real (Castilla-La Mancha) i al ponienti, con Portugal.

Geografía física

Relievi

Estremaúra reparti'l su territoriu entri dos grandis cuencas idrográficas, la del Taju (Caçris) i la del Guadiana (Badajós) i tres caénas montañosas paralelas: el sistema Central, los montis de Toléu i Sierra Morena. Ena mayol parti dela región aflora'l çócalu paleozoicu anque essestin hondigonis interioris o más o menus grandi qu'ahacinan arzilllonis i arenas del Treciariu. L'onipresencia del granu i dela piçarra obriga alos rius a enquacal-si hondamenti al terrenu. La sierras de drentu tienin un craru caraiti apalachensi, qu'es el tipu de relievi que predomina enas montañas d'Estremaúra.

En pensal de l'aparenti omogeniá dela su geografia Estremaúra tien gran variedá ecológica. Las mayoris testalera s'alcuentran nel Sistema Central: Calviteu (2404 m), El Torreón (2401 m), Canchal de Ballesteros (2342 m), El Turmal (2338 m), La Nijarra (2214 m) tos ellus nel valli el Xerti, Peludillo (2250 m), Alto del Horco (2162 m), Mesas Altas (2070 m) i Peña Negra (1637 m). Enos montis de Toleu de Las Villuercas s'alcançan los 1601 m col Picu Villuercas.

La mayol parti delas rocas del sistema Central se hormarun duranti'l Carboníferu, nel senu duna antiga orogenia, la orogenia varisca o ercínica, posteriolmenti desmantelá duranti'l Pérmicu i'l Mesozoicu. El relievi moernu se correspondi ala orogenia alpina.^[1] Es un conjuntu de fallas i bloquis altus i ahundius. N'Estremaúra se desenroan las sierras i vallis dela vertienti surocidental: sierra de Gata, Las Hurdis, Montis de Tras la Sierra-Valle del Xerti, La Vera i'l hondigón del Tajuu, conos vallis del Tiétar, Alagón i Arrago. Nesti conjuntu destinguimus cincu paisagis con pressonalidá propia: Gata, dendi la sierra de Malvana ena raya con Portugal ata Las Hurdis. Las Hurdis, Entri Puertu Vieju i'l Alagón. L'Alagón, entri Riomalo i el Puertu de Bañus. El valli del Xerti, entri la sierra de Candelario i la sierra de Tormantos-Gredos. La Vera, entri la sierra de Tormantos i el Tiétar, es la vertienti sul dela sierra de Gredos.

Sobri'l valli del Taju s'assientan una serii de cuencas borrundangas, topográficamenti más hondigonas que la penillanura i recubiertas por borrundangus polos ríus dela región. La más ocidental es la dela vega de Moraleja, alos pies dela sierra de Gata i regau pol ríu Arrago ala altura del embalsi de Borbollón. La vega de Coria-Galisteo s'alcuentra a logu, sobri'l río Alagón. Hazia'l nordesti s'alcuentran las vegas de Granadilla, oi acupás pol embalsi de Gabriel y Galán. Por últimu s'alcuentran la cuenca del valli del Tiétar i Campo Arañuelo, la más granderona, limitá pol escalón de La Vera i'l propiu Taju, al sul de Gredos.

Nel centru dela región apareci la penillanura, el çócalu paleozoicu qu'es el porti de tol relievi. Se trata duna región llana, suavimenti endulá peru colos ríus hundamenti encaxaus. Ena penillanura central destinguimos dos setoris: los Llanos del Salor, al ponienti sobri'l cussu del Taju, i las Tierras de Caçris i Trugillu nel centru ala isquierda del Taju. Aparecin tolos tipus de hormas de relievi sobri rocas metamórficas: berrocalis, bombus, torris, rocas caballeras, tors, dossu de ballena, etc.

Las Sierras Centralis Estremeñas son, en ralidá, las estribacionis más ocidentalis delos montis de Toleu. Hazin de devisoria entri'l Taju i'l Guadiana. Se trata de antiguus prieguis que huerun recubiertus por borrundangus i alogu desenterraus de nuevu, polo que horman un típicu relievi apalachense. Destinguimos tres conjuntus: Las Villuercas, Montánchez i San Pedro. Las Villuercas están hormás puna serii de sierras de dereción norponienti-susalienti l qu'allegan ata Monfragüe nel Taju. El su arrayu oriental es la sierra de Altamira que hazi de raya con Toleu. Montánchez s'assitia nel centro dela región entri las sierras de Guadalupe i San Pedro. La Sierra de San Pedro es la más ocidental. Está hormá por abondu de chiqueninas sierras paralelas de altoris acomparantis. Montánchez i San Pedro tien una dereción general de salienti a ponienti.

Sobri'l valli'l Guadiana s'assentan una serii de hondigonis recubiertas de borrundangus, peru que tien mayol continuu i destensión que nel Taju. Las Vegas del Guadiana, en tornu a Méria, enas que se destinguln la Vega Alta, en torno a Don Benitu i la Vega Baxa, entre Méria y Badajós. Hazia Portugal apaeci de nuevu la penillanura, el Guadiana adota una dereción norti-sul i las vegas se prologan polos Llanos de Olivenza.

La penillanura güelvi a cobral protagonismu nel sul dela región. Güelvi a sel una región llana, suavimenti endulá peru colos ríus hondamenti enquacaus, peru con chiqueninus hondigonis por arzillonis i arenas, i chiqueninas sierras de tipu apalachense. Se destinguin tres comarcas: Tierra de Barros, un setor ligeramenti ahundíu recubiertu d'arzillonis en tornu a Almendralejo; La Serena, entri'l ríu Zújar i'l río Guadamez, un ampriu glacis que poni'n contauto la penillanura estremeña cola manchega i'l valli d'Alcudia; i Sierra Morena, una fressión dela penillanura que da passu al valli'l Guadalquivir, en ondi resaltan abondu sierras de pocu altol.

Sistemas montañosus

Al norti dela comunidá s'alçan las sierras del sistema Central, cona sierra de Gredos, sierra de Béxar ondi Estremaúra alcança el su mayol altol nel Calviteriu con 2405 m i la sierra de Gata que la desseparan dela meseta norti castellana. Nel centru s'atopan, d'esti a oesti, la sierra delas Villuercas, la sierra de Montánchez, i la Sierra de San Pedru, que horman parti delos Montis de Toléu. Al sul s'eleva Sierra Morena, que dessepara Estremaúra d'Andaluzia.

Idrografia

Ríu Ibor a su passu pola localiá caçriña de Bohonal de Ibor

Estremaúra reparti las sus auguas entri dos grandis cuencas idrográficas, la del Tahu i la del Guadiana, i s'estrutura en tornu a dos ríos que tien nacencia ahuera dela región.

Tolos rius estremeñus sonin rius mediterraneus cuna huerti estiagi en branu, un mássimu en primavera, un massimu segundariu n'otoñu i un mínimu segundariu n'iviernu. sonin rius d'alimentación pluvionival. Una delas caraitirísticas más asseñalás delos rius estremeñus es qu'alo largu dela mayol parti del su cussu s'alcuentran numbirosus embalsis. Frequentimenti la cola dunu s'alcuentra a poca distancia dela pressa de sotru. sonin embalsis tantu pa regadiu comu pa produción idroelétrica. Las canalis pa regadiu sonin mu moernus ya que la mayoría apaecin enos añus d'imprantación del Pran Badajós. Estremaúra no es tierra de lagus, los pocus qu'essistin sonin de caraiti endorreicu i mu chiqueninus, sin bargu enas numbirosas hesas d'Estremaúra essestin inumberabris charcas arteficialis, que horman humerus o más o menus grandis escavaus en diversas partis dela hesa pa retenel l'augua dela luvia, qu'ogañu s'an convertíu en zonas úmidas d'emportancia.

Cuenca del Taju

Endilgui prencipal: Cuenca idrográfica del Taju.

El ríu Taju es el qu'estrutura Caçris. Tien nacencia enos Montes Universales, ena provincia de Teruel, i aboca en Lisboa. Entra en Caçris tras passal por El Puente del Arzobispo i horma l'arrayu entri las provincias de Toleu i Caçris ata allegal ala cola'l embalsi de Valdecañas. El ríu s'enquaca hondamenti ena penillanura lo que facilita la costrución d'embalsis. Ogañu, dendi que se hazi estremeñu s'encuentra, pláticamenti, embalsau ata Alcántara. Debíu a esti hondu enquacamientu no s'an assentau ena sus veras grandis puebracionis, huendu la más embremática la villa de Alcántara. Auguas abaxu hazi d'arrayu con Portugal i abandona definitivamenti España tras el embalsi de Cedillo. N'Estremaúra el Taju recebi angunu delos sus prencipalis afluentis. Los prencipales afluentis porla derecha sonin:

El ríu Tiétar, que tien nacencia enas estribacionis ocidentalis dela sierra de Gredos, al ponienti de Peña Cenicientos (Ávila-Mairil). Entra enquacau en Caçris tras l'embalse de Rosarito i arrecogi las auguas de La Vera i el Campo Arañuelo. Se trata de múltiplis afluentis, tanto pola derecha comu pola isquierda en cuyas veras s'alcuentran las prencipales puebracionis. Aboca nel Taju entriegandu las auguas na cola'l embalsi d'Alcántara, pocu más pabaxu dela presa de Torrejón, nel parqui nacional de Monfragüe.

El ríu Alagón tien nacencia ena sierra de Herreros, en prena penillanura salmantina, tributaria'l Duero. Tamién las sus prencipalis afruentis tienin la su cabecera en territorius quitaus al Duero. Entra en Estremaúra mu enquacau por Las Hurdis i assina acontina ata allegar a Coria, en Caçris. Aboca nel Taju cerquina'l embalsi d'Alcántara. Tien emportantis afluentis, pola derecha el ríu Hurdanu, el ríu Los Ángeles i el ríu Arrago; i pola isquierda el ríu Caparra, i el ríu Xerti un ríu que sorprendi pola su traça retilínea entriPrasencia i el Puertu de Tornavacas, que da passu a Ávila.

Los prencipalis afluentis pola isquierda sonin de mucha menol entidá, ya que tien nacencia enas Sierras Centralis Estremeñas. Los prencipalis sonin el ríu Gualija, el ríu Ibor, el río Almonte i el ríu Salor. De tos ellus solu l'Almonte tien una cuenca idrográfica de cierta entidad. Arrecogi las auguas delas Tierra de Cáceres i recebi pola isquierda afluentis comu el ríu Tozo i el ríu Tamuja. Se trata dun ríu enquacau ena penillanura. L'embalsi d'Alcántara exerci la su enfrugencia ata el su cussu meyu.

Cuenca'l Guadiana

El ríu Guadiana es el qu'estrutura Badahós. Tien nacencia enos maniantalis de Pinilla, n'Albaceti i aboca nun gran estuariu n'Ayamonte, ena provincia de Güelva, haziendu arrayu con Portugal. Entra en Badajós pol Estrecho de las Hoces, ena sierra de La Umbría, i ala su salía s'alcuentra ya embalsau. Discurri polas Vegas Altas i pola Tierras de Mérida-Vegas Bajas del Guadiana, polo qu'ena sus veras ain emportantis puebracionis, comu Villanueva dela Serena, Don Benitu, Méria i Badajós. Tras de passar Badajós haze d'arrayu entri España i Portugal i hata qu'abandona definitivamenti Estremaúra endipués de regal los llanos de Olivenza. Los afluyentis del Guadiana sonin muchus más numbirosus, peru más cortus i menus caudalosus.

Pola derecha s'asseñalan: el ríu Estena, el ríu Estenilla, el ríu Guadarranque, el ríu Guadalupejo i el su afluyenti pola derecha el ríu Silvadillos que riegan Las Villuercas, el ríu Gargáligas i los sus afluyentis pola isquierda ríu Cubilar i pola derecha el río Ruecas i el ríu Alcollarín, el ríu Aljucén i el río Gévora. Toa aquesta zona está regá por dos emportantis canalis, la canal d'Orellana i la canal de Montijo.

Pola isquierda s'asseñalan: el río Zújar i los sus afluyentis pola derecha el ríu Guadalmez que recebi las auguas del ríu Alcudia, el ríu Guadamez, el ríu Matachel, el ríu Guadajira, el ríu Olivenza i el ríu Alcarrache. Tamién la vera isquierda está regá por dos emportantis canalis, la canal del Zújar i la canal de Lobón. El afluyenti más emportanti es el Zújar, que tien nacencia cerca dela Granja de Torrehermosa, en Badajoz i arrecogi las auguas de Los Pedroches i el valli d'Alcudia.

Cuenca'l Guadalquivir

La vertienti sul de Sierra Morena entriega las sus aguas al riu Gudalquivir. En Estremaúra s'alcuentran las cabeceras d'angunus delos sus afluyentis comu el riu Bencébar i el riu Viar.

Vegetación

El contrasti que metin ena región las montañas aportan ala comuniá utónoma d'Estremaúra angu de varieá ecológica, anque la mayol parti dela región preteneci al ámbienti'l bosque mediterráneo. Esta á síu una región intensamenti esplotá dendi los tiempus dela Preestoria ena que, no ostanti, essestin zonas menus esplotás. Sin bargou el moelu d'esplotación del bosqui, la hesa, á alcançau tal nivel d'equilibriu ecológicu que permiti al mesmu tiempu l'esplotación del meyu natural i la creceera dela vida salvage. La hesa es un mou d'esplotación del bosqui nel que se quitan las especiis competioras daquellas que s'esplotan agrícolamentei. Apaeci, assima, el estratu arbóreo, con anzinas i alcornoquis, i el plau, con yerva pa que pasti el ganau. Tamién s'entrecalan esplotacionis agrícolas. Se trata dun sistema d'esplotación que se remonta, al menus, ala epoca romana.

El pisu basal barbea ena mayol parti dela región en él apaeci el bosque mediterráneo. La vegetación típica es xerófila, ya que tien qu'aguantal la arides estival. La especii dominanti es l'anzina. El sotubosqui es leñosu, espinosu i aromáticu, con especiis perennifolias comu la lentiscoa i l'alabiernu. Nel corteju frolísticu apaecin especiis comu la sabina, la mairoña, el romeru, el tomillu i las xaras. Enas zonas más úmias apaeci el robri comu especii dominanti. Es mu emportanti el bosque galería, nel qu'apaecin especiis rehorcas comu l'áramu, el chopu o l'olmu, que s'alcuentran enas veras delos ríus i las charcas.

Nel pisu montanu apaeci el robri comu especii dominanti, i es el pisu más alto dela mayol parti delas montañas dela región. Aquesta zona a sufríu l'apretación antrópica, polo que s'alcuentran especiis de repuebración, prencipalmenti de pinus alóctonus de creceera rápida.

El piso subalpino solu apaeci nel sistema Central. Aquina apaeci el robri i el haya. Nel pisu alpino, que solu se da nel entornu dela sierra de Greus (Valli'l Xerte, Ambrós y La Vera) apaeci la plaera alpina. Esti pisu á síu gastau pa pastu de branu lo menus dendi la Edá Meya i hata meyaus del Prantilla:Siglo.

Espacius naturalis protegíus

Endilgui prencipal: Anexo:Espacios naturales protegidos de Extremadura.

Estremaúra es una delas regionis uropeas col sistema natural menus degradau del continenti, en pensal d'ellu el númberu i nivel de proteción destus espacius naturalis es claramenti insuficienti. Sin embargu, Estremaúra tieni un parqui nacional, dos parquis naturalis, una reserva natural un paisagi protegíu, un geuparqui, quatru menumentus naturalis i numerosas ZEPAs o zonas especialis de proteción delas avis.

Geoparque Villuercas-Ibores-Jara

El 17 de setiembri de 2011 las comarcas de Villuercas, Ibores i Xara huerun encruyías ena redi mundial de geoparquis dela manu dela Unesco. Geoparque Villuercas-Ibores-Jara es el quintu geoparqui d'España. La su singulariá geológica (legá ala hormación delos Montes Apalaches n'Estaus Uníus) i natural hazin d'estas comarcas un destinu turístico d'enterés regional.

Parqui Nacional de Monfragüi

El 3 de marçu de 2007 el Consejo de Ministros apruevó declaral Monfragüe comu parqu nacional, convirtiéndu-lu nel parqui n.º 14 destas caraitirísticas n'España. Anualmenti recebi más de 80 000 vesitas.^[2]

Parquis naturalis

Estremaúra cuenta con dos parquis naturalis declaraus i gestionaus pola Junta d'Estremaúra, que sonin el parqui natural de Cornalvo, en Badajós i el parqui de Tajo Internacional, entri Caçris i Portugal.

Parque natural de Cornalvo, enas cercanías de Mérida i cuna superficii de 13 143 ha.
Parque natural del Tajo Internacional, ena provincia de Caçris i que cuenta cuna superficii de 25 088 ha.

Reservas naturalis

Reserva Natural Garganta de los Infiernos, nel valle del Xerti i cuna superficii de 6927 ha i declará comu tal el 14 de noviembri de 1994.

Paisagis protegíus

Valcorchero y Sierra del Gordo en Plasencia

Menumentus naturalis

Zonas d'ínterés regional

Climii

El climii d'Estremaúra es del tipu mediterráneu, acetu nel norti, ondi está continentaliau, i nel oesti, ondi la enfruéncia el Atlánticu hazi qu'el climi sea más suavinu.

En heneral, se caraiteriza polos sus vranus calorosus i secus, con gran escasés de llúvias, i unus ibielnus largus i suavizaus pol mé la enfruéncia oceánica pola celcania a la costa alántica purtuguesa.

Temperaturas

Las temperaturas meias anualis várian entri 16 i 17°C en añu en añu. Nel norti Estremaúra, las temperaturas meias (13°C) sonin más baxas que nel sul (18°C), los valoris van umentandu pogressivaenti a miia que s'abança pal sul hata llegal a enmeyacionis de Sierra Morena, ondi desminuin pol mé l'artol.

Duranti el vranu, la temperatura meia el mes de Húliu es mayol de 26°C, aportandu a unas máisimas diurnas que cuelan los 40°C. Es, pues, un vranu calorosu las cuyas temperaturas sonin mayoris de las qu'eberia tenel, se supón, pola su prossimiá al Alánticu. La latitú la rehión detelmina qu'el grau d'assolanáncia sea altu. Estu, casau cola enfruéncia el anticiclón de las Açoris i cola reucia artol meia la rehión (200–400m), prevoca la elevá temperatura meia d'Estremaúra.

Los iviernus sonin suavis. Las temperaturas ibelnalis mas baxas se rustrin ena zonas de montañas artas (Sistema Central, Sierra Guaalupi i angunas árias de Sierra Morena), con una temperatura meia de 7,5 °C.

Precipitacionis

Las precipitacionis varian entri 450 i 500 litrus pol metru cuairau anualis. Las zonas de mayoris precipitacionis se correspondin con lugaris montañosus cumu las sierras el norti, la sierra e Guadalupi i Sierra Morena, ondi alicuandu s'alcançan los 1000 litrus. Las zonas ondi las precipitacionis sonin menoris sonin las de menol altol: Vegas Baxas de Guadiana.

sonin precipitacionis escasas con destribución estacional —s'apeñuhan en ibielnu—. Ai predomiñu los chubascus en contra la llúvia i el llovisneu. Amás, ai periús de varius añus enos que las precipitacionis sonin mayoris («la zagala»), i periús enos que sonin menoris («el zagal») que se ripitin alternativaenti ca varius añus.

Geografía política

Mancomunidáis integralis

Las mancomuniás integralis sonin las entidá territorialis almenistrativas d'Estremaúra. Es lu más semilal n'Estremaúra al concetu de comarcas. Tolos municipius pretenecin a una cona esceción de Mérica, Baajós, Caçris, Prasencia i Navalmoral dela Mata, que pol sel municipius de mayol puebración, no pretenecin a nenguna mancomunidá integral. Dessistin 30 mancomunidades integralis n'Estremaúra: 16 ena província de Baajós i 14 ena província de Caçris.

Comarcas

Endilgui prencipal: Comarcas d'Estremaúra.

Comarcas dela província de Caçris

Comarcas dela província de Baajós

Municipius

Estremaúra tieni 388 municipius: 165 ena província de Baajós i 223 ena de Caçris.

Partíus judicialis

Província de Baajós: Villanueva de la Serena, Almendralejo, Llerena, Mérida, Badajoz, Olivenza, Zafra, Jerez de los Caballeros, Herrera del Duque, Castuera, Don Benito, Fregenal de la Sierra, Montijo i Villafranca de los Barros.
Província de Caçris: Caçris, Coria, Logrosán, Navalmoral de la Mata, Prasencia, Trugillu i Valencia de Alcántara.

Referencias

↑ Vera, J. A.; Ancoechea E.; Barnolas, A.; Bea, F.: Calvo, J. P.; Civis, J.; Vicente, G. de; Fernández Ganotti, J.; García Cortés, A.; Pérez Estaún, A; Pujalte, V.; Rodríguez Fernández, L. R.; Sopeña, A. y Tejero, R (2004). «Introducción». En Vera Torres, J. A., ed. Geología de España. Sociedad Geológica de España e Instituto Geológico y Minero de España. pp. 1-17. ISBN 84-7840-546-1.
↑ Número de visitas en el Parque Nacional de Monfragüe durante el año 2007.

Bibliografia

Alberdi Nieves, Virginia (2019) Los Espacios Naturales Protegidos de Extremadura, Editorial Academica Española
Barcia Mendo, Enrique Maurice Legendre i José Luis Puerto (2023) Las Hurdes, estudio de geografía humana, Mérida: Editora Regional de Extremadura
Barrientos Alfageme, Gonzalo (1990) Geografía de Extremadura, Badajoz: Universitas Editorial.
García González, Leandro (1994) Los ríos extremeños. Introducción a su régimen, Cáceres: Servicio de Publicaciones de la Universidad de Extremadura
Carrasco González, Rosa M. (2000) Geomorfología del Valle del Jerte. Las líneas maestras del paisaje, Cáceres: Servicio de Publicaciones de la Universidad de Extremadura
López Piñeiro, Antonio i Arturo García Navarro (2002) Mapa de suelos de la provincia de Cáceres. Escala 1:300.000

Estremaúra
Coltura (Arquitetura) · Estoria (Cronología) · Demografía · Deporti · Economía · Gastronomía · Geografía · Política · Símbolus (Bandera · Escúu · Inu) · Bibliografia
Vel más artícalus al tentu de...

[vera2004-01-1] Vera, J. A.; Ancoechea E.; Barnolas, A.; Bea, F.: Calvo, J. P.; Civis, J.; Vicente, G. de; Fernández Ganotti, J.; García Cortés, A.; Pérez Estaún, A; Pujalte, V.; Rodríguez Fernández, L. R.; Sopeña, A. y Tejero, R (2004). «Introducción». En Vera Torres, J. A., ed. Geología de España. Sociedad Geológica de España e Instituto Geológico y Minero de España. pp. 1-17. ISBN 84-7840-546-1.

[2] Número de visitas en el Parque Nacional de Monfragüe durante el año 2007.

[1]

[2]